Dizionari de Lenghe Furlane

fâ  fâ  [FO]

1. v.tr. produsi, creâ, meti dongje:  i nevôts di Meni a son rivâts ducj a fâ la cjase (Riedo Pup, I furlans e Sant Martin); e saveve fâ tant biei dissens te lavagne cui zes di colôr (Dino Virgili, Emme come mamma); une sdrume di cjamps clapignôs, […] no fasevin vonde blave nancje par mangjâ (Riedo Pup, I furlans e la blave); dilunc de prime vuere mondiâl scuasi dutis lis cjampanis dal Friûl a forin fondudis: il bronç al fo doprât par fâ canons (Monika Pascolo, Il sun de fieste)
   
   1. (ass.) lavorâ, lâ indevant cuntun lavôr, une ativitât, une azion che si pues capî dal contest:  rivistu a fâ o ti coventie une man?
   2. lassâ vignî fûr o sburtâ fûr dal cuarp:  un colomp al à fat il sbit propit sul veri de machine; gjalinis che a fasevin l'ûf in ogni cise e al jere biel lâ a cirîju (Alan Brusini, Come tai romançs)
2. v.tr. ancje ass., parturî:  i umign a davin une man a fâ ae puare bestie: a tiravin cu lis cuardis par dute la stale e po lis vôs legris, e il vidiel bagnât par tiere (Dino Virgili, La aghe da pît la cleve); e misturave la slacare dal bevaron, e, dongje, la Sante e spietave par puartâlu ae vacje che e veve fat (Maria Forte, Cjase di Dalban)
   Sin. parturî , prolî , meti al mont , dâ a lûs , dâ in lûs , fiâ , fiolâ , parî
   
   1. s.m. moment di parturî, part:  Oto Maçon, a stâ in face a nô, che si presentave infalibil, magari a dute gnot, a judâ gno pari cuant che al scrocave pe vacje il timp dal fâ (Ivano Urli, I ordenâi)
3. v.tr. cun sens gjeneric al pues riferîsi a cetantis azions, sedi concretis che astratis, che a puedin jessi specificadis di un complement:  no si puedin fâ propuestis se prime no si fâs une analisi (Erika Adami, La promozion de lenghe furlane sui mass media); dute la compagnie a fâ fieste cjase dai nuviçs (Ivano Urli, Storie di Min); e cussì, vuere. E i furlans a àn scugnût fâle (Riedo Pup, I furlans e la pâs); se o vessin fat ricors o saressin lâts a pericul di vinci, ma di no vê avonde personâl par dâ un bon servizi (Sandri Carrozzo, Piçulis storiis di mafie furlane); cuant che al murì, al clamà il plevan e al fasè test tes sôs mans (Riedo Pup, Beâts i viei); a vevin fat la lôr sielte di scuindon e cence che nissun no ju podès fermâ (Spirt Anonim, Mode)
   
   1. puartâ insom, finî:  cuant che o ai fat 19 agns gno pari mi à dit che e jere rivade la ore di jentrâ tal Club dal Fogolâr (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»); a finivin in Bosgne, in Moravie, in Ongjarie e fâ dîs agns di naie (Alan Brusini, Come tai romançs); o vin scugnût fâ la strade a pît (Pieri Somede dai Marcs, Fra Silvio)
   2. produsi une cierte sensazion, emozion, reazion e v.i.:  la femine par fâi rabie i cumbinave dai bruts scherçs (Tarcisio Venuti, La cjase di Toni); tante int in cjase e fâs ligrie (Maria Forte, Cjase di Dalban); une strie e fâs pôre ancje se e je biele come te (Carlo Tolazzi, La salamandrie tal fûc)
   3. dâ tant che risultât di une operazion aritmetiche:  cinc e trê a fasin vot
4. v.tr. dâ a cdn. o a alc une cierte cualitât, situazion, cundizion:  o sin puars contadins, ma chest frutin nus fâs siôrs e contents (Pieri Somede dai Marcs, La sûr); Jacu Berart al lu vevin fat sindic subit dopo zûts via i Mucs (Novella Cantarutti, Il Bolp)
5. v.tr. dî:  al mi cjale cu la muse dure e cence bati cee al mi fâs: - Cjare lui, siôr nodâr, jo no ai tancj scrupui (Pieri Somede dai Marcs, Interès malandret)
6. v.tr. vê une cierte opinion su alc o cdn.:  no ti fasevi cussì coragjôs (Checo Tam, Sense)
7. v.tr. cjapâ sù une abilitât, une sensibilitât:  salacor al à tant fat il voli al piçul e la orele al cidin che nol è il plui adat e competent a judicâ chestis robis cussì grandis (Antoni Beline, Sant Jacum, là che al finìs il mont); o varês ben di scomençâ une volte, se o volês tornâ a fâ la man (Carlo Sgorlon, Prime di sere)
8. v.intr. puartâ indevant un ciert lavôr, vê une cierte capacitât o profession:  di profession al faseve l'avocat (Fabian Ros, L'om che al pierdeve pinsîrs pe strade); si inzegnavin a fâ i veterinaris, i purcitârs, i marangons, i muredôrs (Riedo Pup, I furlans e la culumie)
   
   1. vê une cierte funzion o servî par une cierte funzion:  [la Livence] e fâs di confin jenfri Venit e Friûl (Dino Virgili, Un riul tra Venit e Friûl); o ai pront za che al è un pieç il document che o intint di presentâ al Olf par che al fasi di base di discussion te definizion dal Plan (Adrian Cescje, Memoriis di politiche linguistiche)
   2. tignî sù une part o fâ fente di jessi cdn. o di stâ intune cierte maniere:  il Vinars Sant, tal Sepulcri, e a Nadâl, tal Presepi, jê e faseve di Madone (Dino Virgili, La aghe da pît la cleve); o fasevi la part dal inamorât, mi puartavi come che si use, ma cence anime e afiet (Alan Brusini, Gian Paolo Linda, I forescj)
   3. compuartâsi intune cierte maniere:  a un ciert pont Sant Pieri, fasint il gnogno, i domandà se e veve vût buine vendeme di miluçs e cjastinis (Luigi Gortani, La ospitalitât); la gjate marangule o marantule o ben il boboròs o ancje dome il lôf […] se il frut nol fâs il brâf, a vegnin di gnot e sal puartin vie (Sandri Carrozzo, Friûl di Magance); po ben, fasêt cemût che o volês (Josef Marchet, Lis predicjis dal muini)
9. v.intr. soredut, ma no dome, cun ûs impers., riferît aes cundizions di timp meteorologjic:  il barcon che al deve sul puiûl al jere viert, stant che al faseve une vore cjalt (Cristina Noacco, Faliscjis); chê gnot al tirave un aiar di fâ pôre e dentri dal ostel al faseve frêt (Max Mauro, Un Friûl difarent: i 90 mhz di Onde Furlane); il fogolâr pront a difindi la famee dal Invier, par tant che al vueli fâ criùre (Maria Forte, Cjase di Dalban); se chest timp a nol fâs ploie / jo doman o ai di partî / ma o partìs di male voie / e il gno cûr tal lassi a ti (Popolâr, Se chest timp a nol fâs ploie)
10. v.intr. in interogativis, costruzions cun "a" e un infinît, podê, jessi in stât, rivâ a un ciert risultât:  nol saveve cemût fâ a consolâ chês puaris creaturis (Pieri Somede dai Marcs, Par une lengate); «E tu, cemût fâstu a savêlu?» i diseve mê mari (Alan Brusini, Come tai romançs)
11. v.tr. in costruzions causativis:  il lari al fâs capî a mots di jemplâ il sac (Fabian Ros, La rambe); o ai fat peâ il cjan cu la cjadene curte (Carlo Sgorlon, Prime di sere); Salvi, che o ai fat vignî di Florence, al à fevelât de problematiche scolastiche tes tantis situazions minoritariis (Adrian Cescje, Memoriis di politiche linguistiche)
12. v.tr. lassâsi fâ alc:  dut un lâ fûr e dentri dal ospedâl e dal 1990 incà Rosane e à fat cinc operazions (Cristina Noacco, Faliscjis)
13. s.m. il puartâ insom alc, compliment concret, in gjenar in confront cu la teorie:  li cjacaris a son une robe, ma dopo il fâ al è une altre; la esperience e ven dome cul fâ (Carli Pup, Speciâl)
    Sin. fat¹ , azion¹ , pratiche
14. s.m. moment li che alc al tache o si complete:  sul fâ de gnot a traviersavin un cjamp di luvins (Catarine Percude, La maledizion dei luvins)
15. s.m. maniere di compuartâsi:  ognidun al veve il fâ, la muse, la vôs adatade a contâlis (Dino Virgili, Cjase Basse)
    Sin. mût , maniere , ande

Polirematichis e espressions idiomatichis

• a fâ loc.av.
• amâr in bocje loc.s.m.
• ben fate loc.inter.
• biel fâ loc.s.m.
• ce fâ loc.s.m.
• cence fâsi inacuarzi loc.av.
• dâsi da fâ loc.v.
• dâsi di fâ loc.v.
• di fâ pôre loc.av., loc.adi.inv.
• di fâ spavent loc.av., loc.adi.inv.
• fâ a bocons loc.v.
• fâ a cjâr loc.v.
• fâ a fetis loc.v.
• fâ a fruçons loc.v.
• fâ a gare loc.v.
• fâ a ments loc.av.
• fâ a pugns loc.v.
• fâ a timp loc.v.
• fâ a tocs loc.v.
• fâ aghe loc.v.
• fâ ale loc.v.
• fâ alis loc.v.
• fâ alt e bas loc.v.
• fâ amicizie loc.v.
• fâ atenzion loc.v.
• fâ bati il cûr loc.v.
• fâ bati la lune loc.v.
• fâ belance loc.v.
• fâ ben loc.v.
• fâ biel acet loc.v.
• fâ biele mostre loc.v.
• fâ biele muse loc.v.
• fâ bocje da ridi loc.v.
• fâ bocje di ridi loc.v.
• fâ bocjis loc.v.
• fâ boli i spirts loc.v.
• fâ boli il sanc loc.v.
• fâ bon loc.v.
• fâ bon acet loc.v.
• fâ bon bevi loc.v.
• fâ bon pro loc.v.
• fâ bon voli loc.v.
• fâ bossul loc.v.
• fâ bot loc.v.
• fâ bote loc.v.
• fâ brute figure loc.v.
• fâ bussul loc.v.
• fâ calcul loc.v.
• fâ capitâl loc.v.
• fâ capot loc.v.
• fâ cariere loc.v.
• fâ carnevâl loc.v.
• fâ câs loc.v.
• fâ casse loc.v.
• fâ cause loc.v.
• fâ cause comune loc.v.
• fâ cence loc.v.
• fâ cjanton loc.v.
• fâ cjar loc.v.
• fâ cjarte loc.v.
• fâ cjartis loc.v.
• fâ cjistiei loc.v.
• fâ clarece loc.v.
• fâ code loc.v.
• fâ cognossince loc.v.
• fâ colâ i braçs loc.v.
• fâ colâ i coions loc.v.
• fâ colâ lis balis loc.v.
• fâ colôr loc.v.
• fâ colp loc.v.
• fâ compagnie loc.v.
• fâ companie loc.v.
• fâ compassion loc.v.
• fâ compliments loc.v.
• fâ cont loc.v.
• fâ cori loc.v.
• fâ cori i ûfs loc.v.
• fâ corone loc.v.
• fâ crodi che il Signôr al sei muart di frêt loc.v.
• fâ crosutis loc.v.
• fâ cuatri cjacaris loc.v.
• fâ cuatri pas loc.v.
• fâ cuintri loc.v.
• fâ cuistions loc.v.
• fâ cuote loc.v.
• fâ dabon loc.v.
• fâ dal ben loc.v.
• fâ dal mâl loc.v.
• fâ dam loc.v.
• fâ dassen loc.v.
• fâ di ale loc.v.
• fâ di cene loc.v.
• fâ di cjan e di lôf loc.v.
• fâ di cjapiel loc.v.
• fâ di gulizion loc.v.
• fâ di gustâ loc.v.
• fâ di mancul loc.v.
• fâ di mangjâ loc.v.
• fâ di mirinde loc.v.
• fâ di mot loc.v.
• fâ di mot cul cjâf loc.v.
• fâ di moto loc.v.
• fâ di pâl e di forcje loc.v.
• fâ di pale e di forcje loc.v.
• fâ di voli loc.v.
• fâ dibisugne loc.v.
• fâ diferencis loc.v.
• fâ dificoltâts loc.v.
• fâ disio loc.v.
• fâ doi pas loc.v.
• fâ dongje loc.v.
• fâ dôs cjacaris loc.v.
• fâ dreçâ i cjavei loc.v.
• fâ dreçâ i cjavei sul cjâf loc.v.
• fâ dreçâ il pêl loc.v.
• fâ dûl loc.v.
• fâ dûl ai claps loc.v.
• fâ dutun loc.v.
• fâ e disfâ loc.v.
• fâ e tasê loc.v.
• fâ fastidi loc.v.
• fâ fente loc.v.
• fâ ferade loc.v.
• fâ fieste loc.v.
• fâ fieste finide loc.v.
• fâ fins loc.v.
• fâ fortune loc.v.
• fâ fraie loc.v.
• fâ frêt loc.v.
• fâ front loc.v.
• fâ fûc loc.v.
• fâ fûc e flamis loc.v.
• fâ fuee loc.v.
• fâ fumâ la beche loc.v.
• fâ fûr loc.v.
• fâ furôrs loc.v.
• fâ fûs loc.v.
• fâ gare loc.v.
• fâ gjonde loc.v.
• fâ gloti ducj i dincj loc.v.
• fâ gloti la peraule loc.v.
• fâ gloti peraulis e lenghe loc.v.
• fâ gole loc.v.
• fâ gomit loc.v.
• fâ grop loc.v.
• fâ grum loc.v.
• fâ i conts loc.v.
• fâ i conts aduès loc.v.
• fâ i conts inte sachete loc.v.
• fâ i conts tes sachetis loc.v.
• fâ i cuars loc.v.
• fâ i onôrs di cjase loc.v.
• fâ i pulçs loc.v.
• fâ i purcituts loc.v.
• fâ i viers loc.v.
• fâ il bec a lis moscjis loc.v.
• fâ il bec a lis stelis loc.v.
• fâ il bec aes moscjis loc.v.
• fâ il bec aes stelis loc.v.
• fâ il biel loc.v.
• fâ il blec loc.v.
• fâ il bon timp e la ploie loc.v.
• fâ il cjalt e il frêt loc.v.
• fâ il coion par no paiâ il dazi loc.v.
• fâ il crist loc.v.
• fâ il diaul e piês loc.v.
• fâ il disio loc.v.
• fâ il gnogno par no paiâ il dazi loc.v.
• fâ il jet loc.v.
• fâ il mat loc.v.
• fâ il militâr loc.v.
• fâ il mone par no paiâ il dazi loc.v.
• fâ il montafin loc.v.
• fâ il music loc.v.
• fâ il pâr loc.v.
• fâ il pas plui lunc de gjambe loc.v.
• fâ il plasê loc.v.
• fâ il pont loc.v.
• fâ il prin pas loc.v.
• fâ il siôr loc.v.
• fâ il so dovê loc.v.
• fâ il so podê loc.v.
• fâ il soldât loc.v.
• fâ il stupit par no paiâ il dazi loc.v.
• fâ il zûc loc.v.
• fâ impression loc.v.
• fâ in cûl loc.v.
• fâ in maniere loc.v.
• fâ in mût loc.v.
• fâ in timp loc.v.
• fâ indenant loc.v.
• fâ indevant loc.v.
• fâ jù loc.v.
• fâ judizi loc.v.
• fâ justizie loc.v.
• fâ l'amôr loc.v.
• fâ l'apel loc.v.
• fâ l'efiet loc.v.
• fâ l'impussibil loc.v.
• fâ l'indian loc.v.
• fâ l'ûf loc.v.
• fâ l'ûf prin dal nît loc.v.
• fâ la aghe loc.v.
• fâ la barbe loc.v.
• fâ la biele gjambe loc.v.
• fâ la biele vite loc.v.
• fâ la biele voie loc.v.
• fâ la caritât loc.v.
• fâ la comunion loc.v.
• fâ la cort loc.v.
• fâ la fieste loc.v.
• fâ la fin dal gjat loc.v.
• fâ la forcje loc.v.
• fâ la fuee loc.v.
• fâ la gnot loc.v.
• fâ la gracie loc.v.
• fâ la orele loc.
• fâ la part loc.v.
• fâ la part dal leon loc.v.
• fâ la part dal so dovê loc.v.
• fâ la piel loc.v.
• fâ la plete loc.v.
• fâ la scusse loc.v.
• fâ la sô part loc.v.
• fâ la spese loc.v.
• fâ la stagjon loc.v.
• fâ la valîs loc.v.
• fâ la vite dal purcit loc.v.
• fâ la vôs gruesse loc.v.
• fâ la vuardie loc.v.
• fâ la vuere loc.v.
• fâ larc loc.v.
• fâ lavri loc.v.
• fâ lens loc.v.
• fâ leterature loc.v.
• fâ liendis loc.v.
• fâ ligrie loc.v.
• fâ lis bestiis loc.v.
• fâ lis bracis loc.v.
• fâ lis cjartis loc.v.
• fâ lis presentazions loc.v.
• fâ lis sumis loc.v.
• fâ lûc loc.v.
• fâ lunaris loc.v.
• fâ lusôr loc.v.
• fâ lusôrs loc.v.
• fâ mâl loc.v.
• fâ man basse loc.v.
• fâ man blancje loc.v.
• fâ maraveis loc.v.
• fâ marcje indaûr loc.v.
• fâ maron loc.v.
• fâ memorie loc.v.
• fâ miracui loc.v.
• fâ murî il flât intal cuel loc.v.
• fâ muse loc.v.
• fâ nons loc.v.
• fâ novitât loc.v.
• fâ numar loc.v.
• fâ odôr loc.v.
• fâ ombre loc.v.
• fâ ombrene loc.v.
• fâ onôr loc.v.
• fâ ordin loc.v.
• fâ orele di marcjadant loc.v.
• fâ panze loc.v.
• fâ par mût di dî loc.v.
• fâ par un dî loc.v.
• fâ part loc.v.
• fâ partence loc.v.
• fâ Pasche loc.v.
• fâ passâ la voie loc.v.
• fâ passâ par loc.v.
• fâ pecjât loc.v.
• fâ pene loc.v.
• fâ peraule loc.v.
• fâ pericul loc.v.
• fâ pesâ loc.v.
• fâ piel loc.v.
• fâ pissin loc.v.
• fâ place loc.v.
• fâ plasê loc.v.
• fâ plui mâl che ben loc.v.
• fâ pratiche loc.v.
• fâ prese loc.v.
• fâ presint loc.v.
• fâ pro loc.v.
• fâ puest loc.v.
• fâ rabie loc.v.
• fâ riflès loc.v.
• fâ rindi loc.v.
• fâ riviel loc.v.
• fâ riviel di stomi loc.v.
• fâ sac loc.v.
• fâ sagre loc.v.
• fâ saltâ i gnerfs loc.v.
• fâ sant Martin loc.v.
• fâ savê loc.v.
• fâ scuare loc.v.
• fâ scuele loc.v.
• fâ scufe loc.v.
• fâ sens loc.v.
• fâ sens di stomi loc.v.
• fâ servizi loc.v.
• fâ 'sisin loc.v.
• fâ specie loc.v.
• fâ spesis loc.v.
• fâ spic loc.v.
• fâ stâ in rie loc.v.
• fâ stât loc.v.
• fâ stomi loc.v.
• fâ storiis loc.v.
• fâ strade loc.v.
• fâ sù loc.v.
• fâ sù un pinsîr loc.v.
• fâ tant che la furmie loc.v.
• fâ tant di cjapiel loc.v.
• fâ tantis nainis loc.v.
• fâ tantis storiis loc.v.
• fâ tele loc.v.
• fâ tesaur loc.v.
• fâ test loc.v.
• fâ tiere di bocâi loc.v.
• fâ tiere di citis loc.v.
• fâ un afâr loc.v.
• fâ un cjâf come un cos loc.v.
• fâ un cjâf par ca loc.v.
• fâ un cûl par ca loc.v.
• fâ un o cul cûl de tace loc.v.
• fâ un pan di gras loc.v.
• fâ un pas indaûr loc.v.
• fâ un pas indenant loc.v.
• fâ un pas indevant loc.v.
• fâ un spieli loc.v.
• fâ un viaç e doi servizis loc.v.
• fâ une buse ta la aghe loc.s.f.
• fâ une ridade loc.v.
• fâ une ridade parsore loc.v.
• fâ une vite sole loc.v.
• fâ valê loc.v.
• fâ vignî gnot loc.v.
• fâ vignî i cjavei blancs loc.v.
• fâ vignî i cjavei drets loc.v.
• fâ vignî i sgrisui loc.v.
• fâ vignî il lat tai zenoi loc.v.
• fâ vignî il mâl di panze loc.v.
• fâ vignî il pêl dret loc.v.
• fâ vignî la aghe in bocje loc.v.
• fâ vignî la aghe tai zenoi loc.v.
• fâ vignî la aghegole loc.v.
• fâ vignî la barbe loc.v.
• fâ vignî la barbe lungje loc.v.
• fâ vignî ogni pêl un pan loc.v.
• fâ vignî ogni pêl un pan pe vite loc.v.
• fâ vignî sù il futar loc.v.
• fâ vignî sù il madron loc.v.
• fâ vignî sù la ostie loc.v.
• fâ visât loc.v.
• fâ vitis loc.v.
• fâ vitis di cjan loc.v.
• fâ voie loc.v.
• fâ voltâ il stomi loc.v.
• fâ vuere loc.v.
• fâ zirâ il cjâf loc.v.
• fâ ziruc loc.v.
• fâ zûc loc.v.
• fâle curte loc.v.
• fâle finide loc.v.
• fâle francje loc.v.
• fâle gruesse loc.v.
• fâle intor loc.v.
• fâle sot i voi loc.v.
• fâle sporcje loc.v.
• fâle tai bregons loc.v.
• fâle tai voi loc.v.
• fâle tignî loc.v.
• fâle viodi loc.v.
• fânt di pît e di cjaval loc.v.
• farine di fâ ostiis loc.v.
• fâse intor loc.v.
• fâse tai bregons loc.v.
• fâsi larc loc.v.
• fâsi strade loc.v.
• lâ a fâ in cûl loc.v.
• lâ a fâ mantiis di bocâl loc.v.
• lâ a fâ tiere di bocâi loc.v.
• lâ a fâ tiere di citis loc.v.
• lassâ fâ loc.v.
• mandâ a fâ in cûl loc.v.
• maniere di fâ loc.s.f.
• mût di fâ loc.s.m.
• no fâ nons loc.v.
• par fâle curte e dîle dute loc.av.
• sul fâ di lune loc.av.
• taiâsi i coions par fâi dispiet a la femine loc.v.
• vê a ce fâ loc.v.
• vê ce fâ loc.v.
• vê da fâ loc.v.

Proverbis:

• a brusâ lens verts, si fâs fum e no fûc
• a fâ bon pan, al vûl bon gran
• a fâ caritât, no si devente puars
• a fâ chel che no si devi, al ven chel che no si credi
• a fâ il cont cence l'ostîr, si fasilu dôs voltis
• a fâ il pas plui lunc de gjambe, si romp il cavalot
• a fâ pan i vûl levan
• a fâ un plasê, si cjape doi displasês
• a fasin simpri il mâl plui grant di ce che al è
• a fuarce di fâ, si impare
• a fuarce di grans di ue, si fâs un cuinç di vin
• a impaçâsi cui fruts, si fâs lis mans di mierde
• a ingomein i fruts che a fasin di umign, a ingomein i umign che a fasin di fruts
• a la ostarie si fâs il cont prin di lâ vie
• a preâ e altri ben no fâ, a cjadaldiaul no si fâs di mancul di lâ
• a Sant Blâs ogni gjaline l'ûf e fâs
• a volê fâ robe no bisugne vê pôre dal diaul
• a vuelin dôs robis par fâ stâ ben une cjase: predi e purcit
• a vuelin fats a fâ umign
• a vuelin siet umign a fâ une cjase, e baste une femine a strucjâle
• aghe e vidriûl si fâs vin par dut il Friûl
• aghe sante e tiere a fasin pantan
• aghe, diete e serviziâl fâs vuarî di ogni mâl
• al è bon no chel che al fevele ben ma chel che lu fâs
• al è mâl tant fâle che lassâle fâ
• al è miôr ricevilis che no fâlis
• al è plui gust a fâle che no a mangjâle
• al sa ben il signôr parcè che no ur à fat i dincj a lis 'savis
• al vâl plui un a fâ che no cent a comandâ
• al vûl che al fasi cui che al à man in paste
• al vûl inzen ancje a fâ la polente cul len
• al vûl lat a fâ formadi
• al vûl levan par fâ pan
• al vûl mistîr a fâ cuincîr
• altri al è il dî, altri al è il fâ
• amôr al fâs amôr, crudeltât lu consume
• ancje il mus si disgose par fâi un cjant a la morose
• ancje Març al scuen fâ lis sôs marçadis
• barbe ben savonade e je mieze fate
• bêçs fâs bêçs e nuie fâs nuie
• bisugne copâ chê gjaline che e fâs l'ûf e po lu bêf
• bisugne fâ ben par mâl
• bisugne fâ di necessitât virtût
• bisugne fâ il pas seont la gjambe
• bisugne fâ il salût seont il cjapiel
• bisugne fâ la barbe prin par se e po, se al vanze timp, ancje a chei altris
• bisugne fâ la cjalce seont il pît
• bisugne fâ la roste denant che e vegni la aghe
• bisugne lassâi fâ a chel che al è parsore dai cops
• bisugne pensâ prin di dî e prin di fâ
• bisugne rompi i ûfs se si vûl fâ la fertaie
• bisugne savê fâ il levan par vê bon pan
• buine bocje a fâs bon ardiel
• ce che al è just di fâ, bisugne fâlu e vonde, magari murî di fam
• ce che al è permetût di zovin, no si po fâlu di vieli
• ce che al fâs il Signôr al è dut ben fat
• ce che nol è bon par se, no fâjal a nissun
• ce che nol fâs il Signôr al fâs il sartôr
• ce che si po fâ vuê, no metii non doman
• ce che si sa, si fâs; ce che no si sa, si impare
• cence fature no si fâs nuie
• cence levan no si fâs pan
• cerviel al fâs cerviel
• chê che al da il Signôr si le puarte vulintîr, chê che si fâs di bessôi e je plui pesante di puartâ
• cjacaris no fasin lasagnis
• cjar e fâs cjar e jerbe a fâs mierde
• cjar viere e fâs bon brût
• cjase che si fâs in place o masse alte o masse basse
• clap che si môf nol fâs muscli
• cu la pazience il pedoli al à fat il zîr dal mont
• cu la pazience si fâs dut
• cualchi len al nas par indorâ, cualchidun par bati il mus e cualchidun par fâ coronis
• cuant che a 'nd è masse parons, si po fâ ce che si vûl
• cuant che a son fats i debits, lis surîs no ju mangjin
• cuant che al è di fâ ben no son, cuant che al è di fâ mâl no si sparagnin
• cuant che al è timp di fâ, fâs cence stâ a spietâ
• cuant che il mus nol à fate la code di trente agns, no le fâs altri
• cuant che il pari al fâs carnevâl, i fis a fasin cuaresime
• cuant che il paron al distude il lusôr, al fâs par dâje tal nâs al servidôr
• cuant che la gjaline e cjante, segn che e à fat l'ûf
• cuant che la piore e à fat il mâl, par chel che e vâl e crepe
• cuant che si dîs fasarai, si è sigûrs di no fâ mai
• cuant che si metisi a fâ cjapiei, e nas la int cence cjâf
• cuant che si vîf, si à di fâ in maniere che a vivin ancje chei altris
• cui al è par indorâ sants, cui par fâ sacodâi di mus
• cui bogns si fâs ce che si vûl, cui triscj miôr che si po
• cui centesims si fâs la svanzighe
• cui che al à bêçs di no savê ce fâ, che si meti a litigâ o a fabricâ
• cui che al à bêçs di no savê ce fâ, che si meti in lît o a fabricâ
• cui che al à çocs al po fâ stielis
• cui che al à fat il mâl che al fasi la pinitince
• cui che al à fat il mont al po disfâlu
• cui che al à la mescule in man al fâs la polente a so mût
• cui che al à pôc fîl che al fasi cjalçuts e no cjalcis
• cui che al à pocje tele che al fasi curte la cjamese
• cui che al à un sôl cjamp al fâs un ort, cui che al à un sôl fi al fâs un porc
• cui che al è usât a fâ il mâl, lu pense
• cui che al è usât a fâlis, lis pense
• cui che al fâs al fale, cui che al mene al strucje
• cui che al fâs al fale, cui che nol fâs al strafale
• cui che al fâs ben al à ben
• cui che al fâs ben al cjate ben e cui che al fâs mâl al cjate mâl
• cui che al fâs ben lu cjate
• cui che al fâs da se al fâs par trê
• cui che al fâs fabricâ al à bêçs in casse, cui che al fâs piturâ ind à di masse
• cui che al fâs il cont denant l'ostîr lu fâs dôs voltis
• cui che al fâs il mâl lu cjate
• cui che al fâs il prin al paie il bocâl di vin
• cui che al fâs il to mistîr no ti è mai amì
• cui che al fâs la fuesse pai altris al è il prin a lâ dentri
• cui che al fâs la robe no le mangje
• cui che al fâs lis leçs al à di rispietâlis
• cui che al fâs lis robis cun amôr al è un grant dotôr
• cui che al fâs marcjadanzie al fâs scuacarie
• cui che al fâs pezarie al mangje il so
• cui che al fâs robe al robe
• cui che al fâs une bausie si impegne a fânt cent
• cui che al paie debits al fâs capitâi
• cui che al po fâ vuê che nol spieti doman
• cui che al prepare la buse pai altris se fâs par se
• cui che al robe nol fâs robe
• cui che al sa fâ al sa ancje comandâ
• cui che al sa fâ la cite al sa fâ ancje il mani
• cui che al va e torne al fâs bon viaç
• cui che al vinç se stes al fâs une grant vitorie
• cui che al vûl fâ ce che nol po al cjate ce che nol vûl
• cui che al vûl provâ lis penis dal infier che al fasi di Istât il fari e il cjaradôr di Invier
• cui che di lunis nol fâs tant che di domenie nol è nassût di buine femine
• cui che ju fâs che sai nici
• cui che ju fâs no ju mangje e cui che ju mangje no ju fâs
• cui che le fâs le spiete
• cui che le fâs pai altris le fâs par se
• cui che lis fâs, lis dismentee
• cui che lis pense lis fâs, cui che lis fâs lis pense
• cui che no lis à fatis di carnevâl lis fâs di cuaresime
• cui che no lis fâs di zovin lis fâs di vieli
• cui che no lis fâs in chest mont i tocje di fâlis in chel altri
• cui che nol fale nancje nol fâs
• cui che nol fâs cuant che al po, daspò nol po fâ cuant che al volarès
• cui che nol fâs il grop al piert il pont
• cui che nol fâs prin al fâs daspò
• cui che nol sa fâ nol sa nancje comandâ
• cui che nol scomence nol fâs nuie
• cui che nol ten cont dal centesim nol rive a fâ il solt
• cui che plui al dîs mancul al fâs
• cui che si scuse cence jessi interogât al fâs clâr il so pecjât
• cui che si svante dal ben fat al piert il merit
• cui che tal fîl nol fâs il grop al piert il pont
• cui cjamps si fâs la cjase, nome cu la cjase si mangje i cjamps
• cui grans si fâs il stâr
• cui le fâs, cui le cjate fate e cui le disfe
• cui no le capìs, cui nol vûl capîle e cui fâs di no capîle
• cui triscj bisugne fâ miôr che si po, cui bogns si fâs cemût che si vûl
• cuintri torints e potents no sta fâ laments
• cul bon fâs ce che tu vûs, cul trist ce che tu pûs
• cul bon vin si fâs bon asêt
• cul fâ lavorâ si va in malore
• cul fâ plasês tu cuistis amîs, cul dî il vêr nemîs
• cul fâ si fale e a fuarce di falâ si impare
• cul fâ si fale e cul falâ si impare
• cul timp si fâs dut: ancje il mont al è fat un pôc par volte
• cun nuie no si fâs nuie
• cun trops pôcs si fâs un grum
• cuntun len sôl no si fâs fûc
• da la plui grant montagne al ûf de ruie, ce che tal mont al è fat, nol è par nuie
• daspò cene une prese di tabac e fâs la plene
• daspò fat ognidun al da consei
• daspò fat ognidun al sa fâ
• dî di no e fâ di sì
• dî e no fâ al è tant che tasê
• di une çocje di vuar no si po fâ lum
• dije a la femine e lassii fâ al diaul
• dispès il diaul al insegne a fâlis ma no a platâlis
• Diu al è chel che al à fat ancje il mani des cjariesiis
• Diu al lasse fâ
• Diu al sa ben parcè che no ur à fat i dincj ai crots
• Diu ju fâs po il diaul ju compagne
• Diu ju fâs po ju compagne
• Diu mieze zornade le passe a fâlis, e chê altre mieze a dâlis
• doi pôcs e un nie a puedin bastâ a fâ siôrs
• dome cu la farine no si fâs pan
• domenie di ulîf ogni uciel al fâs il nît
• dongje dal stran no stâ fâ fûc
• dôs feminis e une ocje a fasin un marcjât
• ducj i sants no fasin miracui
• dûr cun dûr no si fâs mûr
• dûr cun dûr nol fâs bon mûr
• dut si fâs pe fabriche dal pitic
• e je une grant fadie a fâ il siôr e cence vê nie
• e vûl tele a fâ cjamesis
• erôr nol fâs paiament
• fâ ben e lassâ dî
• fâ ben par mâl
• fâ dì dal dì e gnot de gnot
• fâ e disfâ al è dut un lavorâ
• fâ e disfâ e je dute vore
• fâ e disfâ, si impare a lavorâ
• fâ il mistîr dal Michelaç: mangjâ, bevi e lâ a spas
• fâ justizie al è scomençâ une buine strade
• fâ, savê fâ e dâle di intindi a son lis trê colonis dal mont
• fami fatôr un an e se no mi fâs siôr, gno dam
• farine blancje a fâs bon pan, tiere nere e fâs bon gran
• fâs ai altris ce che tu volaressis fat a ti
• fâs ce che tu âs di fâ e lis cjacaris de int no stâ abadâ
• fâs e tâs
• fâs il ben cence cjalâ a cui
• fâs il ben e lasse dî
• fâs un pas a la volte e va lontan
• fâs vuê ce che tu varessis di fâ doman
• fasarai al è fradi di no fâ mai
• fat il trente si po fâ ancje il trenteun
• fate la gracie si à in cûl il sant
• fate la leç, pensade la malizie
• fate la leç, pensât l'ingjan
• fieste pe setemane e fâs la panze sclagne
• gjaline rosse e fâs bon brût
• gjaline trepule e fâs un ûf in dì
• gjaline viere a fâs bon brût
• gjaline viere no fâs ûfs
• i bogns che a vadin in paradîs in tiere no si sa ce fâ di lôr
• i debits che si fâs par bondance, si ju paie par cjaristie
• i debits no si ju paie in chê dì che si ju fâs
• i grancj umign a fasin i grancj fats
• i lens verts a fasin fum
• i litighents a fasin il past e i avocats lu mangjin
• i scherçs a vuelin fats a timp e lûc
• i umign a fasin la robe ma la robe no fâs i umign
• i viei a vuelin che ancje i zovins a fasin come lôr
• i vûl inzen a fâ la mignestre cul len
• i vûl saût a fâ scliçots
• il baraç nol fâs fîcs
• il baraç nol fâs narançs
• il ben al sta cun cui che al fâs ben par mâl
• il ben che si fâs al vignarà ricompensât
• il benefici nol à di sei fat par fuarce
• il bon i crôt a ducj, il trist al fâs ducj come lui
• il bon marît al fâs buine la muîr
• il centesim al è piçulit ma a sparagnâlu al fâs profit
• il ciroic dulinciôs al fâs la plaie verminose
• il clap che nol fâs muscli al è un mâl clap
• il cristian al à di fânt di ogni man
• il dî nol va cul fâ
• il diaul al insegne a fâ lis pignatis ma no i tapons
• il diaul nol è mai tant brut che lu fasin
• il diaul nol è mai tant neri che lu fasin
• il fum si viôt dulà che a fasin fûc
• il jet cjalt al fâs la mignestre frede
• il jet no si lu fâs par durmî une sole sere
• il mâl al sta cun cui che al fâs mâl par ben
• il mâl nol è mai tant grant che si lu fâs
• il mani de pale al fâs piâ judizi
• il martar là che al sta nol fâs dam
• il miedi e il speziâr a puedin fâ grant mâl
• il miedi e il speziâr di inzen a puedin fâ gran ben
• il mistîr dal matrimoni plui si lu fâs e plui si lu dispare
• il mulinâr al met il Signôr difûr par che nol viodi ce che al fâs dentri
• il mus che nol à fat la code di trente agns no le fâs plui
• il pôl nol fâs fîcs
• il pôl nol fâs narançs
• il pôl nol fâs pomis
• il prin an di matrimoni o che si inmalisi o che si fâs un coni
• il prin miâr di florins al è dificil di fâ, chei altris daspò a vegnin bessôi
• il semenâ tart se al fâs bon prodot e je une sorte
• il servidôr al à di fâ ce che il paron al comande
• il Signôr al sa ce che al fâs
• il Signôr ju fâs e il diaul ju compagne
• il Signôr prin ju fâs e po ju compagne
• il stupit al fâs il mâl par ridi
• il vin al fâs bon sanc
• il violìn che al fâs la danze si cognòs ce sun che al à
• in cjase plene si sta pôc a fâ di cene
• in miezore si impare a fâ i siôrs
• intric al strolic a fâ lunaris
• l'abit nol fâs il frari
• l'amôr ind fâs fâ di ogni colôr
• l'ignorant al fâs il mâl par ridi
• l'insult al è di cui che lu fâs e no di cui che lu ricêf
• l'om al fâs la robe, po la robe e fâs l'om
• l'om che nol lavore al impare a fâ mal
• l'om che si fâs piore il lôf lu mangje
• l'onôr nol fâs bulî la cite
• l'ûf fat e bevût al vâl un scût, l'ûf fat e mangjât al vâl un ducât
• l'ultin vistiari nus al fasin cence sachetis
• la aghe no fâs magle
• la asenade e je di cui che le fâs e no di cui che le ricêf
• la bolp no fâs mai mâl là che e à la tane
• la buine cjar e fâs putrope sbrume
• la buine femine a fâs la cjase, la triste le disfâs
• la buine muîr a fâs il bon marît
• la cjase che a fâs caritât no larà mai in malore
• la cjase dai contents e je ancjemò di fâ, e no cjatin claps di fabricâ
• la cjase dai contents e je di fabricâ e nissun no le rive adore di fâ
• la cjavre che no fasi vuere cul leon
• la cjavre no po fâ vuere cul leon
• la coce in siorie e fâs plui sunsûr
• la compagnie a fâs fâ trop
• la dibisugne a fâs l'om lari
• la dibisugne a fâs l'om mestri
• la dibisugne e fâs l'om inzegnôs
• la etât a fâs l'om
• la fam e fâs dolç l' amâr
• la femine daben e fâs la cjase, la femine mate le disfe
• la femine e fâs l'om
• la femine e fâs l'om o pûr lu disfâs
• la frascje biele no fâs buine la ufierte
• la galere e la preson no fâs mai nissun di bon
• la gjaline e cjante co e à fat l'ûf
• la ligrie bisugne fâle in famee
• la ligrie e fâs armonie
• la lune ur fâs lusôr ai laris e ai inamorâts
• la mari dalose e fâs la fie pedoglose
• la miserie a fâs fâ trop
• la miserie a fâs tristerie
• la miserie e la necessitât a fasin l'om lari
• la muart e fâs ducj compagns
• la necessitât e fâs l'om inzegnôs
• la necessitât e fâs l'om mestri
• la necessitât e fâs la industrie
• la nêf daspò Nadâl no fâs solâr
• la nêf denant Nadâl e fâs solâr
• la ocasion e fâs l'om lari
• la ocasion e fâs l'om mestri
• la peraule e fâs l'om
• la piore no po fâ vuere cul leon
• la preson no fâs mai nissun di bon
• la prime digjestion si le fâs in bocje
• la prime volte si po fâje al pari eterni
• la robe no je di cui che le fâs ma di cui che le gjolt
• la robe si fâs lavorant e si disfe zirandolant
• la trope confidence e fâs mancjance di rispiet
• la union e fâs la fuarce
• la vacje dal puar e crepe e chê dal siôr ind fâs dôs
• la vacje nere e fâs il vidiel blanc
• la vilanie e je di chel che le fâs, no di chel che le ricêf
• la vore fate ben nissun domande cetant timp che si à stât a fâle
• lasse che a disin ce che a vuelin e fâs ce che al va ben
• lasse che cui che al sa a ce fâ si distrighi
• lasse che e cjanti la ciale, tu fâs come la furmie
• lasse lis feminis che a fasin pan, fruts e lissie
• lassimi puare, ti fasarai ric
• libri sierât al fâs l'om leterât
• lis belecis a fasin plui biel
• lis cjacaris lungjis a fasin la gnot curte
• lis disgraciis a fasin fâ trop
• lis disgraciis no fasin bon bevi
• lis feminis a fasin la code di cjaval par no someâ vacjis
• lis robis fatis di gnot, si lis viôt di dì
• lis robis fatis in presse no valin une vesse
• lis scarpis si fasilis su la forme
• lis vacjis si fasin la une la altre
• mai fâ mâl cu la sperance di vê ben
• mâl no fâ, pôre no vê
• mâl si fâs, mâl si pense
• mats, feminis, paron, timp e cûl fâs ce che al vûl
• miedi pietôs al fâs la plaie puçolente
• mierde montade in scagn o che a puce o che a fâs dam
• mignestre riscjaldade a fâs dolôr di panze
• miôr une robe fate che no cent di fâsi
• miserie a fâs industrie, industrie a fâs bondance, bondance a fâs massepassudance e massepassudance a torne a fâ miserie
• miserie a fâs miserie
• muart un pape si 'nt fâs un altri
• nancje il mont nol è stât fat dut intune dì
• necessitât e fâs virtût
• nissun nol è deventât mai puar par fâ caritât
• nissun nol è obleât di plui di chel che al è tignût a fâ
• nissun nol fâs miracui
• nissun nol va a cirî par fâ caritât
• no bisugne fâ il diaul plui neri di ce che al è
• no bisugne fâlis, par che no saltin fûr
• no bisugne fâsi fâ gole de robe a bon marcjât
• no bisugne mai fâ confronts
• no fâ mâl cun sperance di vê ben
• no fâs mâl la cualitât ma la cuantitât
• no je mai fate la leç che pensât nol sei l'ingjan
• no mai fâ un mûr se si viôt un clap cu la ponte infûr
• no si à di fâ caritât cu la robe dal comun
• no si fâs il tet par une sole ploie
• no si insegnii a fâ l'ûf a la gjaline
• no si paie i debits in chê dì che si ju fâs
• no si po fâ di Crist e bati batecui
• no si po fâ pan cul brût dal ledan
• no si po nudrî e fâ formadi
• no si po vendi il lat e fâ formadi
• no stâ fâ il mâl se no tu vûs sei odeât
• no stâ fâ mâl cun sperance di vê ben
• no stâ fâ mâl se tu vûs vê ben
• no stâ fâur ai altris ce che no ti pâr bon a ti
• no stâ fâur ai altris ce che no tu vûs che ti fasin a ti
• no stâ insegnâi a fâ l'ûf a la gjaline
• no vûl grant fadie a fâ il coion
• nol baste vê reson, bisugne fâle intindi
• nol mûr mai chel che al à fat la robe che nol sedi nassût chel che al à di mangjâle
• nome cun gaine no si fâs nuie
• nûl e cûl al fâs ce che al vûl
• nule vie nule al fâs nule
• o vin di fâ come i cops che si dan di bevi un cul altri
• ogni biel bal al stufe, ogni bon pan al fâs la mufe
• ogni biel zûc al stufe, ogni bon pan al fâs la mufe
• ogni farine no je buine par fâ ostiis
• ogni jerbe e fâs la sô semence e ogni len la sô pome
• ogni zocul al à di fâ il so sgrip
• ogni zocul al fâs il so salt
• ognidun al po fâ ce che al vûl
• ognidun che al fasi ce che al po
• ognidun che al fasi il so mistîr
• pachis di mari no fasin bote
• par che al sedi bon il cafè a vuelin trê robis: cualitât, cuantitât e savêlu fâ
• par comandâ si à di savê fâ
• par fâ bêçs no bisugne vê pôre dal diaul
• par fâ bisugne scomençâ
• par fâ il fat so ognidun al è bon
• par fâ il predi al covente: orele di marcjadant, bocje di purcit e schene di mus
• par fâ lis fotis nol è mai masse tart
• par fâ pan i vûl farine e levan
• par fâ robe al vûl levan
• par fâ une fote al è simpri timp
• par grande che e sedi la çocje a fuarce di fâ setiç si consume
• par nuie nissun nol fâs nuie
• par podê ben comandâ, bisugne savê fâ
• par un soldât no lassin di fâ vuere
• peraulis e blestemis no fasin pôre
• plui si è, mancul si fâs
• pluitost di fâi ben a un vilan, spuditi te man
• preâ e ben no fâ, al è tant che blestemâ
• prin di fâ e di dî bisugne pensâ ce che al po vignî
• prin di lâ a cjoli il purcit, si à di fâ il cjôt
• putrops pôcs a fasin un trop
• robe e fâs robe e mierde a fâs mierde
• Sant Blâs il frêt al fâs la pâs
• Sant Blâs ogni gjalinate e fâs
• Sant Blâs se al cjate glace le disfâs, se no 'nt cjate ind fâs
• Sant Martin al fâs il so fin
• Sant Valantin al fâs il malefin
• se a 'nt fos, se a 'nd ves, se a 'nt sarès a son trê sants che no fasi miracui
• se il mus nol à fat la code di vincj agns, no le fâs plui
• se no si à la crôs, si le fâs di bessôi
• se no si capìs che si à di volêsi ben in chest mont, no si capìs ce che si è vignûts a fâ
• se no si po fâ come che si volarès, si scuen fâ come che si pues
• se no tu vûs che lis sepin, fâs di mancul di fâlis
• se si met a fâ cjapiei, la int a nas cence cjâf
• se si po fâ une once di ben, si à di fâlu
• se tu fâs ce che ti dîs, tu larâs in paradîs; se tu fâs ce che o fâs jo, no tu vâs ni tu ni jo
• se tu fasis debits tu cuistis parons, se tu fasis credits tu pierdis amîs
• se tu vûs ben, fasilu
• se tu vûs vê ben, fasilu
• se Zenâr nol zenare e Fevrâr nol fevrare, Març mâl al fâs e mâl al pense
• si à di fâ la roste prin che a vegni la aghe
• si fâs ce che si po
• si fâs ce che si pues e no ce che si volarès
• si fâs e si dîs e la muart e tire pai pîts
• si fâs e si tâs
• si lis pense di sincîrs e si lis fâs di cjocs
• si scuen fâ di necessitât virtût
• si sta pôc a fâ di cene cuant che la cjase e je plene
• si sta pôc a fâ il pan cuant che al è il levan
• sintî ducj e po fâ a so mût
• soç e mont a fasin il cûl taront
• sporc e mont a fasin il cûl taront
• sta cul to avuâl se tu vûs fâ bon carnevâl
• tâl si fâs, tâl si spiete
• tal ultin tabâr no fasin sachetis
• tic tac, al fâs il cjaliâr; finît di ticâ, finît di mangjâ
• tiere nere a fâs bon pan, tiere blancje e fâs ledan
• tiere nere e fâs bon gran, farine blancje a fâs bon pan
• tiere nere e fâs bon gran, tiere blancje a lasse murî di fam
• tiere nere e fâs bon gran, tiere blancje e fâs murî di fam
• tiere rosse e fâs bon gran, tiere blancje a lasse murî di fam
• tiere sante e aghe sante a fasin pantan
• trê fumatis a fasin une ploie
• trê pâi a fasin la forcje
• trê ploiis a fasin une montane
• tu fâs ce che tu puedis e lassii a Diu cure dal rest
• ultin di carnevâl al po fâlu cualunche basoâl
• un biel viodi al fâs bon crodi
• un cjâf cence lenghe al è nome di fâ brût
• un disordin al fâs un ordin
• un flôr nol fâs Primevere
• un len sôl nol fâs fûc
• un mat ind fâs cent
• un pecjât fat int une ore, in cent agns no si ripare
• un pôl nol fâs narançs
• un sterp al fâs plui sortis di nolis
• une biele scarpe a fâs une biele çavate
• une cisile no fâs istât
• une ete le fâs e une ete le mangje
• une sole cocule no fâs sunsûr
• une volte parom si scuen fâle ducj
• zunâ e altri ben no fâ, a cjase dal diaul no si lasse di lâ