mût
mût
[FO]
-
s.m.
forme o maniere che al à un ciert fenomen intal manifestâsi o intal davuelzisi, o che si à tal fâ alc:
al fissave la none che si tignive sù drete. Un mût di puartâ la persone ereditât de sô int (Maria Forte, Cjase di Dalban);
e veve un mût sdavàs e sflacjon di movisi e di cjaminâ (Carlo Sgorlon, Il dolfin);
usancis alimentârs coretis […] a son essenziâls par vivi in mût san e par prevignî tantis malatiis (Guglielmo Pitzalis, Metiti in moto!)
Sin. fate
, maniere
Var. môt
-
s.m.
ancje tal pl., maniere di tratâ cun chei altris:
al saveve benon i mûts e i argoments par jentrâ te simpatie de int (Carlo Sgorlon, Ombris tal infinît);
se us domandin un sclariment tant che a usin i fruts [ur disês]: "Vaitmi in mone!". Isal mût? (Meni Ucel, Tirâ sù fruts);
a vevin olsât, ancje masse! E cun ce mûts e cun ce fevelâ sbocjât! Tant al è vêr che jê e veve finît par dispreseâ ducj i oms (Roberto Ongaro, Cretevierte)
Sin. maniere
-
s.m.
pussibilitât, ocasion o vie par rivâ a di un fin:
Rico […] al cjatave il mût di viodile simpri (Pieri Somede dai Marcs, Nadâl);
ducj cuancj a colavin dentri une debilece tremende di intelet, e nol jere mût di fâju resonâ (Carlo Sgorlon, Il dolfin)
Sin. metodi
, mieç
, sisteme
, strade
, vie
-
s.m.
[TS]
gram., ling.
massime intes lenghis indoeuropeanis, categorie dal verp che e definìs la posizion e la intenzion di cui che al fevele in rapuart a ce che si dîs:
l’acent curt al va metût tai verps polisilabics […] di prime persone plurâl, mût indicatîf, timp presint (Fausto Zof, Cors di lenghe furlane)
-
s.m.
[TS]
mus.
massime inte musiche greghe antighe e intes composizions de Ete di Mieç, sucession di tons e semitons organizade daûr dal principi di modalitât:
il cjant tradizionâl furlan plui carateristic al è di sigûr la vilote, une vore antîc, formât di plui vôs (polifonic) e che al dopre in maniere esclusive il mût maiôr (Walter Colle, Musiche furlane)
-
s.m.
[TS]
st.mus.
inte notazion mensurâl doprade dal secul XIV al XVII, rapuart jenfri i valôrs di durade segnâts intes figuris
-
s.m.
[TS]
let., art
stîl, forme espressive tipiche di un autôr, di une scuele e v.i.:
l'autôr al è un pitôr no cognossût che al va daûr dai mûts di Zuan Pauli Thanner, de scuele che si riferìs a Pelegrin di Sant Denêl (Aministrazion Publiche, Cjarpenêt - Glesie di Sant Michêl in Cimitieri)
Polirematichis e espressions idiomatichis
Proverbis:
- a cui che al fâs a so mût, no i dûl il cjâf
- i testarts le vuelin simpri a lôr mût
- il cûr al resone a so mût
- madone e brût: ognidune a so mût
- mangjâ a mût so e vistî a gust gno
- mangjâ a mût so e vistîsi a mût dai altris
- mangje a mût to e vistìs a mût dai altris
- ognidun le pense a so mût
- vistî a mût di chei altris, mangjâ a mût so