Dizionari de Lenghe Furlane

maniere  /-iè-/  ma|nie|re  [FO]

1. s.f. mût particolâr di fâ, di operâ:  Turolt al à simpri savût esprimi in maniere fuarte e profonde la anime furlane contadine, semplice e puare (Adrian Cescje, Memoriis di politiche linguistiche); si pues imparâ lis lenghis in tantis manieris (Franc Fari, Il cjâf dai furlans); par cualchi an lui no si jere sintût plui un fantat di campagne, ma chê maniere di jessi i jere restade dentri vie (Agnul di Spere, Il puint de ledre); la Apocalìs, riprodusude in maniere straordenarie tal puarti de Glorie de basiliche di Sant Jacum (Antoni Beline, Sant Jacum, là che al finìs il mont)
   Sin. fate , forme , metodi , mût , sens , strade , vie
   Var. magnere
   
   1. mût just e coret di fâ alc:  e à lassade di bande la sudizion e si è metude a direzi dut l'andament de cjase, cuntun grum di maniere e di sintiment e ancje di risoluzion (Josef Marchet, Lis predicjis dal muini)
   2. ancje in esclamazions o domandis retorichis par cridâ o criticâ:  ise maniere di tratâsi fra cristians chê? (Josef Marchet, Lis predicjis dal muini); ma insome, parcè barufaiso in famee! E po, ise maniere di sberlâ chê! (Alan Brusini, Amîs come prime)
2. s.f. ancje tal pl., mût particolâr di compuartâsi viers chei altris:  modest e bon, al rispuindeve cun buine maniere, se i direzevin cualchi domande (Zuan Lurinçon, La Madalene); la polizie, cirint di mandâ vie dai zovins che si jerin sentâts sul pedrât e dopre lis manieris fuartis cun cjariis e dant jù manganeladis (Fabian Ros, Il fotogram mancjant. Un Friûl cence memorie storiche audiovisive)
   Sin. condote¹ , contegn , educazion , fâ , mût di fâ , puartament
   
   1. forme di compuartâsi creançose e rispietose:  la infermiere, tratantsi di gjavâsal di intorsi, e veve jemplade une tace e, cu la pocje maniere di simpri, je veve metude tes mans e lu veve sbruntât fûr (Franca Mainardis, Aiar di cjase)
      Sin. creance , buine creance , buinegracie , degnevolece , zentilece
3. s.f. [TS] art pratiche artistiche che e je imitazion e ripetizion di modei aromai banâi, che e pant mancjance di invenzion:  lis figuris a àn une ande di artefat, espressions di maniere, puartaments studiâts (Giovanni Battauz, Flavio Cossar, Renato Iacumin, I mosaics de basiliche di Aquilee)
   Sin. manierisim

Polirematichis e espressions idiomatichis

• di maniere che loc.coniun.
• di maniere di loc.coniun.
• fâ in maniere loc.v.
• maniere di fâ loc.s.f.
• mût e maniere loc.s.m.

Proverbis:

• a son trê manieris di vivi: vivi par mangjâ, mangjâ par vivi e vivulâ
• cuant che si vîf, si à di fâ in maniere che a vivin ancje chei altris
• si robe in tantis manieris