Dizionari de Lenghe Furlane

sens  /-è-/  sens  [FO]

1. s.m. facoltât dal organisim dal sintî, di percepî, di ricevi impressions di bande di stimui che a vegnin dal difûr:  il mesteir mi judave a tirâ indenant, ma il gno cjâf al stave sot aghe e nissun sens al rivave a sintî ce che al sucedeve ator (Stiefin Morat, Kebar krossè); ogni mio sens a consolâ mi sint, / e voi in dolç delicui in chel instant (Ermes di Colorêt, I, 64); contempli la armonie, la misure, / che regne inte nature… / oh, spetacul imens! / che al sbalordìs e che l'inalce i sens (Pieri Çorut, La gnot dei muarts)
   Sin. sintiment
2. s.m. tal pl., fisicitât e massime tai siei aspiets edonistics o sessuâi:  siums e scuviertis che a sclopin, cul zirâ plui imburît dal sanc, a baticûr, tun tarlupâ di fantasiis vivis e di sens turbits e gnûfs (Dino Virgili, La aghe da pît la cleve); Colâts tes lôr mans. / Ce che nus fasin, / Belen, no stâ jodi. / No la sperance, Belen, / ma une lungje gnot di sens (Otmar Mainardis, In tanache)
   Sin. cjar² , cuarp
3. s.m. impression che e prodûs un fastidi o une reazion di riviel:  jê e je propit de bande dal cimitieri, e i fâs câs. […] «Par plasê ti displasial di passâ ca di ca? A mi mi fâs sens …» (Meni Ucel, Misure)
   Sin. fastidi , nausie , ingomut , riviel , stomi , volt di stomi , impression
4. s.m. mût di stâ, percezion che si à dal propri fisic o de proprie psiche e des sôs cundizions, ancje in maniere no tant definide:  un sens di stracherie disgotade un fregul a la volte (Dino Virgili, La aghe da pît la cleve); in cûr un sens di vite plene, di ligrie profonde (Pieri Somede dai Marcs, O sielç lis stelis)
   Sin. sintiment
   
   1. mût di stâ produsût di une percezion di alc di esterni:  i paisuts, cun chês puaris cjasis grisis, […] a fasin un sens di miserie, di antigaie, di frêt, di aviliment (Josef Marchet, Il cjanâl vistût di blanc)
5. s.m. (fig.) percezion ben disvilupade e specifiche, che e permet di capî, fâ, compuartâsi intune cierte maniere e v.i.:  la unitât taliane, imbastide dopo de metât dal '800, e veve di jessi implantade […] cuntun fregul di inteligjence e di sens pratic (Josef Marchet, Chê biade unitât); il Martini al dimostre di savê dominâ il spazi e di vê un grant sens de struture architetoniche (Bepi Agostinis, Storie de art in Friûl)
   Cfr. sensibilitât
6. s.m. ce che al ven comunicât, ce che al vûl dî un messaç, une peraule:  il sens origjinâl de peraule "mafie" par furlan al jere chel di jessi contents e sodisfats di se stes (Sandri Carrozzo, Piçulis storiis di mafie furlane); radio "furlaniste", tal sens di difese de identitât e de lenghe, ma no localiste, tal sens di sierâsi intun cjanton par no viodi lis diferencis e lis novitâts (Max Mauro, Un Friûl difarent: i 90 mhz di Onde Furlane)
   Sin. significance , significât
   
   1. reson, fin o impuartance che si viôt intun compuartament, intun at o ancje intun fat, intune situazion, intune realtât e v.i.:  no vin fat un pas plui indevant par capî a ce che al servìs jessi in chest mont, par capî il sens de vite (Francesc Placerean, Il popul furlan al à ancjemò nostalgjie des robis bielis e santis); ce sens aial vuê fâ poesie? (Walter Tomada, Pierluigi Cappello: «L’om plui concret? Il poete»)
7. s.m. direzion di moviment o di une forme:  par tiere si viodevin dôs o trê filis di tancj mieçs cerclis lassâts dai stecs des scovis di sanzit: une file intun sens, une file ta chel altri (Lucio Perès, Vilie di fieste)
   Sin. direzion , viers
   
   1. (fig.) prospetive di evoluzion di un fenomen, di une dinamiche e sim.:  cirî di lâ, dulà che al è pussibil, tal sens de unitât grafiche de lenghe (Xavier Lamuela, La grafie furlane normalizade)

Polirematichis e espressions idiomatichis

• fâ sens loc.v.
• fâ sens di stomi loc.v.