Dizionari de Lenghe Furlane

cjar²  cjar  [FO]

1. s.f. part muscolâr dal cuarp dal om e dai animâi:  al sbarà doi colps a curte distance e milante balins a jentrarin te cjar di Febo che al murì al istant intun lâc di sanc cjalt (Checo Tam, Domenie di cjace)
   
   1. ancje tal pl., aspiet esteriôr dal cuarp, dât de piel e de tonicitât dai tiessûts:  lis plaiis dal so cuarp a scomençarin alore a sierâsi, e lis scaiis come chês dal pes a colavin jù lassant la cjar netade che e tornave frescje e colôr di rose (Catarine Percude, I viars di sant Jop); e à i siei anuts ma e à simpri bielis cjars (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. ciere
   2. il fisic, il cuarp in gjenerâl, la salût fisiche:  al jere scjassât di une tossite simpri plui secje e cumò al scombateve ancje cuntune fieresine che i consumave la cjar (Maria Forte, Cjase di Dalban); il cont ju slavinave di botis cu la scorie disint che la cjar dal puar no dûl (Alan Brusini, Chei de vuere dal '15)
2. s.f. part muscolâr che si mangje, in câs ancje cun altris tiessûts o ben in oposizion a altris tiessûts, des bestiis maçadis:  la ostarie ingrandide trê voltis cun tavernis saldo plenis di int a mangjâ la cjar su la gridele, cinc fantatis a siervî in taule, simpri il vin miôr, un puart di mâr (Alan Brusini, Par stradis lungjis); al podeve mangjâ tant che al voleve. Cjar, cjar e cjar, cussì grasse che e faseve un dêt di cuince parsore dal brût (Maria Forte, "Nossent"); cjar e pes a furnissin proteinis di alte cualitât e ancje fier (Guglielmo Pitzalis, Mangje san 3)
   Sin. cicin , cicine , cjarnam , cjarnum , polpe
   Cfr. magri , gras , stielôs , sfiliôs , tenar , dûr , verzelât , patît , fresc¹ , pastiçât , stofât , rost , svuacet , specetin , bisteche , tai , luianie , muset , socol , salam , persut , sopresse , mortadele , filet , cueste , talpin , purcitâ , robe insacade , vidiel , manç , vacje , bo , taur , agnel , piore , cjavret , cjavre , monton , poleç , gjaline , gjal , raze¹ , masurin , ocje , salvadi , fasan , jeur , cenglâr , cjavrûl , cierf , purcit
3. s.f. (fig.) complès dai aspiets materiâi e animâi de persone, in oposizion al spirt:  un vueit, o dîs, che al po rivâ a la disperazion. Dentri, anime e cjar a berlin il so dirit di jessi (Gianni Gregoricchio, Trê feminis)
   Sin. cuarp
4. s.f. (fig.) cuarp intindût tant che sogjet e ogjet sessuâl:  lis tentazions, lis debilecis, i plasês de cjar; al è un an e mieç che jo ti ai dât dut, tu tu âs cognossude la mê cjar… ma tu no tu mi âs dât il tô cûr (Pieri Somede dai Marcs, Un pugn di moscjis)
5. s.f. (fig.) cuntun possessîf, i fîs, i dissendents:  o volarès, jo, che tu vessis provât, cuant che i fîs a son malâts e che si scuen puartâ la sô cjar tal cimitieri, e il cûr al sclope (Maria Forte, La fie çuete)
   Sin. cjar de so cjar
   
   1. ce che si sint propri come se al fos une part dal cuarp:  la Cleve antighe e jere mo dute lôr, dai Batistons, cjar lôr (Dino Virgili, La aghe da pît la cleve)

Polirematichis e espressions idiomatichis

• cjar crete loc.s.f.
• di cjar e di vues loc.adi.inv.
• fâ cjar loc.v.
• in cjar loc.adi.inv., loc.av.
• in cjar e in vues loc.adi.inv.
• in cjar e vues loc.adi.inv.
• ni cjar ni pes loc.

Proverbis:

• al vîf tant il jeur a jerbe che il lôf a cjar
• cjan nol mangje cjar di cjan
• cjar che e cres no po sta ferme
• cjar di cûl no va in cîl
• cjar di sbîr trê bêçs la lire
• cjar di vedran no le vûl nancje il cjan
• cjar e fâs cjar e jerbe a fâs mierde
• cjar fumade no va di mal
• cjar in mostre no si compre mai
• cjar lavade e piert il savôr
• cjar viere e fâs bon brût
• cuant che la cjar e devente fruste, ancje la anime si juste
• cui che al mangje cjar di pic nol devente ric
• cui che al vûl cjar che al ledi in becjarie
• cui vîf su la cjar muarte, cui sun chê vive, cui sun chê rabiose
• fra cjar e ongule no stâ lassâti ponzi
• i fasûi a son la cjar dai puars
• la buine cjar e fâs putrope sbrume
• la cjar che e mene no sta mai ferme
• la cjar cul lavâle e piert il gust
• la cjar dal vedran no le mangje nancje il cjan
• la cjar e ven buine cuant che e je frole
• la cjar plui cjare e je chê di vacje
• la miôr cjar e je chê ator dal vues
• mai mangjâ i piçs par voie di cjar
• ni par bondance ni par cjaristie no reste la cjar in becjarie che il cjan o il gjat le puartin vie
• no cjar di becjarie, no fantate di ostarie
• no je cjar cence vues
• no je mai vanzade cjar in becjarie che par lire o prionte no si dedi vie
• no stâ mangjâti i dêts par voie di cjar
• o sin ducj di cjar