Dizionari de Lenghe Furlane

dûr  dûr  [FO]

1. adi. che al resist a pression, tai, incision e deformazion:  la neif a è deventada dura, a criça sot i peis (Novella Cantarutti, Un pari da conossi); no poltronis ergonomichis… mi plasin lis cjadreis di len dûr (Checo Tam, Kalundborg); [mans] grandis e disformadis dal lavôr, cui cai dûrs tant che capelis di claut e cu lis venis gruessis tant che vuarbisinis (Roberto Ongaro, Il muc)
2. adi. pôc elastic, fof e v.i.:  [dopo operâts tal cjâf dal femur] doprâ un jet dûr (alt plui o mancul 65-70 cm). No doprâ jets bas (ASS3, Protesi di ombul)
3. adi. di barbe, cjavei, pêi, che a tocjâ a dan o a daressin une sensazion di ruspi:  un çamar di cjavei neris e dûrs come sublis (Pieri Menis, Il fi de Rosse); Bernart al veve la muse ruane di frêt sot de barbe rare e dure (Agnul di Spere, Frêt); il biât om al veve la panze sglonfe e tirade, cuvierte fin al bugnigul di pêi dûrs e grîs (Amedeo Giacomini, Tal ospedâl); la jerbe alte e dure che e nulive di mente salvadie e di camamilats (Maria Forte, Cjase di Dalban)
4. adi. dal cuarp o di une sô part, fis, tonic:  e veve scuasit pôre di gjavâ i vistîts e di tocjâ il so cuarp crot. Lu sintive plen sot dal corpet e de cotule, dûr di zoventût (Gianni Gregoricchio, Trê feminis)
   Sin. fis , salt² , sodât , stagn¹ , tonic
   
   1. di part dal cuarp, cun tension muscolâr:  i braçs dûrs a tignî il batacul, prime di podê gjoldi il plasê di scampanotâ (Cristina Noacco, Faliscjis)
   2. di persone, che si môf cun tension, stant drete:  passavin pal borc i soldâts in scuadre, dûrs, impicotîts (Pieri Somede dai Marcs, Sul prât Soreli)
5. adi. dal ses masculin, in erezion:  pôc ce fâ: a bighe dure no si resone
   Cfr. tirâ , dreçâsi
6. adi. di une part dal cuarp, che no rive a movisi pal frêt, pe fadie, par paralisi e v.i.:  il nestri alpin al veve […] lis gjambis duris fin ai zenoi (Pieri Menis, Zilugne)
   
   1. cence sveltece o agjilitât:  al è dûr tal cori
      Sin. leât , legnôs
7. adi. di cdn. o di part dal cuarp, che no si môf o che par un pôc nol rive a reagjî pal straneament, pe pôre e v.i.:  la bocja di Deneila a restà dura, dome a i sbatevin li ceis come ali in poura (Novella Cantarutti, Il Bolp)
   Sin. cantesemât , crudulît , imbacuchît , incantesemât , inmatunît , interdet , sbarlufît , scaturît , stranît , strassomeât
8. adi. dal cuarp muart, cjapât dal rigor mortis:  nissun veve nancje sintût a dî che Selmo al fos stât malât; e cumò al jere li, sul jet, dûr come un trâf (Pieri Menis, Il fi de Rosse); dôs pernîs blancji e un cator picjâts, dûrs, cul bec in stuart (Novella Cantarutti, Sacrup)
   
   1. (fig.) muart:  jê a lu cjatà [un frutin] bagnât e freit, a sa lu tirà sot sul stomi e a tacà a sfladâi intor, bel che a zeva burint par rivâ a cjasa prin che a i fos restât dûr (Novella Cantarutti, La agna Mia di Ristec)
      Sin. sec , frêt
9. adi. no masse cuet o ancje no avonde cuet:  ten sù il rîs ancjemò un minût che al è un fîl masse dûr
10. adi. di robe di mangjâ, che si fâs fadie a mastiâle:  une bisteche dure come une suele di scarpe
11. adi. massime dal pan, che al à pierdût la consistence fofe parcè che nol è no fresc:  tal sac, leât su la schene, al veve une cjamese rote, un pâr di çavatis […] e une pagnoche di pan dûr (Pieri Somede dai Marcs, Bandiere)
    Sin. sec , stantît , vecjo
12. adi. dal ûf, cuet intîr te aghe bulinte, in gjenar par 7-9 minûts, di mût che sedi il blanc che il ros a sedin salts:  lis fameis si sentavin ta la ombrene a mirindâ lidric cul poc e ûfs dûrs e salam gnûf a pene disniçât (Dino Virgili, La aghe da pît la cleve)
13. adi. (ancje fig.) massime cuntune specificazion, che al fâs resistence, che al fâs fâ un sfuarç prime di fâ alc:  al veve une fionde cui elastics dûrs di tirâ e pronts come un sbâr di mûl (Alan Brusini, Par stradis lungjis); un vizi une vore dûr di corezi (Josef Marchet, Lenghe e lenghis in Italie); po no âstu capît, tu sês dûr di coce… (Pieri Somede dai Marcs, Tripoli bel sol d'amore); [la int dal Friûl] libare e dure di lassâsi pleâ e meti in rie, epûr ordenade dentri vie (Josef Cjargnel, Il Friûl al è nassût cussì); un cjaval dûr di bocje
    Sin. restîf , lunc , tart
14. adi. (fig.) dispès in costruzions impers., ancje tal feminin, che al à pocje pussibilitât di sucedi:  o pensi che la Italie e podarà dî la sô, ancje se mi somee dure che e rivedi a puartâ a cjase la Cope dal Mont (Christian Romanin, Dino Zoff: «O vin lidrîs buinis, o vin di tignîlis di cont»)
    Sin. dificil , grivi
15. adi. (fig.) che al domande impegn, fadie e v.i.:  ce che a rivin a meti in bande dopo cualchi an di lavôr dûr, nol ripaie des tantis vitis che la silicosi si à puartât vie (Javier Grossutti, La emigrazion dal Friûl - Vignesie Julie tai Stâts Unîts)
    Sin. impegnatîf , sfadiôs , dificil , imbroiôs , osteôs , osteât , pesant
16. adi. (fig.) caraterizât di rigôr, dissipline, intransigjence e v.i.:  Taresie e parà indaûr il compatiment e, dure, e le indenant a finî il so discors (Gianni Gregoricchio, Trê feminis); sù ancje tu Bepo, cambie pinsîr, no stâ fâti viodi cussì dûr (Pieri Somede dai Marcs, Resurezion a Pontinie)
    Sin. intransigjent , rigjit
17. adi. (fig.) che al ten lis sôs opinions cence lassâsi divoltâ:  fra la Anzuline e Sandri si jere metude di mieç la çucje dure di siore Anute di Nardon che e veve mil pretesis sul avignî de fie (Maria Forte, Cjase di Dalban); il Nino i diseve che al jere dûr come un mûl (Carlo Sgorlon, Prime di sere)
    Sin. cjanin , crût , impinionôs , insensibil , ledrôs , mastin , restîf , testart , ustinât
18. adi. (fig.) caraterizât di alc di negatîf, tant che dolôr, mancjance di bêçs, sfortune e v.i.:  al pâr propit che, cuant che la vite si fâs plui dure e dificil, al sedi il moment che l'amôr al deventi plui grant e profont (Roberto Ongaro, Il muc); il moment plui dûr al jere stât partî lassant li chei voi a cjalâlu, plens di lagrimis (Cristina Noacco, Faliscjis); si cjatà a supâsi dute la vuere e dut ce che al capità tai agns dûrs dopo la vuere (Antoni Beline, Pre Pitin)
    Sin. disgrât , displasevul , dolorôs , garp , grivi , lagrimôs , lancurôs , malabiât , mareôs , pelôs , penôs , pesant
19. adi. (fig.) di confront, caraterizât di determinazion, agressivitât, violence e v.i.:  organizâ il moviment intune struture di partît che al varès vût di frontâ une lote dure e lungje intal timp (Adrian Cescje, Tal non di Fausto Schiavi); students e pulizais a vevin fat une sorte di bataie, ancjemò plui dure di chê di une setemane prin (Agnul di Spere, In viaç di domenie)
    Sin. barbar , cjanin , dispietât , feroç , incindiôs , mastin , salvadi , scontrôs , violent
20. adi. (fig.) dit, pandût cence delicatece:  al veve vût peraulis duris ancje par jê (Maria Forte, La tiere di Lansing)
    Sin. imburît , risolût , sburît , sec
21. adi. (fig.) di clime o element atmosferic, che al fâs patî, massime par vie dal frêt:  tieris cuntun clime dûr, pocje fertilitât e tante aghe e tante ploie (Mirta Faleschini, Stefano Magnani, Aldo Candussio, Gaetano Vinciguerra, Protostorie e storie romane in Friûl)
    Sin. frêt , crût
22. adi. (fig.) spec. di linie de muse o dal cuarp, drete, cence tenarece, cence finece:  i siei pipins cun chês liniis cussì duris, ma cun chês espressions cussì vivis (Lucio Perès, Gno barbe Sisto)
    Sin. dret , cuadri , cuadrât
23. adi. (fig.) pôc melodic:  un rock dûr
24. adi. (fig.) di gust, soredut dal vin, fuart e no ben ecuilibrât, ancje cun masse aciditât:  [il vin de Pulie] si doprave par "taiâ" i vins locâi, che in chê epoche a jerin mancul alcolics, cun plui tanin e plui dûrs (Enrico Peterlunger, Storie curte de vît in Friûl)
25. adi. (fig.) che al pues scossâ cui che al è sensibil:  une mostre fotografiche interessante, e ancje dure, sui manicomis
    Sin. fuart¹ , penç
26. adi. (fig.) di cualchi cundizion o situazion, che e je caraterizade di plenece, reisistence e v.i.:  si inçussive a bugadis fin a cjapâ sium - cui lu varessial mai dite - un sium dûr come une piere (Alan Brusini, Come tai romançs)
27. s.m. robe no tenare, elastiche, fofe e v.i:  [sclesis di granade] batint su lis cretis, a saltavin come la tampieste co e bat sul dûr (Pieri Menis, Cemût che o soi restât caporâl); co si jere sveât si cjalave ator ta chel barcjon mai viodût, cu la schene rote par vê durmît sul dûr (Alan Brusini, Par stradis lungjis)
    
    1. (fig.) spirt fuart, caratar salt:  il vecjo nol saveve fâsi sintî avonde. Nol jere taiât tal dûr (Maria Forte, Cjase di Dalban)
28. s.m. teren salt:  la piere e jere pastanade tal dûr, a sbighet (Dino Virgili, La aghe da pît la cleve)
    Sin. salt²
    
    1. (fig.) fonde salde, argoment concret:  cuant che a calcolin che al sei il moment just, a 'nd molin fûr une sole, ben plombade, e a sierin la bocje a ducj […] a van drets sul dûr, sul concret (Riedo Pup, I furlans e la cjace); al è il moment di lavorâ sul dûr, di mostrâ se il Friûl al à int serie, madure, sperimentade (Josef Marchet, E cumò?)
       Sin. concret , positîf , sigûr , ciert
29. s.m. (fig.) persone sigure dal so fat:  se tu âs voie di mantignî il puest, tu âs di jessi un dûr, âstu capît? (Pieri Somede dai Marcs, Un pugn di moscjis); il zovenut al è un dûr, nuie ce dî (Sandri Di Suald, Ah! la provincie)
30. s.m. (fig.) persone o situazion che a presentin elements dificii di risolvi:  se al cjate il dûr, si romp i cuars e po al devente bon tant che un agnelut (Josef Marchet, Lis predicjis dal muini)
    Sin. grop , vues
31. s.m. (fig.) ande di resistence o difidence:  cuant che jê e capî di vê slargjât il varc tal dûr de prime opinion, si sintì, pardabon, a cjase sô (Maria Forte, Mabile la Lunghine)
32. av. cun impegn, cun dissipline:  i miei gjenitôrs a lavorin dûr (AAVV, Sul florî)
    Sin. fuart¹ , fis , salt²
33. av. (fig.) in maniere secje, cence finece:  al fevelave dûr come un todesc (Alan Brusini, Come tai romançs)
    Sin. brusc¹ , ruspi , sec

Polirematichis e espressions idiomatichis

• bati dûr loc.v.
• bati il dûr loc.v.
• lâ jù dûr loc.v.
• restâ dûr loc.v.
• stâ dûr loc.v.
• tignî dûr loc.v.
• tignî il dûr loc.v.
• tignîsi dûr loc.v.
• ûf dûr loc.s.m.
• vê i coions dûrs loc.v.
• vues dûr loc.s.m.
• vues dûr di roseâ loc.s.m.

Proverbis:

• a bighe dure no si resone
• dûr cun dûr no si fâs mûr
• dûr cun dûr nol fâs bon mûr
• il pan dai altris, chel plui bon, al à siet crostis e chel plui dûr ind à nûf
• l'ûf al vûl nec durum nec tenerum sed basotum
• la cite rote e je chê che e ten dûr
• nol è miluç tant dûr che cul timp nol deventi madûr