Dizionari de Lenghe Furlane

tirâ  ti|râ  [FO]

1. v.tr. cjapâ e fâ fuarce o movi in direzion di se alc o cdn.:  e cjalave ancje i pescjadôrs che sot sere a tiravin lis rêts cuntun sfuarç misurât e compagn, che al rivave a vinci il mâr (Maria Forte, Cjase di Dalban); «Alore? Sêso daûr a fâ mirinde? Vino di stâ chi trop?» al domande Lele, intant che al fâs sigure al secont [scjaladôr], e al tire un pôc la cuarde par stiçâlu (Cristina Noacco, Faliscjis); cualchi volte, dispetosat, i tirave i cjavei, i disfave la streçute, i robave il façolet (Dino Virgili, La aghe da pît la cleve)
   Sin. trai , zucâ
   
   1. fâ movi viers di se ancje cence contat fisic:  la calamite e tire a se il fier (Carlo Sgorlon, Il dolfin)
   2. cjapâ e puartâ o fâ movi di une cierte bande, ancje no viers di se:  Meni al jes, Rose e tire un caregon dongje il fogolâr, po si bute jù sfinide (Pieri Somede dai Marcs, Vilie di Nadâl (teatri))
   3. fâ movi viers di se o intune cierte direzion ancje cence fuarce concrete:  e je di passaç inte cjase altre int, tirade lenti de vuere (Ivano Urli, Storie di Vera)
      Sin. puartâ , menâ
2. v.tr. fâ movi un veicul cuntune fuarce di tension:  a passavin un daûr l'altri i cjars dai «paurs» tirâts di cjavalons neris, ros e blancs (Pieri Menis, Tal bosc di Kebespok); simpri a pâr da la sô Nina, la grant musse grise dal convent che e tirave il caret cjamât di sacs (Pieri Somede dai Marcs, Fra Silvio)
3. v.tr. meti in tension, fâ stâ in tension:  dôs valîs che a vevin di pesâ parcè che i tiravin i braçs (Maria Forte, La tiere di Lansing)
   Sin. distirâ , slungjâ , tindi , trai
   
   1. meti in tension une part dal cuarp par slungjâle, par rivâ plui lontan o sim.:  dute la int e tirave il cuel par cucâ insom de strade (Pieri Menis, Il fiâr dal plevan); il comandant […] al tire par aiar il braç, "Heil Hitler" al dîs cuntune berlade (Ivano Urli, Storie di Min)
   2. fâ alc che al domande tension o che al è caraterizât di tension:  [il ragn] svelt svelt al tire la tele a traviers il bûs da la grote (Pieri Somede dai Marcs, Resurezion a Pontinie)
   3. cambiâ la forme fasint deventâ lunc, larc e sutîl:  tirâ la paste fine plui o mancul come chê dai crostui (Sandri Carrozzo, Tutres)
   4. segnâ une rie, un percors e sim:  al cjapà il pinel e si metè a tirâ une linie blancje (Tarcisio Venuti, La cjase di Toni); i Romans, la prime robe che a fasevin, si dividevin il teren […] a tiravin lis stradis ad angul dret e li ognun al veve il so toc di teren (Francesc Placerean, La nestre storie)
      Sin. fâ , segnâ
4. v.tr., v.intr. di vistiari o altris robis, strenzi:  ben ce biel che al è ancjemò, ancje se i tire le cjamese! Un pipin! (Lisa Molaro, Al Dacia Arena, l’importanza di far squadra contro l’Alzheimer)
5. v.tr. fâ une azion, ancje indirete, che e compuarte une tension, une trazion, une cierte fuarce:  e tirà une grande frenade a risi di copâsi. Si azionà parfin l'airbag! (Checo Tam, Stalker)
6. v.tr. (fig.) convinci a stâ di une cierte bande:  ognidun dai partîts al scuen scombati, spindi e sudâ par tirâ de sô bande i eletôrs (Josef Marchet, Votazions regjonâls); il conseîr Rizzi, che cun resonaments che no valevin nuie al jere rivât a tirâ de sô bande ducj chei altris (Pierluigi Visintin, Friûl e furlans te Histoire de ma vie di Giacomo Casanova)
   Sin. puartâ , menâ
   
   1. indusi o meti te cundizion di fâ alc:  si veva timp da parecjâi il pan cul companadi e il got dal vin che a i distorteava la lenga e a lu tirava a contâ li sô fassendi (Novella Cantarutti, L'uminin dai stecs)
      Sin. puartâ , sburtâ , menâ , stiçâ
7. v.tr. (fig.) fâ in maniere che un resonament, un discors e v.i. a ledin suntun ciert argoment o a rivin a di une cierte conclusion:  cemût che il discors al podarà vignî tirât di chê bande, noaltris no lu savìn (Josef Marchet, Trombis e tambûrs)
8. v.tr. (fig.) vê atrative:  e jere une grande fieste che e clamave int di dutis lis bandis, […] ce che al tirave soredut la int a jerin lis corsis dai cjavai (Pieri Menis, Une letare par Bepo); ce lu aial tirât di particolâr viers Milan? (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
   Sin. atrai , clamâ , ingolosî
9. v.tr. fâ alc che al vedi une cierte estension e che al sedi plan o slis:  al si sente dongje il banc di lavôr e al si met a tirâ un mani di falçâr (Pieri Somede dai Marcs, Vilie di Nadâl (teatri)); Micjeil al era marangon […] i canais […] a si incantesemavin a jodalu dâ di splana, lavorâ di fin cun limi e sgoibii e, pi di dut, manezâ cun sio fi la siea granda da segantin che a i meteva il sio biel timp a tirâ na brea (Novella Cantarutti, Micjeil di Citia); tal passantdoman mi àn dade une cariole, une pale e un rali par tirâ place e tamesâ savalon (Pieri Menis, Il gno prin pâr di scarpis)
10. v.tr. meti un implant, massime cun fîi, cablis, condots e v.i.:  o vin decidût di fâ il caminet par scjaldâ l'ambient, dopo metût la grisiole sul sofit, piturât i mûrs, tirât i fîi pe musiche e lis cassis par sintîle (Mario Beltramini, Jo e Graziella); chei disore a tiravin l'acuedot (Pieri Menis, Disore e disot)
    Sin. meti , meti jù , meti sù
    
    1. fâ rivâ un servizi cuntun implant, cuntune rêt e v.i.:  un altri cîl di stelis, tal plan, là jù, insom: Udin, di gnot! che Malignan al veve tirade la lûs eletriche pardut (Dino Virgili, La aghe da pît la cleve); no âstu ancjemò tirât il gas in cjase, agne? (Franca Mainardis, Il sium di Lissandri)
11. v.tr. [TS] tipogr. stampâ, soredut intun ciert numar di copiis:  pecjât che une publicazion di chest gjenar no puedi sei tirade in trente cuarante mil copiis (Adrian Cescje, Memoriis di politiche linguistiche); danadis dal ciclostîl, o jerin! Simpri a tirâ manifescj e circolârs, impeoladis cun argagns scuintiâts che si rompevin ogni moment (Gianni Gregoricchio, Trê feminis)
    Sin. stampâ
12. v.tr. (fig.) fâ lâ plui svelt, plui fuart e v.i.:  a tirâle, la machine e va ancje a 180 kmh
    Sin. stiçâ , stuzigâ , sfuarçâ , sburtâ
13. v.tr. (fig., ancje ass.) impegnâsi, sfuarçâsi, lavorâ a fuart:  so nono Min che al à simpri tirât e tasût e cjapadis tant che un mus, fin cuant che pe sô strade al è colât, cu la anime monde e il voli clâr (Ivano Urli, Il mus di Lise); scuegnial stâ sot i fîs cumò, … dopo che al à tant lavorât e tirât par ducj ancje cu la muart tal cûr? (Maria Forte, La tiere di Lansing)
14. v.tr. rivâ a vê, spec. bêçs:  al tire une buine paie cul so mistîr, tal stabiliment indulà che al va a vore (Josef Marchet, Lis predicjis dal muini); i bêçs che a vevin tirâts intune maniere o in chê altre intant de vuere si jerin sfantâts come la fumate (Pieri Menis, Chei di Muraie); a Sant Martin e colave la lôr oselade: in chê dì i parons a tiravin il fit (Riedo Pup, I furlans e Sant Martin)
    Sin. cjapâ , scuedi
    
    1. cjapâ in consegne:  si invià filade cuintri la cjase di Ghite Cosset, dulà che, in chê dì, a tiravin il lat (Maria Forte, La tiere di Lansing)
15. v.tr. otignî un risultât, une deduzion:  e cun chest vuei tirâ la conclusion / che la mode no à vude mai rason (Pieri Çorut, Il mus)
    Sin. trai , gjavâ
16. v.tr., v.intr. tratâ par vê un scont:  cuant che infin si tratà di paiâ, Nene, dopo di vê tirât il presi fin sul vues, si fase dâ, di prionte, une golarine (Roberto Ongaro, Cretevierte)
    Sin. marcantâ , marcjadantâ , tratâ
17. v.tr. [TS] sport (ancje ass.) in diviersis garis di velocitât in grup, metisi devant e imponi un ritmi
18. v.tr. (fig.) vê une funzion di direzion intun moviment, intune dinamiche, intune ativitât:  chel che al veve tirade la regjie des operazions plui rilevantis di politiche linguistiche viers la lenghe furlane (Adrian Cescje, Memoriis di politiche linguistiche)
    Sin. movi
19. v.tr. dâ fuarce e lassâ alc che si à in man, o cun cualchi strument, di maniere che al svoli:  al pareve che la cidule che al veve tirât, saltant e cisant jù pe cleve, no ves vût plui di fermâsi (Gianfranco Pellegrini, Cidulis); tal discoclub o vevi cirût di bussâle e jê mi à tirât la bire intor (Checo Tam, Queen Anastasia)
    Sin. butâ , lançâ , trai
    
    1. (ancje ass.) in diviers sports cu la bale, indreçâ la bale dulà che al covente par fâ ponts:  rigôr pal Udin: al tire De Paul e al segne (Marc Stolf, Genoa - Udinese 1-1); a proposit di Zico, viodût [ce] ben che al zuie? viodût ce punizions che al tire? (Opa, Televisions)
    2. (ancje ass.) butâ cuntune arme o sbarâ cuntune arme di fûc:  Quilin ur varès tirât di cûr une sclopetade se nol fos stât par rispiet dai doi Criscj (Riedo Pup, Il Crist di Quilin); ai furlans ur tocjave di tornâ a scomençâ e - viodêt ce destin - tornâ a cirî lavôr plui di une volte là di chei che ur vevin tirât in vuere (Francesc Placerean, Cuintristorie dal Friûl dal 1866 fint in dì di vuê); il segretari politic dal fassio al jere stât ferît di une metraiade: si jere salvât par miracul. Cui i vevial tirât? (Pieri Menis, Zilugne); i uciei e il salvadi ju sintive cul nâs e ur tindeve archets e ur tirave cu la fionde (Alan Brusini, Par stradis lungjis)
       Sin. trai , sbarâ
20. v.tr. dâ, massime se di buride e cun violence:  mi buti in zenoglon e tiri un colp di tai cul fûr dal pît te sô gjambe (Sandri Di Suald, Ah! la provincie); une pidade a scalç, come il mus cuant che al tire un pan (Pieri Menis, La scuele dai fornasîrs)
    Sin. dâ , molâ , petâ
    Cfr. trai , sbarâ , ripâ , scalçâ
21. v.tr. dî cun fuarce, cun rabie, cun disperazion e v.i.:  al tirà un porconon cuant che al controlâ sul sfuei che al veve in man la consegne de zornade (Franco Marchetta, Light my Fire); alore sì che e tirà un ciul potent! (Gianni Gregoricchio, Trê feminis)
    Sin. tirâ jù , molâ
22. v.intr. di sostance, cjapâ plui consistence, fâ plui resistence:  la polente tirie o coventie plui farine?
    
    1. (pop.) dal orghin sessuâl masculin, deventâ dûr:  no i tire la bighe (DLH Posse, Solit Udin)
23. v.intr. dal aiar, passâ cuntune cierte fuarce:  al tirave un garbin, di Cjampeon, di taiâ lis orelis (Meni Ucel, Messe a straoris); la zornade e jere clare e nol tirave un fîl di aiar (Carlo Sgorlon, Prime di sere)
    Sin. bugâ , jessi¹ , menâ , svintâ , soflâ , svintulâ
    
    1. fâ jentrâ tai polmons respirant:  la agne e tirà un suspiron (Gianni Gregoricchio, Trê feminis); al scugnì provâ dôs trê voltis a fâ flame par piâ il spagnolet […] ma ae fin il tabac al cjapà. Berto al tirà une bocjade (Carlo Tolazzi, La salamandrie tal fûc)
    2. fâ passâ il fum:  e jere stade comedade ancje la nape che no tirave (Maria Forte, La tiere di Lansing)
24. v.intr. (ancje fig.) lâ di une cierte bande, vê o cjapâ une cierte direzion:  e jere rivade a Bueriis e di chi, pai trois che e cognosseve ben, fûr pai palûts, e tirà viers il borc (Pieri Menis, A uciei cu lis archetis); si sa che politiche e cognossince no van a bracet, par solit se une e tire a çampe chê altre e tire a diestre (Franc Fari, Il cjâf dai furlans)
    Sin. butâsi , voltâsi , zirâ , butâ , lâ , cjapâ , voltâ , svoltâ
    
    1. vê une tindince:  o vin simpri fevelât pôc, ancje parcè che tu tiris a sberlâ e chest no mi smeche (Enrico Martina, Ricuarts e inlusions)
    2. vê une someance:  e gjavà cun dute pachee i ocjai di chel nâs che al tirave un pôc a bec (Maria Forte, La tiere di Lansing); e jere une femine plene di vite e di morbin, ancje se e tirave un fregul a frute (Carlo Sgorlon, Il dolfin)
    3. svicinâsi a une cierte carateristiche, spec. a un ciert colôr:  il ros de muse al tirave a puinte (Maria Forte, Cjase di Dalban); grîs di pêl, ceis incrosadis, / cjar che tire al verdulin (Pieri Çorut, I conotâts)
       Sin. butâ , trai
25. v.intr. (zerg.) jessi di sucès, di mode e v.i.:  di un pôcs di agns incà chê strade e je chê che e tire di plui! Li a son i locâi che a van di plui, li al è plui zîr, plui marcjât, plui bêçs (Stiefin Morat, Donald dal Tiliment)
    Sin. lâ
26. v.intr. continuâ, lâ indevant a fâ alc:  lui i veve cjapât la cjicare come sbaldît, tirant a fevelâ cul amì cence viodile ben, o le veve cjalade come che e passe la aghe su la piere (Maria Forte, Cjase di Dalban); ma come spiegâ la reson par la cuâl in cjase se, cuant che o tachi a fevelâ, la femine e tire di fâmi cuintri? (Arturo Feruglio, Viaç a Vignesie); i Micui a jerin une famee di bolpats che a tiravin a lavorâ fin tart (Maria Forte, La tiere di Lansing)
    Sin. lâ indenant , lâ dilunc , parâ vie , parâ indenant , continuâ

Polirematichis e espressions idiomatichis

• tirâ a bruscjete loc.v.
• tirâ a ciment loc.v.
• tirâ a fin loc.v.
• tirâ a lunc loc.v.
• tirâ a pet loc.v.
• tirâ a pro loc.v.
• tirâ a sorte loc.v.
• tirâ daûr loc.v., loc.
• tirâ dentri loc.v.
• tirâ di ca pai cjavei loc.v.
• tirâ dilunc loc.v.
• tirâ dongje loc.v.
• tirâ dret loc.v.
• tirâ flât loc.v.
• tirâ fûr loc.v.
• tirâ fûr i passarats loc.v.
• tirâ i conts loc.v.
• tirâ i sghirets loc.v.
• tirâ i stivâi loc.v.
• tirâ i voi loc.v.
• tirâ il clostri loc.v.
• tirâ il cuel loc.v.
• tirâ il cûl indaûr loc.v.
• tirâ il flât loc.v.
• tirâ il pît loc.v.
• tirâ il voli loc.v.
• tirâ in bal loc.v.
• tirâ in cjase loc.v.
• tirâ in lunc loc.v.
• tirâ indenant loc.v.
• tirâ indenant la barache loc.v.
• tirâ indevant loc.v.
• tirâ indevant la barache loc.v.
• tirâ jù loc.v.
• tirâ jù a cjampanis doplis loc.v.
• tirâ jù a cjampanis rotis loc.v.
• tirâ jù di spese loc.v.
• tirâ jù di spesis loc.v.
• tirâ jù i bregons loc.v.
• tirâ jù il cjapiel loc.v.
• tirâ jù la piel loc.v.
• tirâ jù tabârs loc.v.
• tirâ jù tant di cjapiel loc.v.
• tirâ l'aiar loc., loc.v.
• tirâ la aghe loc.v.
• tirâ la aghe al so mulin loc.v.
• tirâ la ale loc.v.
• tirâ la beche loc.v.
• tirâ la bruscjete loc.v.
• tirâ la carete loc.v.
• tirâ la cengle loc.v.
• tirâ la cjadene loc.v.
• tirâ la cuarde loc.v.
• tirâ la ghete loc.v.
• tirâ la gjambe loc.v.
• tirâ la gole loc.v.
• tirâ la orele loc.v.
• tirâ la sgripie loc.v.
• tirâ lis bruscjetis loc.v.
• tirâ lis consecuencis loc.v.
• tirâ lis orelis loc.v.
• tirâ lis sgripis loc.v.
• tirâ lis sumis loc.v.
• tirâ pai cjavei loc.v.
• tirâ pal braç loc.v.
• tirâ par un fîl loc.v.
• tirâ pe gjachete loc.v.
• tirâ pes lungjis loc.v.
• tirâ sede loc.v.
• tirâ sot loc.v.
• tirâ sù loc.v.
• tirâ sù cul nâs loc.v.
• tirâ sù di cane loc.v.
• tirâ sù di cuarde loc.v.
• tirâ sù i cantins loc.v.
• tirâ sù i passarats loc.v.
• tirâ sù i scarpets loc.v.
• tirâ sù i stivâi loc.v.
• tirâ sù il grumâl loc.v.
• tirâ sù il nâs loc.v.
• tirâ sù lis maniis loc.v.
• tirâ sù lis spalis loc.v.
• tirâ sù pal spêt loc.v.
• tirâ sul centesim loc.v.
• tirâ sul presit loc.v.
• tirâ un clap te poce loc.v.
• tirâ une rie loc.v.
• tirâ vie loc.v.
• tirâ vie dret loc.v.
• tirâle cui dincj loc.v.
• tirâle pes lungjis loc.v.
• tirâle vie loc.v.
• tirâlis sot loc.v.
• tirâlis sù loc.v.

Proverbis:

• a Sant Simon si tire sù la cjalce e il scufon
• a tirâ masse la cuarde, si romp
• al mangje plui vene chel mus che nol tire la carete
• cui che al à mangjade la vene che al tiri ancje il cjar
• cui che al mangje il vuadagn che al tiri l'argagn
• cui che al mangje la vene che al tiri la carete
• cui che al mangje te grepie, al scuen tirâ la carete
• cui che al tire il cuartês che al puarti il pês
• cui che al tire il vuadagn al tire ancje l'argagn
• cui che le tire le nase
• cul tirâ, la tele si romp
• cul trop tirâ, la cuarde si romp
• di istât o tirâ o nasâ
• ducj tire la aghe al so mulin
• dulà che il cûr al tire lis gjambis a puartin
• e tire plui la naie che no cent pâr di bûs
• e tire plui la nape che no cent pâr di bûs
• e tire plui moscjis une gote di mîl che no un barîl di asêt
• i bogns bocons a tirin in malore
• il cjar si tire daûr la scarpe
• il mus al tire
• il sanc al tire
• intant che i litighents a tirin la vacje, un pai cuars e un pe code, i avocats a molzin
• la cuarde co e je trop tirade si romp
• lis gjambis a puartin là che il cûr al tire
• miôr tirâ che no nasâ
• miôr un mus che al tiri che no un cjaval restîf
• no bisugne tirâ il pêt plui grant de buse
• no si à di tirâ flât e gloti che e va pe scjavace
• no si discor che la vacje no tiri ma al è rot l'argagn
• o tirâ o molâ
• si fâs e si dîs e la muart e tire pai pîts
• tirâ il pont tant che si po, ma dâi a ognidun il so
• un mâl al tire chel altri
• une peraule e tire chê altre