Dizionari de Lenghe Furlane

tratâ  tra|tâ  [FO]

1. v.tr. ve un ciert compuartament cun cdn. o cun alc:  in cjase ducj a scomençarin a tratâle ben, a tignîle cont, e jê cun lôr si cjatave (Maria Forte, Cjase di Dalban); a mostravin di vêse par mâl che ju tratassin diferent di ducj chei altris (Dino Virgili, La aghe da pît la cleve); tu mi âs tratât simpri tant che un di famee, tant che un fi (Roberto Ongaro, Il muc)
2. v.tr. dâ di mangjâ e di bevi ai ospits:  crôt che ducj savaran / che soi solit ogni an, / come vuê, di tratâ / i parincj e i amîs cu un bon gustâ (Pieri Çorut, Il Strolic mezan par l'an 1866)
   Cfr. tratament
3. v.tr. sometilu alc a cierts procediments:  e jere la sô prime opare di impegn, par grandece e pal mût di tratâ la figure a dut taront (Maria Forte, La Madone de Pâs); dal mês di Jugn al funzione un gnûf implant di purificazion de aghe contaminade, bon di tratâ 1200 m3 di aghe ogni dì (Alessandro Pascolini, Il disastri de centrâl nucleâr di Fukushima Dai-ichi); Daspò controlade la cualitât dai dâts, si ju à cjariâts tai sistemis informatics e a son stâts tratâts informatichementri cul program dBase 3+ (Linda Picco, Ricercje su la condizion sociolenghistiche dal furlan)
   Sin. lavorâ
   
   1. lavorâ cun alc, doprâ alc:  al veve cuistât une buine cognossince dai stîi des costruzions e une paronance tal tratâ lapis e scuaris (Lucio Perès, Il mâl dal mûr)
4. v.tr. meti in vore un procediment che al covente par curâ, protezi, mantignî in salût, eliminâ cundizions negativis e v.i.:  al lave jù, ben planchin, fin tal ort, par cjalâ Decimin che al butave il solfar, a insegnâi a tratâ cualchi vît che e jere scuasit a rap (Maria Forte, Cjase di Dalban)
5. v.intr. vê a ce fâ cun cdn., spec. intune situazion di confront, di colaborazion, di convivence:  o vin scugnût tratâ e scombati cun dutis lis razis dal gjenar uman (Josef Marchet, Cumò che o savìn…); [lant a vore a Udin] tu imparis a tratâ cu la int di citât (Alan Brusini, Par stradis lungjis); al veve tal fâ chel piç di polegane, chês manierutis cortesanis, […] di tratâ cun int di ogni fate, simpri a muse da ridi, daûr dal banc (Dino Virgili, La aghe da pît la cleve)
6. v.tr. comprâ e vendi une cierte marcjanzie o servizi:  «Disêtmal, ce trataiso?» «Lane. Di pioris anglesis. Da la miôr cualitât» (Gianluca Franco, Re Ricart in Friûl)
   Cfr. tignî , vê
7. v.tr., v.intr. frontâ un argoment:  al veve di meti a verbâl dut ce che si diseve o si tratave (Antoni Beline, Pre Pitin); "Friûl che al vîf" al jere il titul sielt par un program che al tratave di storie, culture e atualitât furlane (Max Mauro, Un Friûl difarent: i 90 mhz di Onde Furlane); il libri al varès vût di struturâsi intune part economiche e istituzionâl […], che le varès tratade Zorç Cjaval, intune part di storie di civiltât e leterarie […], che le varès tratade Pieri Carli Begot, e intune di cuistions di culture e ideologjie in Friûl tal 1800 e 1900, che le varès tratade jo (Adrian Cescje, Memoriis di politiche linguistiche)
   Sin. esaminâ , esplicâ , esponi , ilustrâ , insegnâ¹ , motivâ , tocjâ
8. v.tr., v.intr. discuti cirint un acuardi:  al vûl comprâ la braide cul vignâl di siôr Simon che al è in vendite, e mi dîs di lâ a tratâ daurman (Maria Forte, La tiere di Lansing); a cjalavin la spongje, lis plui lichignosis le nasavin e cuant che a decidevin di comprâ a tratavin sul presit (Pieri Menis, Il cuader de none); si stave tratant une bestie e urlant o porconant par talian cun ducj i minuets dal mistîr (Dino Virgili, La aghe da pît la cleve); Cavedalis stes al ve la incarghe il 18 di Avost, insiemi cun Dataico Medin e Nicolò Priuli, di lâ a Mestre a tratâ cui todescs la fin des ostilitâts (Giovanni Pillinini, Zuan Batiste Cavedalis - Une vite esemplâr)
   Sin. concuardâ , contratâ , negoziâ , patizâ , patuî , rangjâ , regolâ
9. v.tr. cun "di" e un infinît, impegnâsi par rivâ a un ciert risultât:  tratant di cuietâ l'om al zontà: «Chestis, Toni, a son robis passadis. Dibisugne lâ cul progrès vuê […]» (Tarcisio Venuti, La cjase di Toni); pre Pieri al tratave di convincimi a restâ (Enrico Martina, Ricuarts e inlusions)
   Sin. provâ , cirî
10. v.intr. in costruzions impersonâls, jessi argoment, cuistion, ocasion, oportunitât e v.i.:  si sa che la int no va tant pal sutîl, cuant che si trate di butâ la crôs su la schene di cualchidun (Roberto Ongaro, Il muc); «No si trate di fam: si trate di dâi ligrie al stomi …» (Meni Ucel, I colaçs)

Polirematichis e espressions idiomatichis

• tratâ in palme di man loc.v.

Proverbis:

• a jessi masse bogns, si è tratâts di piore
• a tratâ cui gjats si reste sgrifignâts
• a tratâ cun buinegracie no si fale mai
• a tratâ cun creance no si fale mai