Dizionari de Lenghe Furlane

tignî  ti|gnî  [FO]

1. v.tr. vê alc o cdn. tes mans o tai braçs, o suntune part dal cuarp, o jenfri lis parts di un imprest o sim., in mût che no si movi, nol coli, nol scjampi e v.i.:  Irene le tignive intal braç cheste sô pipine e mi cjalave in zito (Gianni Gregoricchio, Trê feminis); e ten tra lis mans il bussul dal cognac colôr aur che si sbacie (Alan Brusini, Gian Paolo Linda, I forescj)
   Sin. rezi , sostignî , tignî fer , tignî sù
   Var. tegni , tegnî
2. v.tr. fâ che alc o une part dal cuarp o cdn., al stedi intune intune cierte posizion o situazion:  al tignive il cjâf sbassât e i voi dibot sierâts (Roberto Ongaro, Il muc); «Al sarà ce che Diu volarà» dissè, tignint une man ferme sul stomi (Maria Forte, La tiere di Lansing)
3. v.tr. fâ stâ intune cierte cundizion:  no si pues tignî un om in preson cence un procès (Max Mauro, Un Friûl difarent: i 90 mhz di Onde Furlane); tignî il cerneli vuardât dal masse soreli (Josef Marchet, Cjalâ plui inlà); tignî in fresc il formadi (Pieri Menis, Il burlaç)
4. v.tr. vê dentri, vê tant che contignût, sedi materiâl che imateriâl:  la temperadure e je aumentade, un fat che al à permetût a la atmosfere di tignî plui vapôr (Cristina Minuzzo, Gotis di sience 1); il Bank of English al ten pôc sù pôc jù 300.000.000 di peraulis, il British National Corpus e il Czech National Corpus plui o mancul 100.000.000 di peraulis (Vladimír Petkevič, trad. di Zorç Cadorin, Corpus linguistics); inte preson di Zagabrie ogni cele e tignive doi di lôr e jo o jeri sierât cul sicilian (Ivano Urli, Storie di Min)
   Sin. vê , vê dentri , tignî dentri , contignî
   
   1. vê une ciert spazi, une cierte capacitât:  chest cjaldîr al ten juste vot bocâi (Giulio Andrea Pirona, Ercole Carletti, Giovanni Battista Corgnali, Il Nuovo Pirona); il combustibil al è trasferît intune unitât di imagazenament centrâl […] costruide par tignî 6840 elements di combustibil (Alessandro Pascolini, Il disastri de centrâl nucleâr di Fukushima Dai-ichi)
   2. jessi la sume o il prodot di altris numars:  siet, cifre juste dal moment che e tignive sevi il trê che il cuatri, i numars divins de perfezion (Sandri Di Suald, Conte di peraulis muartis)
5. v.tr. jessi o restâ in possès, vê a disposizion, vê cure di alc:  letaris leadis cuntun nastri ros, i decrets di promozion, la crôs di cavalîr e il golâr di comendatôr e altris strafaniçs che done Cheche e tignive par ricuart dal so puar om (Pieri Menis, Il tesaur di done Cheche); dopo Messe Grande, il discors al jere inmò fer sul tesaur cjatât, che lu vevin consegnât di tignî al plevan (Dino Virgili, La aghe da pît la cleve); i bêçs par svincolâ la impoteche ju ten jo in dipuesit (Pieri Somede dai Marcs, La braide)
   
   1. vê cure di cdn.:  mi voleve ben di sigûr ancje par chel e mi tignive dispès a cene e ancje a durmî (Alan Brusini, Come tai romançs)
   2. fâ stâ cun se a vivi o permeti di stâ a vivi insiemi:  un an la Mabile e volè partî ancje jê cun Toni parcè che i fîs ju tignive a cjase sô la agne Mie (Maria Forte, Mabile la Lunghine); fin in chê dì, soldâts no 'nd jere stâts, ma dopo rivade cheste gnove butade, ancje a jê i tocjà di tignînt un cuatri di lôr sul toglât (Roberto Ongaro, Il muc)
6. v.tr. risiervâ par cdn. o par une cierte destinazion:  sul cjar, siei fradis i vevin tignût il puest (Dino Virgili, La aghe da pît la cleve)
   Sin. meti vie , tignî cont , tignî di bande
7. v.tr. fâ cressi e fâ rindi animâi, plantis o tiere:  si jere metude tal cjâf di tirâ sù un purcit; tignî un purcit e no vê tiere par semenâ la blave e lis patatis che a coventin par nudrîlu, al vûl dî fâ sacrificis (Roberto Ongaro, Cretevierte); pre Pieri al tignive lis âfs (AAVV, Sul florî); in Slovenie […] si tegnin uns 50 difarentis cualitâts di vît (Alessio Potocco, Vin o bire? in Slovenie cualitât sigurade)
   
   1. fâ che intun teren e cressi une cierte sorte di plante:  tignî un cjamp a blave
8. v.tr. vê come dipendent:  "Agnul, ca la man - dissal Snaidar - e se tu âs cûr di trainus ancjemò une sclopetade, no ti ten plui a vore!" (Riedo Pup, L'armistizi dal '16)
   Sin. vê
9. v.tr. vê e puartâ indevant une funzion, une incjarie, une ativitât e v.i.:  al veve une etât che nol podeve fâ altri che tignî la presidence des assembleis e dai Conseis di aministrazion, che par dut il rest lu judavi jo (Adrian Cescje, Memoriis di politiche linguistiche); gno pari e mê mari a tignivin un puest che al jere ostarie e buteghe di coloniâi (AAVV, Sul florî); si cjatave cui amîs là di Minon che ogni tant al tignive frascje cul so vin (Maria Forte, Cjase di Dalban)
   Sin. vê , puartâ indenant
   
   1. dispès ancje in costruzions impersonâls, puartâ indevant un event public:  [Sergio Salvi] si jere definît marxist in plui di cualchi conference e dibatiment che al veve tignût chenti in Friûl (Adrian Cescje, Memoriis di politiche linguistiche); il prin moment impuartant par superâ cheste division al è stât il congrès unitari [dai Sami] che si è tignût a Trondheim intal 1917 (Carli Pup, Teritoris - Oms di Libertât)
   2. curâ une pratiche:  al jere ancje segretari de congreghe, vadì i tocjave a lui di tignî il verbâl des cunvignis (Antoni Beline, Pre Pitin)
10. v.tr. vê in vendite:  "Che mi scusi, lui tegnial nome articui dal puest o ancje robe che e ven di fûr?" (Alan Brusini, Gian Paolo Linda, I forescj)
    Sin. vendi , tratâ , vê
11. v.tr. viodi di alc o di cdn., tratâ alc o cdn. intune cierte maniere:  i plaseve lâ ator in biciclete, la sô antighe Vander tipo sport che al tignive come un spieli (Alan Brusini, Par stradis lungjis); Menie e veve vût il so dafâ cui fradis, lavâju e pontâju, che ju tignive come pipins, insegnantjur il vivi dal mont e la creance (Pieri Menis, Chei di Muraie)
    Sin. curâ , tratâ
12. v.tr. (fig.) ancje cun subiet inanimât, fâ restâ tun puest:  «Tu puedis lâ, cui ti ten?» (Carlo Sgorlon, Prime di sere); o tignarìn a cjase di vore il frut. Ti darà une man… (Dino Virgili, La aghe da pît la cleve)
    Sin. discjoli , stratignî
13. v.tr. frenâ:  ogni moment sul puarton no fasevin altri che tabaiâ, i fruts, massime il grant, […] cui ju tignive! (Pieri Somede dai Marcs, La ultime firme de mê podestarie)
    Sin. contignî , fermâ , intardâ , tignî a brene , tignî in brene
14. v.tr., v.intr. (ancje fig.) restâ suntune direzion o tune cierte posizion:  tignî la diestre; al à imbrucjade e tignude la strade maestre, la plui drete (Josef Marchet, E cumò?); bandonade chê gjarnazie, o tignìn saldo viars çampe e, tor miezegnot, o traviarsìn la periferie e o si butìn tai cjamps (Alan Brusini, Un dai pôcs)
    Sin. tignî indenant , tignîsi
    Cfr. lâ , stâ
    
    1. (ancje ass.) di une machine, che e à une buine stabilitât
    2. (fig.) lâ indevant a compuartâsi intune cierte maniere:  al ven proponût il trasferiment di Marchi che al ten un compuartament provocatori (Donato Toffoli, Felix Marchi, un soversîf te "Grande Vuere")
15. v.intr. vê fuarce, funzionâ:  i polmons intosseâts dal fum di miârs di spagnolets no tegnin altri (Enrico Martina, Ricuarts e inlusions); [il cavalîr] al tire lis brenis, di istint la bestie si alce sù lis gjambis daûr che però no tegnin, ducj i doi a sdrumin par tiere (Carlo Tolazzi, La salamandrie tal fûc)
16. v.tr., v.intr. vê consistence, fâ resistence, permeti a alc di stâ intun ciert puest o intune cierte posizion:  breis che no tignivin plui ni clauts ni pontis (Maria Forte, La tiere di Lansing); a imblecavin fin che la tele e tignive fîl, par no spindi (Riedo Pup, I furlans e la culumie)
17. v.intr. (fig.) vê validitât:  il ricors de Filologjiche nol veve mani, la sô logjiche no tignive di nissune bande (Adrian Cescje, Memoriis di politiche linguistiche); chestis cjossis no son di competence dal nestri tribunâl e par chest pont la acuse no ten (Pieri Piçul, Vieri e gnûf)
    Sin. stâ sù
18. v.tr., v.intr. resisti a une fuarce, a une cierte pression e v.i.:  a un ciert moment la sieraie no ten plui e i nemâi a comencin a cori (Pieri Menis, Gno nono); la cole no ten (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
    Sin. resisti , stâ salt
    
    1. vê une cierte resistence:  no stâ a metimi di bevi, che no ten l'alcul
19. v.tr. (ancje ass.) no lassâ scjampâ fûr un contignût, spec. fluit:  mi à domandât di imprest la pompe de biciclete che al veve une gome che no i tignive il flât (Pieri Somede dai Marcs, Par une lengate)
20. v.intr. sperâ che cdn., une part o une scuadre a vincin, e sostignîju:  la direzion […] e je stade impotente e paralizade des lotis tra la part che e tignive par Di Cjaurià e chê che e tignive par Cecot (Adrian Cescje, Memoriis di politiche linguistiche); tu tegnis pal Udin e vonde, no pe Juve o cualchidun altri. Il diaul e la aghe sante no stan dongje (Dree Valcic, A stâ a cjaval dal fossâl si cole dentri e si mûr inneâts)
21. v.intr. vê a cûr:  ognun al tignive ae dignitât de sô glesie (Maria Forte, Cjase di Dalban)
    Sin. tignîi
22. v.tr. vê une cierte opinion, intune cierte considerazion:  dai miei problemis tu âs dome ridût parcè che tu ju tignivis tant che robe di fruts (Enrico Martina, Ricuarts e inlusions); "Us al zuri, santule; savês che o us ten par mari" (Anute Fabris, A passe la scalmane); no stin po discori dai framassons. Chei, invezit che par ligjeris e par barabis, a son tignûts par int di stime (Riedo Pup, Ligjeris, barabis e pacifiscj)
    Sin. vê
    Cfr. calcolâ , considerâ

Polirematichis e espressions idiomatichis

• fâle tignî loc.v.
• fidâ la ore loc.v.
• no fidâ la ore loc.v.
• no jessi sants che a tegnin loc.v.
• no tignî la ore loc.v.
• savê dulà che il diaul al ten la code loc.v.
• tignî a bade loc.v.
• tignî a batiâ loc.v.
• tignî a batisim loc.v.
• tignî a brene loc.v.
• tignî a buteghe loc.v.
• tignî a cjâr loc.v.
• tignî a distance loc.v.
• tignî a ments loc.v.
• tignî adun loc.v.
• tignî adun lis dovis loc.v.
• tignî bacin loc.v.
• tignî bevût loc.v.
• tignî bon loc.v.
• tignî bon bot loc.v.
• tignî bordon loc.v.
• tignî bot loc.v.
• tignî bote loc.v.
• tignî cjalt loc.v.
• tignî come un dêt madûr loc.v.
• tignî come une pipine loc.v.
• tignî compagnie loc.v.
• tignî cont loc.v.
• tignî cont pe spine e pierdi pal cjalcon loc.v.
• tignî cont pe spine e spandi pal cjalcon loc.v.
• tignî daûr loc.v.
• tignî de bande loc.v.
• tignî di bande loc.v.
• tignî di olme loc.v.
• tignî di voli loc.v.
• tignî dret loc.v.
• tignî dûr loc.v.
• tignî fede loc.v.
• tignî fer loc.v.
• tignî front loc.v.
• tignî fûr loc.v.
• tignî i conts loc.v.
• tignî i gnerfs a puest loc.v.
• tignî il dêt tal cûl loc.v.
• tignî il dûr loc.v.
• tignî il flât loc.v.
• tignî il penâl in man loc.v.
• tignî il pît sul cuel loc.v.
• tignî il sac loc.v.
• tignî impins loc.v.
• tignî in bande loc.v.
• tignî in cjalt loc.v.
• tignî in considerazion loc.v.
• tignî in çancis loc.v.
• tignî in dret loc.v.
• tignî in man la pene loc.v.
• tignî in palme di man loc.v.
• tignî in pîts loc.v.
• tignî in rie loc.v.
• tignî in stangje loc.v.
• tignî indaûr loc.v.
• tignî informât loc.v.
• tignî la lenghe a cjase loc.v.
• tignî la lenghe in bocje loc.v.
• tignî la lenghe tra i dincj loc.v.
• tignî la man sul cjâf loc.v.
• tignî la mescule pal mani loc.v.
• tignî la palme loc.v.
• tignî la part loc.v.
• tignî la pene in man loc.v.
• tignî la sporte loc.v.
• tignî lis mans a cjase loc.v.
• tignî lis mans a puest loc.v.
• tignî lûc loc.v.
• tignî man loc.v.
• tignî muse loc.v.
• tignî note loc.v.
• tignî par man loc.v.
• tignî par se loc.v.
• tignî pe cjavece loc.v.
• tignî pe man loc.v.
• tignî pe spine e molâ pal cjalcon loc.v.
• tignî pe spine e pierdi pal cjalcon loc.v.
• tignî pont loc.v.
• tignî presint loc.v.
• tignî salf loc.v.
• tignî sot loc.v.
• tignî spale loc.v.
• tignî strent loc.v.
• tignî sù loc.v.
• tignî sù il balon loc.v.
• tignî sù la anime loc.v.
• tignî sù la barache loc.v.
• tignî su la cuarde loc.v.
• tignî sù la vene loc.v.
• tignî sù trê cjantons de cjase loc.v.
• tignî sù trê cjantons di cjase loc.v.
• tignî tal stomi loc.v.
• tignî tant che un dêt madûr loc.v.
• tignî te gose loc.v.
• tignî tierç loc.v.
• tignîle curte loc.v.

Proverbis:

• a tignî i dincj denant de lenghe, al è simpri un bon consei
• a tignî i dincj sierâts in bocje, al è simpri un bon consei
• a tignî la bocje sierade, no jentrin lis moscjis
• ai malâts no si po tignîur il suspîr
• al è lari cui che al robe e cui che i ten il sac
• al è lari tant cui che al robe che cui che al ten il sac
• al è miôr tignîlu pe brene che no alçâlu pe code
• al è tant lari chel che al robe che chel che al ten il sac
• al fâs mâl tant cui che al ten che cui che al scortee
• al fâs mâl tant cui che al ten che cui che al scuarte
• chê persone che no ten la mortificade, no vignarà mai ni buine ni brave
• cuant che la polente e je piçule, tenti la tô fete in man
• cui che al à fortune che se tegni
• cui che al ten cont dal pôc al ten cont ancje dal trop
• cui che al vûl un mangjon che al tegni un stiçon
• daspò mangjât e bevût, une prese di tabac e ten passût
• daspò mangjât e bevût, une prese e ten passût
• il forment plui si lu ten e plui ben si lu vent
• la cite rote e je chê che e ten dûr
• la femine dal mulinâr e ten simpri un biel gjalinâr
• miôr ten, ten che no pie, pie
• miôr tignîlu pe cjavece che no alçâlu pe code
• no bisugne tignî pe spine e pierdi pal cjalcon
• no si po tignî e scorteâ
• nol vâl tignî sierade la spine se il vin si spant pal cjalcon
• sac forât nol ten farine
• se il draç nol ten aghe, al reste bagnât
• ten la puce lontan di cjase
• une bree che no ten claut e je dome di brusâ