Dizionari de Lenghe Furlane

tignî a ments    [AF]

1. loc.v. tignî te memorie, no dismenteâ:  tu mi âs dit une volte, e le ai simpri tignude a ments, che ognun devi impaçâsi tai siei afârs (Anute Fabris, A passe la scalmane); al jere un forest, un soldât passât di là, che al veve tignût a ments là che e jere stade soterade la casse dal reziment, e cumò al jere tornât a cjolile (Pieri Menis, Il forest)
   Sin. visâsi , ricuardâ , ricuardâsi , impensâsi
2. loc.v. considerâ cun atenzion:  bisugne tignî a ments che la popolazion che lu fevele [il grison] no rive nancje al numar dai abitants de sole citât di Udin: a saran, si e no, sessante mil personis (Josef Marchet, Autonomie e lengaç); «[…] ten a ments une robe, jo o soi libare e sovrane, e o fâs dut chel che mi ven tal cjâf…» (Carlo Sgorlon, Il dolfin)
   Sin. vê a ments , tignî in considerazion , badâ , abadâ , viodi , cjalâ , pensâ , considerâ , tignî cont , tignî in cont
   Cfr. visâsi , ricuardâsi , impensâsi
3. loc.v. vê cure di cdn. o di alc:  nol jere nissun, nome il pizighet a tignî a ments che cualchi frutaçat nol les a puartâ vie lis rosis des sepulturis (Pieri Menis, Un macet di sanmartinis); cumò a jerin ancje i nonos di tignî a ments (Maria Forte, Cjase di Dalban)
   Sin. viodi , stâ sot , tignî di voli , cjalâ , dâ abade , abadâ , badâ , stâ daûr , tignî cont
   Cfr. tignî , guviernâ , regolâ
4. loc.v. stâ atent par se stes:  l'indoman il segretari politic al mandà a clamâ chel lengonat e i spiegà che, se nol fos stât par rispiet da la etât, i varès insegnât lui a misurâ lis peraulis: che al tignìs a ments (Pieri Menis, Il «comandatôr»)
   Sin. viodi , stâ atent , stâ in vuardie , stâ in vuaite

Components:

• ments s.f.
• tignî v.tr., v.intr.