Dizionari de Lenghe Furlane

abadâ  a|ba|dâ  [AF]

1. v.intr., v.tr. dâ atenzion o impuartance a cdn. o a alc:  Tilde e jentrà sot dal toglât e no i abadà plui a ce che al sucedeve intal curtîl de cjasone (Gianni Gregoricchio, Trê feminis); la corint di aiar e jere tant fuarte che un conseîr al domandà dôs voltis che si tignìs sierade la puarte, ma nissun i abadà (Agnul di Spere, Un sorbet di limon); cuant che i passave la fumate, Ulive e tentave di dîi alc, ma lui no le abadave (Maria Forte, La tiere di Lansing)
   Sin. stâ atent , viodi , cjalâ , stâ daûr , lâ daûr , fâ câs , dâ abade
   Var. badâ
2. v.intr., v.tr. viodi di cdn. o di alc, che al stedi ben, che al ledi indenant ben e v.i.:  tu sta atent de casere e abade dal fûc de cjarbonere, e che al si fâsi ben planc il cjarbon (Pieri Somede dai Marcs, Co une vôs e clame); a vevin cjolt un purcit a miezis e i abadavin une zornade parom (Meni Ucel, Mieç purcit)
   Sin. viodi , impensâsi , stâ daûr , tignî di voli , atindi
3. v.intr., v.tr. (ancje ass.) meti impegn, interès:  Pauli al abadave dome a ridi e a studiâ matanis che a mandavin in fote sô agne Gjeme (Gianni Gregoricchio, Trê feminis)
   Sin. viodi
   
   1. stâ atent di no fâ alc o che nol sucedi alc:  "Ben, abadait, eh, di dî mâl di cualchidun culì…" (Alviero Negro, Int di masnade)
      Sin. cjalâ , viodi , vuardâ , vuardâsi , stâ atent

Proverbis:

• a lis cjacaris des feminis no si abade
• cui che al abade ogni nûl no si met mai in viaç
• fâs ce che tu âs di fâ e lis cjacaris de int no stâ abadâ