vuardâ
vuar|dâ
[FO]
-
v.intr.
(loc.)
viôt cjalâ
:
Micjeil al ju scoltava bel vuardantju sora dai ocjai (Novella Cantarutti, Micjeil di Citia);
jo i soi vecja, e i vuardi dut coma di lontan (Pier Paolo Pasolini, I Turcs tal Friûl)
Var. guardâ
-
v.tr.
tignî sigûr di pericui o di alc di negatîf:
parcè ise une famee, se no à di viodi de fiolance, se no à di menâ par man i fruts tant che a imparin a cjaminâ te vite, se no à di vuardâju dai pericui? (Josef Marchet, Lis predicjis dal muini);
preìn il Signôr che nus vuardi lui (Gianni Gregoricchio, Trê feminis);
il gnûf malan al veve vuardât i politics de rabie de int che e stave pierdint la pazience (Francesc Placerean, Cuintristorie dal Friûl dal 1866 fint in dì di vuê)
Sin. protezi
, difindi
-
v.tr.
tignî di cont, conservâ:
chês tredis cjartis di dîs mil da la une […] lis veve cjapadis lui […]: capitâl di vuardâlu plui de salût, e di staronzâlu un pôc a la volte cul timp a lâ (Meni Ucel, La vacje);
[lis santis] a jerin passadis tra lis mil tentazions dal mont vuardant la lôr purece (Meni Ucel, Otavari a Madone);
cheste fraternitât tignìnle; vuardìn i nestris valôrs (Francesc Placerean, Si savarìn a dî fra dîs agns!)
Sin. tignî cont
, travuardâ
, vuardiâ
, salvâ
-
v.intr.
[BF]
stâ atents che nol sucedi alc, soredut di no fâ o di no dî alc:
jo us al dîs a vô fantatis, / se no sês in promission, / vuardait ben, no fait lis matis (Ermes di Colorêt, II, 72)
Sin. viodi
, cjalâ
Polirematichis e espressions idiomatichis
Proverbis:
- cui che al vuarde la sô vite al vuarde un grant cjistiel
- dai amîs mi vuardi jo, dai nemîs mi vuardi Gjo
- dai nemîs mi vuardi jo, dai amîs mi vuardi Gjo
- Diu nus vuardi dai scalçs di piore e des scuarnassadis di cai
- Diu nus vuardi dal sut tra lis dôs madonis
- Diu nus vuardi des scuarnassadis di cai
- Diu nus vuardi di piês che mâl a 'nd è avonde
- Diu nus vuardi di un bon Zenâr par podê jemplâ il granâr
- Diu nus vuardi simpri dal sut
- i fruts e i mats a àn simpri l'agnul custodi a vuardâju
- il Signôr nus vuardi dai invidiôs
- il Signôr nus vuardi dai scalçs di zupet
- il Signôr nus vuardi des tristis lenghis
- la femine di mâl fâ, al è dut dibant di fâle vuardâ
- Sante Barbare benedete vuardaitnus dal ton e de saete
- Sante Barbare e Sant Simon vuardaitnus dal lamp e dal ton
- vuardilu ben, vuardilu dut: l'om cence bêçs tant che al è brut