Dizionari de Lenghe Furlane

difindi  /-fì-/  di|fin|di  [FO]

1. v.tr. salvâ, tignî cdn. o alc sul sigûr rispiet a une menace, a un pericul, a un atac e v.i.:  i soldâts a àn di jessi convints che a van a difindi la patrie, ancje se a partissin a concuistâ l'imperi, o la Libie, o la Albanie o la France (Riedo Pup, Tal non di Raffaella afârs e guviars)
   Sin. parâ , protezi , vuardiâ
   
   1. (fig.) cirî di no pierdi alc, di no fâsal puartâ vie:  il campion al difint il titul mondiâl
   2. (fig.) cirî di fâ stâ ben, sigûr, san e v.i. devant di une situazion negative, dificile, discomude e v.i.:  une tasse di lens ben taiâts, e il fogolâr pront a difindi la famee dal Invier, par tant che al vueli fâ criùre (Maria Forte, Cjase di Dalban)
      Sin. parâ , protezi
2. v.tr. sostignî une reson, une part:  [il cont Asquini] al faseve l'avocat a Udin: tal consei citadin al difindeve i contadins cuintri dai nobii che a volevin puartâur vie il dirit di vôt tes assembleis provinciâls (Pierluigi Visintin, Friûl e furlans te Histoire de ma vie di Giacomo Casanova); lis feminis le odeavin, ma i oms a cirivin di difindile e di contindi che lis acusis cuintri di jê a jerin dutis bausiis (Carlo Sgorlon, Il dolfin)
   Sin. justificâ , parâ , protezi , prudelâ , puartâ , pupilâ , sapontâ , scusâ , sostignî , travuardâ , vuardiâ
   
   1. tratâ masse ben cdn., plui inlà di ce che e merete:  tu la figotis masse, tu difindis masse chê lengonate (Pieri Somede dai Marcs, Barbane)
      Sin. justificâ , protezi , prudelâ , puartâ , sapontâ , scusâ
   2. fâ in maniere che a vegnin rispietâts i interès, i dirits di cdn.:  Fatime e veve bisugne di un om che le sostignìs, che le difindès, che nol permetès che chei altris i mancjassin di rispiet (Carlo Sgorlon, Ombris tal infinît)
      Sin. pupilâ , parâ
3. v.tr. cirî di fâ che alc si conservi o che al vegni rispietât:  no passe setemane che la nestre Regjon no tuteli, difindi e valorizi culture e lenghe furlanis (si fâs par mût di dî) (Riedo Pup, In Friûl cul passepuart); iniziativis par studiâ, difindi e promovi la biodiversitât (Donato Toffoli, Relazion dal Grup di lavôr "Planificazion linguistiche")
   Sin. parâ , pupilâ , sapontâ , sostignî , travuardâ , vuardiâ , protezi , tutelâ
4. v.tr. [CO, TS] sport (ass.) cirî di impedî al aversari di fâ ponts:  dopo fat gol, la scuadre di cjase e à dome difindût e fat cualchi cuintripît