Dizionari de Lenghe Furlane

sostignî  sos|ti|gnî  [FO]

1. v.tr. tignî sù un pês:  il grues pidignûl, che al sostignive la trâf puartante dal toblât, al poiave suntune largje piere scuadrade (Lucio Perès, Une lance longobarde cjatade a Baracêt)
   Sin. tignî sù , tignî
   Var. sustignî , sostegni
   Cfr. poiâ , sopontâ
2. v.tr. (fig.) frontâ, impegnâsi cun sfuarç a pet di alc che al pues jessi considerât un pês, une cjame, une spese e v.i.:  "Oh Signôr, judimi tu, dami la fuarce di sostignî cheste prove… " (Pieri Somede dai Marcs, Mame…); la Regjon e sosten la retribuzion dei docents pes prestazions di insegnament fûr dal orari di servizi (Patrizia Pavatti, Il furlan al è rivât tes nestris scuelis. Si met in vore il Regolament pal insegnament de marilenghe in regjon); i paîs de Sclavanie no puedin sostignî un fuart aument di popolazion cu lis lôr magris risorsis (Josef Marchet, Tra il Lusinç e la Tor); la Republiche di Vignesie e veve bisugne di jentrâ cu lis spesis des sôs vueris. Massime tal 1600 e scugnì sostignî un grant sfuarç militâr pe vuere di Candie (Adrian Cescje, Liniis di storie sociâl e economiche dal Friûl 1500 - 1800)
   Sin. frontâ , sopuartâ
3. v.tr. fâ une cierte funzion:  clame ca, clame là, chel zovin che al veve di sostignî la part plui ridicule nol rispuindeve (Pieri Somede dai Marcs, In teatro)
   Sin. tignî sù
   
   1. fâ di supuart, di struture che e covente par une cierte funzion:  a vuê, cuasi ducj a concuardin che al è il sisteme gnervôs che al sosten il "Se", la cussience e che al puarte indenant lis interazions dal organisim cul ambient (Franc Fari, Eric Pascul, Autonomie e democrazie, i numars de socializazion umane)
4. v.tr. judâ in sens materiâl, cun bêçs, mieçs, azions, impegn e v.i.:  la leç, tra lis altris, e previôt che la Regjon e sostegni la ricercje, la produzion, la comercializazion e l'ûs di struments informatics e tecnologjics par judâ a doprâ in maniere corete il furlan (Carli Pup, Sot atac l'avignî de lenghe furlane); la Republiche di Vignesie e sostignì e e facilità la industrie [di Linùs], viodûts i grancj vantaçs economics (Erika Adami, Cjargne, tiere di tiessidôrs)
   Sin. tignî sù , poiâ , judâ , prudelâ
   
   1. nudrî inte misure necessarie:  un mangjâ puar, che nol pues sostignî cui che al fâs lavôrs pesants
   2. permeti di vê fuarce, salût e v.i.:  ogni volte che fevele o che si môf e ansime ce che e po, il cûr no le sosten… (Pieri Somede dai Marcs, Vilie di Nadâl (teatri))
5. v.tr. (fig.) judâ intes dificoltâts, confuartâ cul afiet, i conseis, i fats:  Sonia mi à sostignude par ducj chescj agns, dopo dal faliment dal gno matrimoni (Gianni Gregoricchio, Trê feminis)
   Sin. judâ , tignî sù , fâ fuarce , poiâ
   
   1. servî di confuart:  il no savê, intant, le faseve vivi te sperance e la sperance e je la uniche robe che e sosten l'om te vite (Roberto Ongaro, Il muc)
6. v.tr. (fig.) dî o scrivi in maniere argomentade une idee, une opinion, une posizion e v.i.:  il filosof Tagliagambe al à sostignût che intal ciberspazi la sincronie e trionfe su la diacronie, o sei il spazi le vinç sul timp (Mario Turello, Il brevet); come che al jere vistût mi someave propit un strion e invezit al sostignive teoriis sientifichis une vore modernis (Checo Tam, X-Reihen); jo al contrari mi soi intestardît, / e sosten che i afârs laran pulît (Pieri Çorut, Pronostic del 1821)
   Sin. afermâ , contindi , dî