Dizionari de Lenghe Furlane

poiâ  po|iâ  [FO]

1. v.tr. meti jù, spec. cun atenzion, cun curie, in mût che al tocji, o che al stedi cul pês su alc che al è sot o in posizion tâl di sostignî:  Miute e tirà fûr di sot la cotule, cence fâsi viodi, un sacut cui ûfs e i lu poià sul cjar (Angelo Covazzi, Baratâ); al pontave la vuate, al justave lis nassis che al poiave sot lis rostis di pantan (Maria Forte, Il vivi al è chel rangjâsi); metude la cole, a vegnin poiadis sul panel lis tessarutis e si tachin une dongje di chê altre (Oscar Puntel, Mosaic, une art furlane)
   Sin. meti jù
   Cfr. distirâ , pogni , meti
   
   1. meti une part dal cuarp in maniere che e tocji e che e stedi cul so pês su alc o su cdn.:  - No ti sintistu ben, Lene? - i disè Anute, poiantji une man su lis spadulis (Pieri Menis, Sul agâr)
   2. meti ancje in sens gjeneric, o cun sens di contat, aderence, vicinance e sim.:  a distacava ogni not il mac [di clâfs] da la cintura par poâlu sot dal cussin (Novella Cantarutti, Li clâfs); il mâl i cjapà tal vinars di sere, che e faseve tremâ il jet e scjaldâ la cjamare pe fiere. Miedis talians no 'ndi jere. Catin i poiâ un trat di ûf sui pîts (Maria Forte, Dome la cjampanute di Sant Bortul); chei di ca ti poin lis vuardiis par difindi la libertât e chei di là istès (Tarcisio Venuti, La cjase di Toni)
2. v.tr. meti par tiere o meti vie o meti tal so puest o lassâ tun ciert puest alc che par un pôc no si dopre:  finît il to bal, cuant che chê musiche mute e torne a sei dome un spazi vueit che nol vûl jemplâsi, alore tu pois lis scarpis (Antescûr, Milonghe)
   Sin. meti vie , meti jù , meti in bande , lassâ
   
   1. lassâ in soste un mieç di traspuart o ancje une bestie:  no 'nd è puest di poiâ la machine (Franco Marchetta, Light my Fire); ce vitis a passâ jenfri a tante int par rivâ te ostarie di Scoi a poiâ il cjaval (Pieri Menis, Chei di Muraie)
      Sin. lassâ
3. v.tr. meti par scrit:  no jere la muart se al poiave une firme secont che lu vevin conseât (Meni Ucel, Ideis)
   Sin. scrivi , meti
4. v.tr. (fig.) sotignî cdn. o alc, jessint in cunvigne cu lis opinions o ancje judant tai fats:  Fausto [Schiavi] al dimostrà tante clarece di pinsîr e tante determinazion che intor di lui si formà un grup di personis che lu stimavin e lu poiavin (Adrian Cescje, Tal non di Fausto Schiavi); i Savorgnans a svilupin une politiche dinamiche, ancje dal pont di viste economic, che ju puarte a poiâ i popolârs e lis comunitâts rurâls intai scuintris cu la nobiltât feudâl (Carli Pup, Il Friûl de Joibe Grasse dal 1511)
   Sin. sostignî , tignî sù , judâ
5. v.tr. (fig.) fondâ su argomentazions, su poiis concetuâls:  chei furlans […] a vevin capît che la autonomie a varessin vût di poiâle suntune fonde identitarie (Adrian Cescje, Memoriis di politiche linguistiche); tornâ ae storie nol è, duncje, pal cristian un tornâ indaûr ma un tornâ ae veretât gjenuine sedi de fede gjenerâl sedi de glesie locâl […] Nome su cheste fonde storiche si po poiâ une pastorâl serie, al conclût pre Checo (Gian Carlo Menis, Pre Checo e la storie)
   Sin. basâ , fondâ , meti jù
6. v.tr. fâ une azion che e compuarte un contat fisic:  Zuan al poià ancjemò une cjarece sul cjâf dal frut po si invià par lâ sù a durmî (Maria Forte, La tiere di Lansing); poiâ un pataf
   Sin. dâ , dâ sot , rafilâ , scussâ , slungjâ , tirâ
7. v.intr. jessi intun ciert puest, spec. parsore di alc:  la pipe ongjarese i poiave sul stomi, e spandeve bufulis di fum (Maria Forte, Il Bulo di Crodio); il palc di scjalâr pai sunadôrs al poie sun dôs cemplis voltadis cu la bocje injù (Dino Virgili, La aghe da pît la cleve); su la plane [dai barcons] a poin vâs di canelons florîts o di sclopons (Pieri Somede dai Marcs, Corpus Domini)
   Sin. poiâsi , jessi¹ , stâ
8. v.intr. fâ sintî, fâ viodi, fâ notâ il pês:  no si inacuarzeve nancje di no savê ridi; lui ancjemò cussì zovin. Su la muse lis pleis suturnis da la anime, i poiavin ancje plui agn (Maria Forte, La tiere di Lansing)
   Sin. pesâ , cjalcjâ
9. v.intr. (fig.) stâ sù suntune cierte fonde:  il Sindic, siôr Talico Gavot, gastalt dal cont, al poiave suntune salde maiorance (Dino Virgili, La aghe da pît la cleve)
   Sin. basâsi , fondâsi , jessi sore , poiâsi , vê base , vê fonde
10. v.intr. [TS] mar. slontanâ la prore di une imbarcazion a vele de direzion di indulà che al rive l'aiar par favorî la azion su lis velis
    
    1. aer. fâ zirâ la prore dal aeromobil viers la part contrarie di indulà che al sofle l'aiar

Polirematichis e espressions idiomatichis

• poiâ ben loc.v.
• poiâ i voi loc.v.
• poiâ i vues loc.v.
• poiâ il cûl loc.v.
• poiâ jù loc.v.
• poiâ la strache loc.v.
• poiâ pît loc.v.
• poiâle v.pron.
• poiâlis v.pron.
• poiâlis jù loc.v.
• poiâlu v.pron.