Dizionari de Lenghe Furlane

dâ  dâ  [FO]

1. v.tr. meti ce che si à in man te man di cdn. altri:  sul cjar, mê agne Taresine jai da sù [i fassuts di lens] a mê mari su la trombe e mê mari jai da sù a Beput Cinisiti intent a intassâju su la tieze (Ivano Urli, Beput Cinisiti); a jerin ducj li! In cercli, cidins, ognidun cuntune cjandele in man che lu cjalavin. Lu spietavin. Une femine i de une cjandele ancje a lui (Gianfranco Pellegrini, Sium de Vilie dai Sants)
   Sin. consegnâ , dâ fûr , meti fûr , passâ
   
   1. fâ che alc che si à lu vedi cdn. altri:  là si lavorave ducj e simpri; e ti davin puntuâl e just fin la ultime corone (Riedo Pup, I furlans e la Austrie); dut il so lu veve metût te glesie o dât ai puars: tant che, cuant che al è muart, nol veve nancje la cjamese intorsi (Pieri Menis, Il miracul dal plevan di Trep); il cjapitani i vûl tant ben, lu trate come un fi e i à dât in premi un grum di bêçs (Pieri Somede dai Marcs, Vilie di Nadâl (teatri))
      Sin. consegnâ , dâ fûr , meti fûr
2. v.tr. fâ che alc che si à, concret o astrat, lu vedi o lu tegni cdn. altri, ancje cun cundizions particolârs:  dopo che so fradi, subit dopo la vuere, al veve scugnût lâ pal mont a vevin dât a fit chê braide, ma cumò no rindeve plui, bandonade come che e jere, puare e magre (Pieri Menis, Sul agâr)
3. v.tr. fâ che cdn. al vedi alc di mangjâ, di bevi, o alc di cjapâ par bocje o in altre maniere:  galantom, varessiso alc di dânus di gulizion? (Catarine Percude, Il solt del Signôr); e Nardin, che al è muart vecjon? Tal ultin, i vevin dadis lis gotis pal cûr (Riedo Pup, I furlans e la culumie)
4. v.tr. fâ une cualchi azion che e prodûs il passaç di cualchi materiâl:  al jere un lavôr mostro a tignî nete chê tutubie e a dâ une man di blanc a chei mûrs di cjalin, che lu refudavin (Maria Forte, La tiere di Lansing); infin, dopo di vê ben remenât dut il messedot, il frutat al tacà a dâlu su la tele cuntun pinel (Mario De Apollonia, Il timp par ledrôs)
5. v.tr. fâ une cualchi azion che e prodûs un contat fisic cun cdn. o cun alc:  il prin intant si jere jevât in pîts e al veve tacât a dâi pidadis a Zac cui siei anfibis (Franco Marchetta, Light my Fire); une dì lui i domande di podê dâi une bussade e no i colin lis fuarcis se jê i dîs sul imprin "ma lafè no", cui voi che i lusin "ma lafè sì (Ivano Urli, Storie di Vera); no si podeve dîjal a so pari, al jere come dâi un pataf in muse, une curtissade tal cûr (Dino Virgili, La aghe da pît la cleve); Elio, aromai cu lis mostacjis blancjis, al riduce e nol dîs nuie, e al da une lecade al gjelât (Spirt Anonim, Gjelât di cjocolate)
   Sin. molâ , petâ , pocâ , sburtâ , sestâ , sgnacâ
   
   1. ancje fig.:  o scuen spesseâ a fâ alc, cumò che Fausto al pues judâmi… al pues dâ une sburtade… lui che al cognòs tante int (Maria Forte, Cjase di Dalban)
6. v.tr. (ass.) dâ botis, pachis:  Une di e patafave un so fi fûr di mût: une furie. Le viôt Pieri, si ferme e i dîs: «Ma parcè po, Mariute, i dâstu in chê forme a chê puare creature?». (Meni Ucel, Gjalinis)
   Sin. petâ , dâ jù
7. v.tr. meti a disposizion alc di concret o astrat par che al vegni doprât o par che cdn. al vedi un vantaç:  che al disi, siôr plevan, e se o podarès dâi un consei o seii util, ben vulintîr (Costantino Smaniotto, Co l'amôr al cimie); par intant si jere ufiert di dâi un passaç cu la machine che al veve lassât tal parc dal aeropuart (Fabian Ros, Un piçul particolâr)
8. v.tr. indreçâ o concedi alc di no materiâl a cdn. o a alc:  jê ur veve dât ospitalitât e afiet, e no dome par vie che lôr le vevin judade intun moment dificil de sô vite (Carlo Sgorlon, Ombris tal infinît); in mancul di cuindis dîs al veve dute la situazion in man e la int e scomençave a smolâsi, a dâi confidence e a vê fiducie (Angelo Covazzi, Il gnûf plevan)
9. v.tr. fâ che alc al sucedi, produsi un efiet:  il fat di vê pedons tes cjasis centrâls al da problemis al aversari parcè che i Pedons a impedissin ai tocs dal nemì di movisi cun libertât (Nilde Teresa Negro, Zuìn di scacs); e jere estrose plui di mai. Dut i dave fastidi (Maria Forte, La fie çuete); la ricercje di materiâl audiovisîf intai archivis e intes cinetechis nol à dât, almancul fin a cumò, grancj risultâts (Fabian Ros, Il fotogram mancjant. Un Friûl cence memorie storiche audiovisive)
   Sin. causâ , causionâ , produsi
10. v.tr. fâ vignî un stât psicologjic o fisic:  il fum, tirât a pet cun gust, i dave un plasevul inzirli (Amedeo Giacomini, Tal ospedâl)
    Sin. fâ , produsi , causâ , provocâ
11. v.tr. fâ che cdn. o alc al vedi une cierte carateristiche, prerogative, denominazion e v.i.:  lis rosis de malve a son decorativis e si doprin par dâi colôr aes salatis (Giorgio Pascoli, Il Litum: jerbis salvadiis te cusine); e valeve la pene di tentâ di dâ dongje cheste socie di students furlans che a operassin pe cause furlane. Pre Checo i volè dâ lui il non di ‘Union furlane dai universitaris' (Adrian Cescje, Memoriis di politiche linguistiche)
12. v.tr. assegnâ alc di fâ:  si inzegne a fâ juste apont il cjaliâr, in spiete che la int i dei di blecâ ca e là, in mût di puartâsi fûr mai alc di campâ (Ivano Urli, Storie di Vera); i vigjii di Codroip no i àn mai dade une multe, parcè che, se ancje i metevin il sflic sul veri, lui al leve a cirîju un par un e ur al tornave (Antoni Beline, Pre Pitin); in gjenar, a ognidun [dai intervistadôrs] a son stâts dâts di fâ cuistionaris tal teritori di residence (Linda Picco, Ricercje su la condizion sociolenghistiche dal furlan)
    
    1. imponi tant che punizion:  i vigjii di Codroip no i àn mai dade une multe, parcè che, se ancje i metevin il sflic sul veri, lui al leve a cirîju un par un e ur al tornave (Antoni Beline, Pre Pitin); un dai trê marinârs al fo fusilât; ai altris doi, tal stes moment, al fo comunicât che ur jere stade dade la pene de preson (Giovanni Pillinini, Zuan Batiste Cavedalis - Une vite esemplâr)
13. v.tr. produsi alc di materiâl o di cuantificabil:  i mostrà il strop des sanmartinis spueadis dal frêt. «A àn dât flôrs di maravee chest an» dissè (Maria Forte, La tiere di Lansing); tai moments di polse, al judave la femine a sgropolâ chei doi cjamputs che i davin la polente (Maria Forte, L'avôt); un invistiment che al da un bon interès
    Sin. butâ , fâ cjapâ , rindi , fâ
14. v.tr. di femine o di mascje di animâl, parturî:  Dree al pensave a Rose, che e jere deventade la sô femine e i veve dâts doi fruts, un par sorte (Gianfranco Pellegrini, Cidulis)
15. v.tr. fâ une cualchi azion che e prodûs une emission, une percezion e v.i.:  Matie al da un berli e i cor dongje: - Sandriii! Ce ti àno fat?!… maladets! (Pieri Menis, Sul agâr); Cun cheste curiositât o sin lâts a dâ un cuc, ancje, ae mostre dai pitôrs carintians (Josef Marchet, Pitôrs di là de stangje); lait a sintî cemût che la scuele e tire sù i nestris fruts; dait une voglade ai lôr libris, ai lôr compits (Josef Marchet, Scuele incurabil); dâ une nasade al tabac
    Sin. butâ fûr , dâ fûr , emeti , molâ fûr , spandi , petâ
16. v.tr. fâ une azion, in gjenar caraterizade dal fat di jessi singule o svelte o pôc curade o imburide o sim.:  une frutate dai sotans che i lavoravin il broili e lave ogni tant a spalancâ un barcon, a dâ une passade al polvar su la mobilie e ai paviments (Dino Virgili, La aghe da pît la cleve); e tire fûr une letare, le spieghe, i dâ une lete, e impie une cjandele e le bruse (Pieri Somede dai Marcs, Un pugn di moscjis); i cjavei drets par aiar che no mi stan jù nancje cul dâur une martielade (AAVV, Sul florî); e à dât une netade ae cjamare (Cristina Noacco, Faliscjis); cjapade pal braç sô sûr, al de un salt fûr de puarte, e jù tun atim dut il mulin si sdrumà te roie (Catarine Percude, La mulinarie)
17. v.tr. fâ alc indreçât a cdn. altri che al domande un impegn, une organizazion e v.i.:  no veve pierdût ancjemò il gust di dâ fiestis in cjase (Carlo Sgorlon, Il dolfin); dâ un riceviment
    Sin. organizâ , prontâ
18. v.tr. impegnâsi par passâ une prove o sim.:  o scugnivi decidimi a dâ i ultins esams e a parecjâ la tesi (Gianni Gregoricchio, Trê feminis)
    Sin. frontâ
19. v.tr. cu la preposizion "di", tratâ intune cierte maniere:  «Par cuant pensistu… Par cuant pensaiso di finîle?» i domandave. «Tu puedis ancje dâmi dal tu, se tu vûs», dissal Eliseo. «Scusait, mi soi sbaliât». «Ma jo o ai miôr se tu mi dâs dal tu». (Carlo Sgorlon, Prime di sere); ti cjalavin tant che se tu fossis un barbezuan, e ti devin ancje dal maleducât, parcè che nol pâr bon fâ il lôf cuant che ducj a fasin lis pioris (Fabian Ros, Il lôf)
20. v.tr. cu la preposizion "par", considerâ, vê un ciert pinsîr, vê une cierte opinion:  i rivà la letare dal Ministeri: Meni al jere dât par dispierdût (Gianni Gregoricchio, Trê feminis); nol conven mai dâ par reâl ce che al è su la cjarte (Mario Dutto, Scuelis di cualitât e lenghis di minorance. Une riflession su la lenghe furlane intes scuelis); al dave par sigûr che a vessin traviersât il flum, invezit Veloce, dopo chê lungje nadade, al jere tornât fûr de stesse bande che al jere jentrât (Roberto Ongaro, Il muc)
21. v.tr. fâ une stime o une prevision:  «Vignint cun me ninin tu âs dome vuadagnât dai, jo vincjesiet agns e tu cuarantetrê». «Che nissun mai da però», al salte sù lui content, metintsi a puest il çuf come chei da publicitât dai shampoo (Maurizio Mattiuzza, Al prossim casting ti sielzin te); dâ un cjaval dîs a un
22. v.tr. dî o fâ savê, comunicâ:  al rive in Comune un telegram dal prefet che al da la notizie uficiâl, al ordene di meti fûr lis bandieris e di «celebrare subito l'avvenimento» (Pieri Somede dai Marcs, 11 di Fevrâr 1929); si fermà sul pat des scjalis tal scûr e al de la buine gnot (Dino Virgili, La massarie); tal indoman, Prin dal an, la canaie su la puarte a dâ il bundì, bon an pai siops (Dino Virgili, La aghe da pît la cleve)
23. v.tr. trasmeti o proietâ alc par radio, par television, al cine e v.i.:  ta chê sere a davin un film di pôre (Checo Tam, Mystical East)
24. v.intr. vê tant che direzion, inclinazion, orientament e v.i.:  la cjanive e dave tun camarin là che al jere formadi, salams, la bafe, un socol (Meni Ucel, I laris); te glesie di Madone di Graciis a Udin, che e da propit sul Zardin Grant, tra ducj i avôts, e je ancjemò une cueste dal drâc (Sandri Carrozzo, Friûl di Magance)
    Sin. cjalâ , butâ , menâ , puartâ , vierzisi
25. v.intr., v.tr. lâ a sbati:  dâ il zenoli intal taulin; al à dât cu la machine tun arbul
    Sin. çocâ , petâ dentri , sbati , dâ dentri , dâ cuintri

Polirematichis e espressions idiomatichis

• a fuarce di dâi loc.av.
• a fuarce di dâi e dâi loc.av.
• a sun di dâi loc.av.
• dâ a diviodi loc.v.
• dâ acet loc.v.
• dâ adun loc.v.
• dâ aiût loc.v.
• dâ biel acet loc.v.
• dâ bon acet loc.v.
• dâ braç loc.v.
• dâ cont loc.v.
• dâ cuarde loc.v.
• dâ cuarp loc.v.
• dâ cuintri loc.v.
• dâ cunvigne loc.v.
• dâ dal nâs loc.v.
• dâ daûr loc.v.
• dâ dentri loc.v.
• dâ di blanc loc.v.
• dâ di braç loc.v.
• dâ di ca loc.v.
• dâ di clostri loc.v.
• dâ di credince loc.v.
• dâ di intindi loc.v.
• dâ di lat loc.v.
• dâ di man loc.v.
• dâ di maravee loc.v.
• dâ di mat loc.v.
• dâ di secont loc.v.
• dâ di stomi loc.v.
• dâ di tete loc.v.
• dâ di tete al mani loc.v.
• dâ di voli loc.v.
• dâ di volte loc.v.
• dâ di volte il cerviel loc.
• dâ di vore loc.v.
• dâ dongje loc.v.
• dâ dut il cûr loc.v.
• dâ fastidi loc.v.
• dâ flât loc.v.
• dâ fonde loc.v.
• dâ fûc loc.v.
• dâ fûr loc.v.
• dâ fûr di mat loc.v.
• dâ i numars loc.v.
• dâ il biel acet loc.v.
• dâ il bon acet loc.v.
• dâ il braç loc.v.
• dâ il cambi loc.v.
• dâ il fum loc.v.
• dâ il gust loc.v.
• dâ il non loc.v.
• dâ il pas loc.v.
• dâ il pet loc.v.
• dâ il tabac loc.v.
• dâ il vie loc.v.
• dâ in man loc.v.
• dâ indaûr loc.v.
• dâ infûr loc.v.
• dâ intal voli loc.v.
• dâ jù loc.v.
• dâ jù pai cuars loc.v.
• dâ la ande loc.v.
• dâ la anime loc.v.
• dâ la anime al diaul loc.v.
• dâ la colme loc.v.
• dâ la gafe loc.v.
• dâ la ghenghe loc.v.
• dâ la idee loc.v.
• dâ la man loc.v.
• dâ la mude loc.v.
• dâ la pâs loc.v.
• dâ la peraule loc.v.
• dâ la plene loc.v.
• dâ la schene loc.v.
• dâ la sonze loc.v.
• dâ la tete loc.v.
• dâ la trate loc.v.
• dâ la vene loc.v.
• dâ la volte loc.v.
• dâ lis spalis loc.v.
• dâ lûc loc.v.
• dâ man fuarte loc.v.
• dâ merit loc.v.
• dâ mût loc.v.
• dâ non loc.v.
• dâ ombre loc.v.
• dâ pan e salam loc.v.
• dâ part loc.v.
• dâ reson loc.v.
• dâ scolte loc.v.
• dâ seont loc.v.
• dâ slas loc.v.
• dâ sot loc.v.
• dâ spali loc.v.
• dâ spali e fuarpiis e tele loc.v.
• dâ strade loc.v.
• dâ strade libare loc.v.
• dâ sù loc.v.
• dâ sù il sanc tal cjâf loc.v.
• dâ sù la fumate loc.v.
• dâ sù la vôs loc.v.
• dâ sui gnerfs loc.v.
• dâ tai gnerfs loc.v.
• dâ tai voi loc.v.
• dâ tal cjâf loc.v.
• dâ tal voli loc.v.
• dâ timp al timp loc.v.
• dâ un non loc.v.
• dâ un pît tal cûl loc.v.
• dâ un salût loc.v.
• dâ un sclop loc.v.
• dâ un ton loc.v.
• dâ un voli loc.v.
• dâ une biele man loc.v.
• dâ une cjalade loc.v.
• dâ une fete loc.v.
• dâ une lezion loc.v.
• dâ une man loc.v.
• dâ une vôs loc.v.
• dâ vie loc.v.
• dâ vite loc.v.
• dâ vôs loc.v.
• dâi dentri loc.v.
• dâi di comedon loc.v.
• dâi di côt loc.v.
• dâi di ghenghe loc.v.
• dâi di gheo loc.v.
• dâi di schene loc.v.
• dâi di sonone loc.v.
• dâi di spente loc.v.
• dâi di vene loc.v.
• dâi di vore loc.v.
• dai e dai loc.av.
• dâi sot loc.v.
• dâle di intindi loc.v.
• dâle intal nâs loc.v.
• dâle sù loc.v.
• tant pete che dai loc.av., loc.inter., loc.adi.inv.

Proverbis:

• a chel mus che nol puarte bast, no si dai vene
• a cui che al cjale il so fat, no si po dâi dal mat
• a cui che nol puarte scjatule, no si dai tabac
• a un che nol à ce fâ, il Signôr i 'nd da
• al è miôr dâ che no ricevi
• bisugne dâi timp al timp
• brût riscjaldât no stâ dâjal a un malât
• chê che al da il Signôr si le puarte vulintîr, chê che si fâs di bessôi e je plui pesante di puartâ
• cualchidun di un côf bisugne dâjal al lôf
• cuant che si è cjocs, ducj a dan di bevi
• cui che al à binde le po dâ
• cui che al da al ricêf
• cui che al da al torne a cjapâ
• cui che al da daurman al da dôs voltis
• cui che ind à al à ancje di dânt
• da la albe si da il bundì
• dai a Cesar ce che al è di Cesar, dai a Diu ce che al è di Diu
• dai al cjan che al è rabiôs
• dai al cjan cuant che al scjampe
• dai semule al mus, tu vanzis scalçs
• dai tu mari, capìs tu brût
• dâi une femine zovine a un vieli al è tant che dâi une cocule a un frut
• dal dâ al vê e passe une biele diference
• daspò fat ognidun al da consei
• Diu mieze zornade le passe a fâlis, e chê altre mieze a dâlis
• dulà che si à di dâ no si po scuedi
• e je caritât tant a judâ cui che al vûl fâ robe, come a dâi un poc a cui che al vûl lâ in malore
• i bêçs scuindûts no dan pro
• i dan trê dîs ancje a cui che a àn di picjâ
• i fruts no disin: pari biel, mari biele; ma: dami alc in te scudiele
• il lôf no i domande al pastôr che i dei lis pioris
• il muart al puarte vie ce che al à dât
• il Signôr ind à di dânt a ducj
• il Signôr no ur da i dincj ai crots par che no çoncjin il palût
• il vassiel al da chel vin che al à
• il vin i da fuarce a la lenghe e ur e cjol a lis gjambis
• in vuere si va cun doi sacs: un par dâlis e un par cjapâlis
• la blesteme a va ator siet agns e po e torne a colâ su par cui che le da
• la bote e da di chel savôr che e à
• la bramazion e ven, e va; po e torne su la schene di cui che le da
• la buine dote le da il pari, la buine femine il Signôr
• la fam i da bon savôr al pan
• la femine e à il cûr a fetis e, se lis da, no son mai netis
• la gracie di Diu e je dade par che si gjoldi
• la lenghe no à vues ma si fâs dâ sul dues
• la vît e dîs dâmi che ti darai
• mâl par cui che lis da, piês par cui che lis cjape
• maridaitlu: mari, daitlu!
• miôr dâ la lane che no la piel
• miôr dâ la lane che no la piore
• nissun nol po dâ ce che nol à
• no si da mai la rassade se no je plene la mezine
• no si da pan che nol puarti ancje un insegnament
• no si po dâi al paron? une clapade al cjan
• nol è stiç che nol dei fum
• nol zove predicjâ se esempli no si da
• par nuie nissun nol da nuie
• robe dade mai tornade, cul curtìs insanganade
• robe dade, mai plui tornade
• Sant Roc i da la clâf a ogni pitoc
• Sant Simon i da la clâf al so paron
• se si da la man bisugne dâ ancje il braç
• si da il bundì e il bon an daûr de persone
• si da la rassadorie cuant che e je plene la misure
• si daur il sorc ai purcits magris
• si scuen contentâsi di ce che al da il covent
• tes barufis si va cun doi sacs: un par dâlis e un par cjapâlis
• tes causis a vuelin trê robis: vê reson, savêle dî e cjatâ cui che le dedi
• tirâ il pont tant che si po, ma dâi a ognidun il so
• un arbul che nol florìs nol da pomis