Dizionari de Lenghe Furlane

meti fûr    [AF]

1. loc.v. meti tun puest o di une bande esterne:  il toc cjapât al ven metût fûr de scachiere (Nilde Teresa Negro, Zuìn di scacs)
   
   1. meti tun puest dulà che ducj a puedin viodi:  al mancjave nome chel verzot che sul «Messaggero» al à cainât cuintri il sindic di Udin, parcè che nol à dât ordin di meti fûr lis bandieris a mieze aste (Josef Marchet, Blestemis)
2. loc.v. slungjâ une bande dal cuarp fûr di une puarte, di un barcon e v.i.:  so pari, lu cjapave tal braç e lu puartave disore a meti fûr il cjavut pe barconete de colombere (Dino Virgili, La aghe da pît la cleve)
3. loc.v. dâ, soredut in riferiment a alc che al è tignût dentri di alc o tignût di cont:  la int è cussì dure di meti fûr un franc (Pieri Somede dai Marcs, Vilie di Nadâl (teatri)); "O che tu metis fûr cincuante mil cjartis o che tu vegnis cun nô!" (Pieri Menis, Sul agâr)
   Sin. tirâ fûr , dâ
   Cfr. paiâ
4. loc.v. meti alc di bevi tes tacis o alc di mangjâ tai plats e servîlu:  dopo di vêi metût fûr un tai di vin, i disè: "Cumò bêf un sclip e po scoltimi e disimi se ti pâr che le vedi pensade juste." (Roberto Ongaro, Il muc); Marie e scjalde un pôc di lat su la plote dal spolert e lu met fûr in cuatri scudielis (Marisa Moretti, Neveade)
5. loc.v. fâ lâ ator, fâ che alc al vedi distribuzion, circolazion e v.i.:  pal mês di Jugn il guvier al varès metût fûr un gnûf tipo di monede (Pieri Menis, Lis leiendis di Buie); cuant che al jere dut pront, Graziella e à fat un biliet che e organizave une fieste e lu à metût fûr in repart li che e lavorave (Mario Beltramini, Jo e Graziella)
   
   1. publicâ:  chest gjornâl al veve metût fûr un concors fra i soldâts, che a podevin scrivi lis lôr impressions di vuere (Pieri Menis, Cemût che o soi restât caporâl)
6. loc.v. fâ che alc al tachi a jessi cognossût, savût:  jo scometarès il cjâf che cheste e je une invenzion metude fûr a pueste de int invidiose (Luigi Gortani, Il tor di Mueç); Lis pratesis che e metin fûr di une bande e di chê altre, la pôre tremende che e àn un dal altri, la ustinazion che e mostrin ognidun tes lôr impinions e son tant in contrast che no si po viodi di ce bande che e podarès vignî une sclaride (Josef Marchet, Siarâ i voi par no viodi)
7. loc.v. dî, pronunziâ:  Jole, pe sorprese, no saveve scuasi meti fûr une peraule (Carlo Sgorlon, Il dolfin)
   Sin. dî , dî fûr

Components:

• fûr av., prep., inter., adi.inv., s.m.sing.
• meti v.tr.