Dizionari de Lenghe Furlane

meti  /-è-/  me|ti  [FO]

1. v.tr. fâ stâ intun ciert puest, intune cierte posizion o situazion, intun ciert ordin e v.i.:  al cjape la letare e le met te buste (Pieri Somede dai Marcs, A la oselade); ogni tant al lave in cimitieri a meti cualchi rose di prât su lis tombis dai siei (Carlo Sgorlon, Prime di sere); la piçule me à metude tal braç a mi, che o le figoti (Josef Marchet, Lis predicjis dal muini)
   Sin. logâ , ordenâ , plaçâ , sestâ , poni
   
   1. ancje cun infinitivis:  e meteve a suiâ la lissie sul fîl di fier (Dino Virgili, La aghe da pît la cleve); se i va i met a rustî cualchi fete di polente di compagnâ cuntune scaie di formadi (Alan Brusini, Gian Paolo Linda, I forescj)
2. v.tr. fâ stâ alc sul cuarp par vistîsi o par vistî cdn.:  Gjelmo, il prin fradi, al jevà sù, al le a meti la gjachete di fieste e si invià pal troi dal Ronc (Dino Virgili, La division); usgnot o vês di meti la cotule plui scure che si scuen fâ la vegle (Maria Forte, La cjase dal Murat)
   Sin. meti sù , meti intor , metisi
   
   1. ancje di altris robis che si puedin meti sul cuarp, tant furniments, medisinis, prodots di cosmesi e v.i.:  lis fantacinis alore a metevin ancje un fregul di sbelet sui lavris (AAVV, Sul florî)
3. v.tr. fâ che un aparât, un sisteme e v.i. al sedi tal puest e te cundizion che e covente par funzionâ:  l'apartament di vie Volturno al fo un afâr pe Cooperative di informazion furlane, che e rivà a disponi ancje de terace dulà meti la antene (Max Mauro, Un Friûl difarent: i 90 mhz di Onde Furlane); […] la cjasa a è vecja e i ai cugnût cambiâ sù dut un pôc a la volta: sufitâ, sgrandî i balcons, butâ sul salâr la mubilia vecja e adès i splani il fogalâr e i met la stua (Novella Cantarutti, Il sâr Menon)
   Sin. tacâ , montâ , meti sù , meti jù
4. v.tr. doprâ, impleâ un ciert impegn, une cierte fuarce, une cierte risorse e v.i.:  Samo Pahor di Triest, che si bateve par dutis lis minorancis cu la stesse convinzion e passion che al meteve par pretindi i dirits linguistics de sô comunitât linguistiche slovene (Adrian Cescje, Memoriis di politiche linguistiche); se jo no met dut l'inzen par fâlu pulît, se no mi ven fûr un lavôr come cu va, mi pâr simpri di robâ la palanche al gno prossim (Josef Marchet, Lis predicjis dal muini)
   
   1. impegnâ o impleâ une sume:  a metevin cinc centesims parom par procurâsi il vin e un zigar che a fumavin in volte e sal passavin (AAVV, Sul florî)
   2. impegnâ intune scomesse:  meti dut sul ros
      Sin. scometi , zuiâ , pontâ
   3. doprâ un ciert timp:  par rivâ li de Kaiserpfalz al metè un cuart di ore (Agnul di Spere, Un cidinôr todesc)
      Sin. stâ , impleâ
5. v.tr. fâi che cdn. al fasi alc:  [il vescul Battisti] al metè diretôr di La Vita Cattolica pre Domeni Zanier (Adrian Cescje, Memoriis di politiche linguistiche); mestri Pieri lu metè a tirâ il sfuei e i racomandà di no lassâ brusâ i fiers che a jerin tal fûc (Roberto Ongaro, Il muc); dopo vê metût a durmî i fruts, Anute e tornà jù ben planc tal fogolâr, dulà che al jere restât Matie di bessôl (Pieri Menis, Sul agâr)
6. v.tr. semenâ o implantâ:  lôr a varessin volût meti vîts, ma lui no «Vigne a 'ndi vin avonde» ur disè «Miôr morârs cumò che la sede e va sù» (Maria Forte, La tiere di Lansing); doman soi libar, o vignarai cui bûs a judâus a arâ il cjamp dai Vieris par meti forment (Pieri Somede dai Marcs, Vilie di Nadâl (teatri))
   
   1. destinâ a une cierte culture:  meti un cjamp a blave
7. v.tr. tignî in vendite o a disposizion dai clients o dai utents, ancje specificant un ciert presit:  a àn metût i ûfs a un euro e cuarante; meti un servizi a gratis
8. v.tr. imponi in fuarce de autoritât:  il Parlament de Patrie dal Friûl al mandà ambassadôrs a Vignesie par dî al dôs di no meti une tasse su la sede (Adrian Cescje, Liniis di storie sociâl e economiche dal Friûl 1500 - 1800); al tire fûr un notes e mi met la multe (Pieri Somede dai Marcs, Ursule)
   Sin. fissâ , imponi
9. v.tr. considerâ o presentâ intune cierte maniere, in cierts tiermins:  o ai metude la cuistion in cheste maniere: […] o ai domandât cui che al è par costruî il sisteme di rapresentâju cu la pipe ["ç" e "z"], e cui no (Adrian Cescje, Memoriis di politiche linguistiche); "Mi soi cjatât cussì [di jessi nassût cristian] e o soi content. O voi indenant pe me strade: no ai voie nancje jo di cambiâ, […]. E alore, disêtmi voaltris parcè che un turc al varès di deventâ diferent di ce che al è?" "Sì, metude cussì e pararès juste." (Franco Marchetta, Madalene)
   Sin. metile , sclarî
10. v.tr. cjapâ in considerazion tant che ipotesi:  Se al viodeve, metin, vignî fûr un di une bande là che a no jerin i siei cjamps, lu frontave cun tante polegane che lu faseve colâ (Lucio Perès, Vigji il vuardian); o pensi di sierâ chescj ricuarts intune capsule a timp. Une di chês che si vierzaran… metìn… ca di mil agns (Checo Tam, La maree nere)
11. v.tr. passâ intune cierte forme:  si è cjalât ben di meti in biele lis ideis che i vevin permetût di meti in pîts une industrie in espansion (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); o ai metût agns prime di podê musicâ un test di Turoldo! Mi someave fûr lûc meti in musiche une poesie cussì penze (Erika Adami, "Amôrs" in musiche)
    Sin. butâ , stramudâ , tradusi , voltâ
12. v.tr. produsi un efiet, une sensazion e v.i.:  si jere sierade ancje al zûc dal amôr che i meteve nome rabie e gnervôs (Alan Brusini, Par stradis lungjis); Sabide Sante e meteve ligrie a dut il paîs (Pieri Somede dai Marcs, Par une lengate)
    Sin. fâ , dâ

Polirematichis e espressions idiomatichis

• cence meti sâl parsore loc.av.
• cence meti sâl sore loc.av.
• cence meti sâl sù loc.av.
• meti a buteghe loc.v.
• meti a clucî loc.v.
• meti a durmî loc.v.
• meti a fûc loc., loc.v.
• meti a gnûf loc.v.
• meti a la erte loc.v.
• meti a la prove loc.v.
• meti a lis curtis loc.v.
• meti a lis provis loc.v.
• meti a lis stretis loc.v.
• meti a mâl loc.v.
• meti a muse loc.v.
• meti a norme loc.v.
• meti a nût loc.v.
• meti a part loc.v.
• meti a pont loc.v.
• meti a pro loc.v.
• meti a prove loc.v.
• meti a puest loc.v.
• meti a sac loc.v.
• meti a tasê loc.v.
• meti adun loc.v.
• meti ae prove loc.v.
• meti aes provis loc.v.
• meti ai fiers loc.v.
• meti al scuviert loc.v.
• meti bec loc.v.
• meti câs loc.v.
• meti corot loc.v.
• meti cu la schene al mûr loc.v.
• meti cuatri peraulis in file loc.v.
• meti cuatri peraulis in rie loc.v.
• meti dacuardi gustâ e cene loc.v.
• meti de bande loc.v.
• meti denant loc.v.
• meti dentri loc.v.
• meti devant loc.v.
• meti di bande loc.v.
• meti di mieç loc.v.
• meti distance loc.v.
• meti dongje loc.v.
• meti dongje vite loc.v.
• meti fiers in aghe loc.v.
• meti fûr loc.v.
• meti grîs tal cjâf loc.v.
• meti i bastons fra lis ruedis loc.v.
• meti i bastons tes ruedis loc.v.
• meti i bastons tra lis ruedis loc.v.
• meti i bregons loc.v.
• meti i dincj su la gratule loc.v.
• meti i dincj sù pe gratule loc.v.
• meti i fiers in aghe loc.v.
• meti i numars in colone loc.v.
• meti i pîts sot de taule loc.v.
• meti i pontins sui îs loc.v.
• meti i voi loc.v.
• meti i voi daprûf loc.v.
• meti i voi intor loc.v.
• meti i voi parsore loc.v.
• meti i vues in rie loc.v.
• meti il bec loc.v.
• meti il câs loc.v.
• meti il cjâf a puest loc.v.
• meti il cjâf a segnâl loc.v.
• meti il cûr in pâs loc.v.
• meti il dêt su la gruse loc.v.
• meti il dêt su la plaie loc.v.
• meti il nâs loc.v.
• meti il nâs difûr loc.v.
• meti il piç loc.v.
• meti il pît in fal loc.v.
• meti il pît sul cuel loc.v.
• meti il voli loc.v.
• meti il vues su la belance loc.v.
• meti impins loc.v.
• meti in at loc.v.
• meti in bande loc.v.
• meti in biel loc.v.
• meti in bocje loc.v.
• meti in brute lûs loc.v.
• meti in cjadenis loc.v.
• meti in cjamp loc.v.
• meti in cjarte loc.v.
• meti in clâr loc.v.
• meti in côf loc.v.
• meti in cont loc.v.
• meti in cove loc.v.
• meti in dificoltât loc.v.
• meti in discussion loc.v.
• meti in dismentie loc.v.
• meti in domo loc.v.
• meti in dubi loc.v.
• meti in fîl loc.v.
• meti in libertât loc.v.
• meti in lûs loc.v.
• meti in mieç loc.v.
• meti in moviment loc.v.
• meti in musiche loc.v.
• meti in opare loc.v.
• meti in ordin loc.v.
• meti in pericul loc.v.
• meti in pît loc.v.
• meti in pîts loc.v.
• meti in place loc.v.
• meti in plee loc.v.
• meti in pratiche loc.v.
• meti in prin plan loc.v.
• meti in regule loc.v.
• meti in rêt loc.v.
• meti in rie loc.v.
• meti in schirie loc.v.
• meti in sene loc.v.
• meti in sest loc.v.
• meti in sigurece loc.v.
• meti in stangje loc.v.
• meti in taule loc.v.
• meti in vore loc.v.
• meti in vuardie loc.v.
• meti in zenoglon loc.v.
• meti in zornade loc.v.
• meti in zûc loc.v.
• meti indenant loc.v.
• meti indevant loc.v.
• meti insiemi loc.v.
• meti intal cjâf loc.v.
• meti intal cjanton loc.v.
• meti intor loc.v.
• meti intun cjanton loc.v.
• meti intune loc.v.
• meti jù loc.v.
• meti judizi loc.v.
• meti l'acent loc.v.
• meti la code loc.v.
• meti la code fra lis gjambis loc.v.
• meti la code tra lis gjambis loc.v.
• meti la lenghe loc.v.
• meti la man sul fûc loc.v.
• meti la man tal fûc loc.v.
• meti la man te sachete loc.v.
• meti la muse loc.v.
• meti la pecete loc.v.
• meti la roie loc.v.
• meti la vere intal dêt loc.v.
• meti lidrîs loc.v.
• meti lis braghessis loc.v.
• meti lis mans loc.v.
• meti lis mans daprûf loc.v.
• meti lis mans denant loc.v.
• meti lis mans devant loc.v.
• meti lis mans indenant loc.v.
• meti lis mans indevant loc.v.
• meti lis mans intor loc.v.
• meti lis mans tai cjavei loc.v.
• meti mâl loc.v.
• meti man loc.v.
• meti neri su blanc loc.v.
• meti neri sul blanc loc.v.
• meti par strade loc.v.
• meti pâs loc.v.
• meti perlis in fîl loc.v.
• meti pît loc.v.
• meti rais tes ruedis loc.v.
• meti sot loc.v.
• meti sot des gramulis loc.v.
• meti sot i dincj loc.v.
• meti sot la gramule loc.v.
• meti sù loc.v.
• meti sù buteghe loc.v.
• meti sù cjase loc.v.
• meti sù famee loc.v.
• meti sù la creste loc.v.
• meti su la taule loc.v.
• meti sul cont loc.v.
• meti tal cjâf loc.v.
• meti tal cjanton loc.v.
• meti tal sac loc.v.
• meti tal stomi loc.v.
• meti te panze loc.v.
• meti te stesse pignate loc.v.
• meti tes cuestis loc.v.
• meti trê peraulis in rie loc.v.
• meti tres tes ruedis loc.v.
• meti tun cjanton loc.v.
• meti un blec loc.v.
• meti un stec loc.v.
• meti une buine peraule loc.v.
• meti une peraule loc.v.
• meti vie loc.v.
• metije dute loc.v.
• metile dute loc.v.
• metile tai comedons loc.v.
• metile tal comedon loc.v.
• metile tal cûl loc.v.
• metile tal daûr loc.v.
• metile vie loc.v.
• metilu tal cûl loc.v.
• metìn a dî loc.inter.
• nancje di meti loc.av., loc.inter.
• nancje meti loc.av., loc.inter.
• volê meti loc.v.

Proverbis:

• a cuinçâ la salate al vûl un mat a meti il vueli e un savi l'asêt
• al vâl plui un porco ben metût che no cincuante pater
• al vâl plui un porco ben metût che no un pater mâl disût
• ce che si po fâ vuê, no metii non doman
• cui che al à bêçs di no savê ce fâ, che si meti a litigâ o a fabricâ
• cui che al à bêçs di no savê ce fâ, che si meti in lît o a fabricâ
• cui che al lavore in dì di fieste, il diaul al met la vieste
• cui che al met il cjâf sul çoc i ven taiât
• cui che al met il cûl sore la urtie al sint che i furmie
• ducj use e ducj met la buse
• dulà che il diaul nol po rivâ al met la code
• dulà che il pari al met il claut il fi al picje il cjapiel
• gjave e no met, la fontane a va a sec
• i soflets a metin disconcuardie
• il diaul là che nol met il cjâf al met la code, e cui che no lu cjace lu sacode
• il mont al è fat a scarpet: cui lu gjave e cui lu met
• il mulinâr al met il Signôr difûr par che nol viodi ce che al fâs dentri
• impare la art e metile de bande, il timp al vignarà che la art e valarà
• l'onôr nol met nuie tal cit
• la cise mâl vignude e je piês che no metude
• metimi râr se tu vûs che ti jempli il granâr
• ni par tuart ni par reson no stâ lassâti meti in preson
• no bisugne meti il cjar denant dai bûs
• no meti e gjavâ, dut cuant in curt al va
• no stâ lassâti meti i bregons de femine
• no stâ meti la lenghe là che no ti tocje
• no stâ meti la paie dongje dal fûc
• no stâ metimi spes che no tu âs nissun interès
• nuie si met, nuie si gjave
• par debits no mi picjin e nancje in galere no mi metin
• par taponâ la buse si met une rose
• ravi, ravi: cui che si 'nd vûl, si 'nd gjavi; ravi, raveti: cui che si 'nd vûl, si 'nd meti
• Sant Simon e jude la rave a ven madure, madure o no madure, si le met sot sieradure
• se no passe, metii un stec a la volte
• ta chê lum che nol è vueli, no covente meti pavêr
• tal cjaveç nissun met leç
• un gjave, un met e un sù pal stec
• un mat a meti il vueli, un savi a meti l'asêt
• une gabele no devente puieri cul metii la siele
• une gjave, une met, une picje sù pal stec