Dizionari de Lenghe Furlane

tacâ  ta|câ  [FO]

1. v.tr. fâ che un element al resti a contat o intor di un altri doprant leaduris, cole, cusidurise v.i.:  doi fruts dal Fogolâr a vevin tacât cul scotch sfueis di cjarte celestine cun poesiis scritis cu la machine (Agnul di Spere, Visâsi di chel puint radio); vignît ca, che i us tachi chel boton! Ju pierdês simpri, come i fruts (Anute Fabris, A passe la scalmane)
   Sin. fermâ , fissâ , incolâ ipon. , leâ ipon. , meti , peâ ipon. , saldâ
   
   1. picjâ, cun riferiment a manifescj, tabelis e v.i. che si metin fûr in public:  a Cjampfuarmit […] parsore la puarte di une locande, e àn tacade une piere cu la scrite che e scomence: Napoleon Magnus (Arturo Feruglio, Viaç a Vignesie)
      Sin. meti , meti sù , picjâ
   2. (fig.) meti un sorenon:  i domande perdon par lis malegraciis che al pues vê patît e pal brut sorenon che i àn tacât (Adriano Nascimbeni, Un amôr nassût in ostarie)
      Sin. dâ , meti , picjâ , sgnacâ
2. v.tr. in riferiment a animâi, preparâju par tirâ un mieç di traspuart:  a vevin tacât i bûs par lâ a forment lontan, jù pe Basse, di là da la Aghe (Dino Virgili, La aghe da pît la cleve)
   Sin. meti sot
   
   1. in riferiment a mieçs di traspuart tirâts des bestiis, preparâju cu lis bestiis prontis:  il nono al tacave la briscje par lâ a messe in domo a Udin (Alan Brusini, Come tai romançs)
3. v.tr. fâ passâ energjie eletriche:  tacâ la corint
   Sin. ativâ , azionâ , molâ , dâ
   
   1. (fam.) fâ funzionâ un aparât:  rivât te cjamare al tacà il gramofon e al metè sù il toc plui biel dai Spiders From Mars, "Starman" (Checo Tam, Sense)
4. v.tr. passâ une infezion, un mâl, un parasit e v.i.:  tal gjalinâr dôs polecis a stavin li fermis, cui voi sierâts, e di sigûr a tacavin la malatie ancje a chês altris (Carlo Sgorlon, Prime di sere); no vuei che tu vadis su la rive dai Meus, là di cjase sô, capît? Doi agn fa us à tacât i pedoi a ti e a to fradi, ti visistu? (Carlo Tolazzi, La salamandrie tal fûc)
   Sin. passâ
   
   1. (fig.) trasmeti sintiments, emozions:  cuietiti che tu mi tachis il gnervôs ancje a mi
      Sin. passâ , trasmeti
5. v.tr. butâsi cuintri, assaltâ:  Matie al veve sintude la gnove de sô radio in cjase. La Italie e veve tacade la France (Pieri Menis, Sul agâr); intant che nô ju tacavin cu lis balis di arzile, lôr, sburtâts dal Traibar, di Gramigna e Caisel, nus àn tacâts di ogni bande cun claps e bastons e pugns (Alan Brusini, Amîs come prime)
   Var. atacâ
6. v.tr. ruvinâ, fâ un dam a cdn., a alc, a une part, a un materiâl e v.i.:  peronospore e foncs che a tachin fueis e raps (Enrico Peterlunger, Storie curte de vît in Friûl)
   Sin. mangjâ ipon. , roseâ ipon. , brusâ ipon. , vuastâ , ruvinâ , intacâ , cjapâ , tocjâ
   Var. atacâ
7. v.tr. criticâ, fâ cuintri a cdn., a alc, a une sielte, a une idee e v.i.:  dilunc vie dal lavôr, dispès il progjet al è stât tacât cun polemichis (Sandri Carrozzo, La elaborazion resinte di imprescj lessicografics furlans)
   Sin. contrastâ , criticâ , tarizâ , vituperâ , combati
   Var. atacâ
8. v.tr. (ancje ass.) scomençâ, in sens une vore larc e in diviers contescj, ancje sotintindint une azion:  al lave sù pe stradelute che e menave a cjase des dôs feminis, pensant al mût miôr di tacâ il discors (Roberto Ongaro, Cretevierte); al jere lât dal avocat par tacâ lis pratichis de separazion (Alan Brusini, Amîs come prime); in chê Vierte, Massimo al tacà la cjase gnove (Maria Forte, La tiere di Lansing); propit cuant che o soi daûr a tacâ la butilie de sgnape par dismenteâ, al comparìs pre Nocent (Arturo Feruglio, Viaç a Vignesie); a sîs o vevi di tacâ a vore (Mario Beltramini, Jo e Graziella)
   Sin. començâ , disniçâ , inmaneâ , inviâ , scomençâ , tacâ sot
   
   1. (ass.) metisi a fevelâ, dî alc in principi di un discors o ancje di rispueste a cdn. altri:  "Tatute, continus alc tu usgnot" tache mê sûr (Dolfo Zorzut, No je plui vive)
9. v.tr., v.intr. une vore dispès cun infinitivis, sedi cun verps transitîfs che intransitîfs, par segnâ il principi de azion:  jo e un pâr di lôr si tacà a dâ fûr cartulinis di Nadâl cui auguris par furlan (Agnul di Spere, Visâsi di chel puint radio); Jacum al tacà a mangjâ e a bevi cence fonts (Angelo Covazzi, Fradi dal plevan); si studiavin l'un cul altri, seneôs di savê e tal stes timp spaurôs di tacâ a fevelâ (Franca Mainardis, Il sium di Lissandri); al veve tacât a plovi, e la frute e jere stade tant buine di imprestâi une ombrene par che al ves podût tornâ a cjase cence bagnâsi (Meni Ucel, La ombrene)
   Sin. començâ , scomençâ , tacâsi
10. v.intr. vê principi tal timp, tal spazi, tal ordin logjic e v.i.:  frut, domenie al tache il campionât, il to prin campionât in prime scuadre (Stiefin Morat, Donald dal Tiliment); un grop i vignî sù in gole, e i tacà un baticûr di sclopâ (Maria Forte, La tiere di Lansing); di chê altre bande a tacavin lis cjasis plui bassis di Tresesin (Carlo Sgorlon, Prime di sere)
    Sin. començâ , scomençâ , tacâsi
11. v.intr. fâ prese, scomençâ a jessi, a cressi, a viodisi:  par tiere al è bagnât, la nêf no tache; ancje su la lûs [in salot], grande atenzion: no masse scûr, se no e tache la mufe; e nancje masse soreli, se no i colôrs si smamissin (Riedo Pup, I furlans e il camarin); la muse ruane / di Toni di Place / dimostri che ai Piombi / no tache la glace (Romeo Battistig (?), Ai Piombi)
    Sin. cjapâ
12. v.intr. (ancje fig.) corispuindi in ogni pont:  si à di cjatâ il toc dal puzzle che al tache
    Sin. corispuindi
    Cfr. jentrâ , stâ , lâ , bati
13. v.intr. (fig.) jessi in conession logjiche, vê un sens logjic:  "Su, ghemars, môf chês cjarculis" i zigave daûr, o pûr "Jobul" ancje se chê peraule no tacave gran, in chel moment (Maria Forte, Cjase di Dalban); une liende biade che no ten e no tache (Adrian Cescje, Memoriis di politiche linguistiche)
    Sin. concuardâ , concuardâsi , cumbinâsi , leâsi , tacâsi
14. v.intr. jentrâ in buine relazion, spec. sentimentâl:  intant che nô ju tacavin cu lis balis di arzile, lôr, sburtâts dal Traibar, di Gramigna e Caisel, nus àn tacâts di ogni bande cun claps e bastons e pugns (Pieri Somede dai Marcs, Lassait che mi sbrochi!); e tacave cun ducj: talians, todescs, cravuats, e fintremai cui cosacs (Josef Marchet, Lis predicjis dal muini)
    Sin. fâ tele , cumbinâ , triscâ , intindisi , capîsi
15. v.tr. fâ che si impii il fûc:  po dâsi che a vebin za tacât il fûc ancje tal puarti di cjase (Carlo Tolazzi, La salamandrie tal fûc)
    Sin. piâ , impiâ
16. v.intr. jessi viscôs:  sintî cemût che e tache la peule de trade (Dino Virgili, La aghe da pît la cleve)
    Sin. impeolâ , tacâsi
    
    1. stâ intor, a contat:  i vistîts a tacavin te schene, a fasevin fastidi (Dino Virgili, La aghe da pît la cleve)

Polirematichis e espressions idiomatichis

• a tacâ di loc.prep.
• tacâ barufe loc.v.
• tacâ boton loc.v.
• tacâ discors loc.v.
• tacâ dongje loc.v.
• tacâ i dincj loc.v.
• tacâ intor loc.v.
• tacâ sot loc.v.
• tacâ sù loc.v.
• tache e distache loc.av.
• tant par tacâ loc.av., loc.inter.

Proverbis:

• cuant che no si vûl finî si fâs di mancul di tacâ
• il Signôr nol paie ogni sabide, al va ben planc ben planc, e vie pal timp al va tacant
• il vier al tache simpri il miluç plui bon
• il vier al tache simpri il pom plui bon
• ogni scuse e je buine par tant che e tache
• Sant Antoni, la ocje dal bonparon e tache a pogni, a Sant Valantin chê dal puarin
• sborf, là che si tache no si distache