Dizionari de Lenghe Furlane

inviâ  in|vi|â  [FO]

1. v.tr. fâ tacâ, fâ che alc al scomenci:  ve mo la ocasion buine par inviâ il discors che i stave a cûr (Roberto Ongaro, Cretevierte); un paîs [la Ingletiere] che al veve inviât une industrializazion "salvadie" e une espansion coloniâl ancjetant violente (Angelo Vianello, La evoluzion su la tiere. Une storie di competizion e cooperazion); dome cui agns 90 si son podudis inviâ lis ativitâts aplicativis de normalizazion linguistiche (Adrian Cescje, Memoriis di politiche linguistiche)
   Sin. tacâ , scomençâ
2. v.tr. fâ che alc si meti in vore:  intant che al inviave il motôr al alçà i voi e si viodè tal spieli (Agnul di Spere, In Friûl, nossere)
   Sin. ativâ , azionâ , impiâ , meti in vore , piâ , tacâ
3. v.tr. fâ che alc o cdn. al ledi di une cierte bande:  inviâ il grup bande la jentrade; sburtant cu lis canis dai mitras i cinc presonîrs, ju inviarin par un troi che al menave in paîs (Roberto Ongaro, Il muc); mi displâs par so pari che al à fats tancj sacrificis par inscuelâlu, invezit di inviâlu su la fornâs in Gjermanie (Meni Ucel, Gjigji)
   Sin. condusi , direzi , menâ , vuidâ
   
   1. ancje di subiet inanimât, fâ che il moviment di alc si indreci di une cierte bande:  [une] nape grande a cjampane, cun tante di tindinute tor intor, che e inviave il fum sù pal camin (Roberto Ongaro, Cretevierte)
   2. di vie di comunicazion, permeti di rivâ:  zint insù pal stradon che al invia par li valadi (Novella Cantarutti, L'uminin dai stecs)
      Sin. lâ , menâ , puartâ
   3. (fig.) judâ o indusi a tacâ une cierte ativitât:  al è stât don Maurizio che mi à inviât te religjon (AAVV, Sul florî)
      Sin. direzi , menâ
4. v.tr. fâ che alc i rivi a cdn. o al vegni puartât tun ciert puest:  i lavôrs a varan di jessi o inviâts par pueste (si tignarà cont dal timbri postâl) o consegnâts a man (Fabian Ros, Concors par tescj cinematografics in lenghe furlane)
   Sin. spedî , mandâ
5. v.tr. inform. mandâ in esecuzion