Dizionari de Lenghe Furlane

scomençâ  sco|men|çâ  [FO]

1. v.tr. (ancje ass., ancje fig.) dâ principi a alc:  e scomençave un lavôr, po lu lassave impastanât, e se sô mari i diseve alc i rispuindeve cun malegracie (Maria Forte, La fie çuete); "Oh! no stâ scomençâ la solfe, ti prei" (Pieri Somede dai Marcs, Barbane); a saressin lâts tal barut a buinore, a varessin scomençade la zornade cuntun cafetut (Agnul di Spere, Vivi a Codroip)
   Sin. inmaneâ , inviâ , tacâ , començâ
   Var. començâ , scuminziâ , cuminziâ
2. v.intr. (ancje fig.) vê principi:  a mancjavin ancjemò cuindis minûts prime che al scomençàs il spetacul (Fabian Ros, Un piçul particolâr); li e scomence une galarie che e taie la valadute di Socastoie e po e va sù fin tal cjistiel di Mont (Pieri Menis, Lis leiendis di Buie); doman e scomençave une altre zornade e po e jere come îr, come simpri... e un al ten dûr fin che al po (Dino Virgili, La aghe da pît la cleve)
   Sin. inviâsi , tacâ
3. v.intr. jessi il prin a fâ alc:  "Corigji daûr, scomence tu, po ti ven daûr jo [...]" (Eugjeni Marcuç, Liende a Sant Zuan)
   Sin. tacâ
4. v.tr., v.intr. in costruzions cun "a" e un infinît:  il so cjâf al scomençà a fâ mil calcui, mil suposizions (Roberto Ongaro, Cretevierte); dopo un pôc di chel zito, il cjâf dal copari Tin al scomence un pôc a la volte a colâ sul devant, che al à sium (Meni Ucel, Comprension); ce frêt che al è difûr, al scomence a neveâ, e ven jù une nêf fine fine (Pieri Somede dai Marcs, Gnot di Nadâl)
   Sin. tacâ
   
   1. ancje cence "a" e infinît, cuntune azion che si capìs dal contest, soredut tal sens di vierzi un discors:  "Cjo, Pieri," al scomence el Signôr "cjoligji la cjavece!" "Po sì, sì, puere bestie" al dîs sant Pieri (Dolfo Zorzut, Viôt di no fâ dal mâl al furistîr)

Polirematichis e espressions idiomatichis

• tant par scomençâ loc.av., loc.inter.

Proverbis:

• bisugne scomençâ a puartâ il jôf a buinore
• cuant che a scomencin lis disgraciis bisugne vierzi puartis e barcons
• cuant che si scomence mâl, si finis piês
• cui che al scomence mâl al finìs piês
• cui che al scomence masse voris no 'nt finìs nissune
• cui che al scomence une vore in dì di vinars no le finìs plui
• cui che ben al scomence al è a metât de vore
• cui che ben al scomence ben al finìs
• cui che nol scomence nol fâs nuie
• cui che nol scomence nol finìs
• fâ justizie al è scomençâ une buine strade
• i sants lu scomencin e sant Andree lu finìs
• il pes al scomence a puçâ tal cjâf
• il plui al sta tal scomençâ
• la vitorie e je nemie de vuere, il scomençâ de pâs
• mai no si scomence mai no si finìs
• miôr no dî che scomençâ e no finî
• nol baste scomençâ, bisugne seguitâ
• nol vâl sunâ pal timp co al à za scomençât a tampiestâ
• par fâ bisugne scomençâ
• se tu vûs che i altris a mantegnin il to segret, scomence a mantignîlu tu
• si scomence ben nome dal cîl
• si scomence cul pôc e si finìs cul trop
• une e nissun, doi e un, trê si scomence a imparê, cuatri si scomence a scombati
• une robe si sa cemût che e scomence ma no cemût che e finìs
• vuai se a scomencin a dî: velu, velu!