Dizionari de Lenghe Furlane

menâ  me|nâ  [FO]

1. v.tr. movi o tignî in moviment:  Ricut al jere daûr a menâ il sfuei par dâi flât a di un fûc di stancol (Roberto Ongaro, Il muc); Ane, che e menave la polente, lu cjalà come par viodi se al veve pierdût i sintiments (Maria Forte, "Nossent"); ogni tant al menave la scraçule pal gust di sintî colps secs come sclopetadis (Carlo Sgorlon, Prime di sere)
2. v.tr. movi svelte une part dal cuarp:  Tilde e menà i braçs come une mate, clamant a plene vôs (Gianni Gregoricchio, Trê feminis); al clame il cjan e chel al cor sot il barcon menant la code (Roberto Ongaro, Il muc)
   Sin. bati
3. v.tr. acompagnâ, puartâ cdn. di cualchi bande:  so pari […] al gji oreva un ben di vita a la sô Catinuta e la menava fûr pai cjamps di matina co al cricava al dì par mostrâgji simût che al si dismôf al mont e simût che al jeva al soreli daûr da monts (Ugo Pellis, Catinuta); tal indoman i soldâts a menarin a Udin il mulinâr in cjadenis (Franco Marchetta, Madalene)
   Sin. puartâ , scuarzi , butâ
4. v.tr. tignî il control di un mieç di traspuart:  lui, ancje se al ves provât, nol varès mai imparât a menâ une machine (Carlo Sgorlon, Prime di sere)
   Sin. pilotâ² , vuidâ
5. v.tr. (fig.) puartâ indevant une ativitât o ancje alc di imateriâl, spec. la esistence:  al à menât une vite tant esemplâr, che al è deventât sant (Luigi Gortani, Sant Martin)
   Sin. fâ , passâ
6. v.intr., v.tr. di strade, percors e v.i., lâ di une cierte bande:  a cjapavin la strade Bariglarie che ju menave su la Tresemane e, di li, subit a cjase (Alan Brusini, Come tai romançs); al veve cjapât il troi che al menave sù tal bosc daûr dal paîs (Gianfranco Pellegrini, Il drâc)
   Sin. condusi , lâ , lâ a finîle , rivâ
7. v.tr. [TS] silv. puartâ taiis tun flum
8. v.intr. di plante, cressi, disvilupâsi:  benon, la jerbe mene che al è un gust (Dolfo Zorzut, La furlane); al pierdeve zornadis interiis pes stradis dal paîs a çoncjâ cu la ronconele baraçs e saût che a menavin pardut (Meni Ucel, Il telegram)
   Cfr. cecjâ , zermoiâ , sfiâ , butâ , dâ fûr
   
   1. (fig.) ancje di frut o fantat, cressi svelt:  i fruts a scjamparin a zuiâ tal curtîl: cui po tignî chê cjar che e mene? (Pieri Menis, Il testament)
   2. (fig.) di cualsisei robe, nassi o cressi:  tal spirt des autonomiis regjonâls, massime dai paîs di confin, cheste retoriche cence soliditât, in part false in part vueide, no po menâ (Josef Marchet, La sgarfade dal cjan)
9. v.tr. dâ cun fuarce:  menâ pugns a bracevierte (Dino Virgili, La aghe da pît la cleve); la Cavaleria scomençà a snudâ lis spadis e a menâ colps e stocs disperâts indistintamenti sora ju uns e sora ju altris (Zuan Luîs Filli, Il grant citadin)
   Sin. dâ , dâ jù , petâ
   
   1. dâ botis:  se al è bevût al tache subit a menâ (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
10. v.tr. (fig.) puartâ tant che efiet, tant che consecuence:  chest [sfuarç di fâ jentrâ venit e piemontês sot de leç di tutele des minorancis] però al menarà confusion te definizion des minorancis linguistichis parcè che al va a distruzi la diference tra lenghis di minorance e dialets de lenghe taliane (Adrian Cescje, Memoriis di politiche linguistiche)
    Sin. menâ dongje
11. v.tr. (fig.) fâ lâ intune cierte cundizion, massime negative:  no stâ menânus in tentazion ma liberinus dal mâl (, Pari nestri)
12. v.intr. di aiar, soflâ:  da lis monts, là sù daûr, al menave jù un tramontanin crût che al taiave (Dino Virgili, La aghe da pît la cleve)
    Sin. soflâ

Polirematichis e espressions idiomatichis

• menâ a nolis loc.v.
• menâ ator loc.v.
• menâ dongje loc.v.
• menâ i braçs loc.v.
• menâ i comedons loc.v.
• menâ il cjâf loc.v.
• menâ il cjâf di ca e di là loc.v.
• menâ il cûl loc.v.
• menâ il dint loc.v.
• menâ il mus pe glace loc.v.
• menâ judizi loc.v.
• menâ la carete loc.v.
• menâ la code loc.v.
• menâ la gramule loc.v.
• menâ la lenghe loc.v.
• menâ la viole loc.v.
• menâ lis gramulis loc.v.
• menâ lis mans loc.v.
• menâ pal boro loc.v.
• menâ pal cûl loc.v.
• menâ pal nâs loc.v.
• menâ par lenghe loc.v.
• menâ par man loc.v.
• menâ pe man loc.v.
• menâ sù loc.v.
• menâ tai fossâi loc.v.
• menâ une vite sole loc.v.
• menâ vie loc.v.

Proverbis:

• a menâ il cjar al vûl tamon
• al mene la code il cjan no par te ma pal pan
• al nas ce che si semene e ce che si insede al mene
• ancje il cjan cul menâ la code si vuadagne la spese
• bêçs a menin vuere
• bisugne menâ il dint daûr la borse che si sint
• ce che tu âs semenât, al è nassût; ce che tu âs insedât, al à menât
• cui che al fâs al fale, cui che al mene al strucje
• cui che al mene al strucje
• cui che al mene il spêt nol tocje nancje un dêt
• cui che nol à ce fâ che al meni la puarte
• cul plui menâ, il pan al devente tenar
• dome che il mus al mene la code par dibant
• dutis lis stradis a menin a Rome
• i dincj no stâ menâ se no tu âs bêçs di paiâ
• i ocuts a menin cualchi volte a bevi i ocats
• il cjan nol mene la code par dibant
• il dint no stâ menâ, se no tu âs bêçs di paiâ
• il timp al mene judizi
• la cjar che e mene no sta mai ferme
• la gnot e mene judizi
• la tampieste no mene cjaristie
• la tristerie a mene miserie, la miserie a mene pedoi e i pedoi a mangjin ancje i voi
• lis disgraciis a menin judizi
• Març al mene la code pal bearç
• nancje il cjan nol mene la code dibant
• nome il mus al mene la code par dibant
• ogni famee al è un demoni e al mene la code pardut
• ploie che e sune a mene bon timp
• Sante Catarine e mene il frêt cu la caretine
• se no tu menis i comedons, a cjase no menin lis gramulis
• siroc e tramontan a menin vin e pan, buere e garbin a cjolin pan e vin
• un disordin al mene un ordin
• un reume mâl curât al mene intal sagrât
• un vuarp che al mene un altri vuarp a colin ducj i doi te buse