Dizionari de Lenghe Furlane

rivâ  ri|vâ  [FO]

1. v.intr. movisi fin a jessi intun lûc a la fin di un percors, di un viaç:  e sarès stade lungje la talpinade, tant che al rivà a cjase scanât (Fabian Ros, Un piçul particolâr); il tren al rivà te stazion cuntun intart di uns dîs minûts (Agnul di Spere, In viaç di domenie); Luziute e il so om a saressin rivâts cu la coriere des sîs e mieze (Roberto Ongaro, Il muc)
   Sin. jonzi
   Var. arivâ
   
   1. (fig.) ancje riferît a une percezion, plui che a un moviment:  denant vie, fin dulà che al rivave il voli, si slargjave il parc (Amedeo Giacomini, Tal ospedâl)
2. v.intr. (fig.) jessi a un ciert pont o nivel tant che risultât di une dinamiche, di une dade di timp, di un sfuarç, di une prove, di une ativitât e v.i.:  Catine, a pene che e rivà insom a di chês riis, e sintì un asei intal cûr (Gianni Gregoricchio, Trê feminis); Mirco al jere rivât al ultin an di scuele (Alan Brusini, Par stradis lungjis)
   Sin. jonzi , lâ
   
   1. vê une cierte estension, lungjece, dimension e v.i.:  al jere il Jochil vîf… cu la barbe lungje fin al umbriçon de panze e i cjavei che i rivavin da pît de schene (Pieri Menis, Lis leiendis di Buie); il bosc al rivave fin dongje il paîs (Riedo Pup, I furlans e il zardin); tal doman al jere dut blanc, che la nêf e rivave fintremai tal cavalot (Alan Brusini, Il coragjo de sclope)
      Sin. lâ
3. v.intr. cu la prep. "a" e un infinît, vê une capacitât o un risultât:  al pensà che ce che nol jere rivât a fâ in chel martars al varès podût fâlu la joibe dopo (Meni Ucel, Rosaris); la muse ridinte e veve mudât a colp di espression e no jere rivade a finî il discors (Franca Mainardis, Aiar di cjase); Antoni Cossâr cul todesc nol jere mai rivât a lâ plui innà di un tant (Agnul di Spere, L'avignî di Antoni Cossâr)
   Sin. cjatâ il dret , jessi bon , rivâ adore
   Cfr. podê¹
   
   1. ancje cun infinitive sotintindude:  o vevi di puartâi jo la bocjade te sô bocje, par vie che lui nol rivave bessôl (Ivano Urli, Storie di Min)
   2. in espressions enfatichis, olsâ:  [il gardenâl Schuster] al è rivât a dî che Bertrant al varès fat di plui e di miei se al fos stât plui zovin e talian (Josef Marchet, Il patriarcje Bertrant)
      Sin. cjatâ il dret , jessi bon , rivâ adore , vê cûr
4. v.intr. capitâ dilunc dal timp o par câs o par causis che no son sot dal control de persone:  e jere rivade la ore di lâ (Gianni Gregoricchio, Trê feminis); il frêt al rive di sere co al ven jù de mont e al plombe sul paîs, il frêt che culì al è il vêr paron (Alan Brusini, Gian Paolo Linda, I forescj); la muart a rivava, nera jê, tremenda che a lu scjafoava e a lu riduseva tun guluç di poura (Novella Cantarutti, Barba Fodo e la muart); al rivà il cjalt, e cun chel e cu la ploie la campagne e deventà in pôc timp un splendôr (Carlo Sgorlon, Prime di sere)
   Sin. vignî , capitâ , sucedi
5. v.intr. vê un contat, une comunicazion, une influence e v.i. intune cierte sede, cuntun ciert personaç, a di un ciert nivel:  Baracêt al è disponibil a fâ in mût che e rivi a Rome ogni nestre manifestazion pe tutele des minorancis, a procurânus audizions, a realizâ pressions (Adrian Cescje, Memoriis di politiche linguistiche)
6. v.intr. (ancje ass.) otignî une posizions economiche, sociâl, professionâl e v.i.:  Begot al rivà president cuant che la Cod e veve inviadis lis voris par un dissen di leç regjonâl pal insegnament de lenghe furlane (Adrian Cescje, Memoriis di politiche linguistiche); «Rivâ a ducj i coscj» al diseve, «eco la politiche di vuê» (Alan Brusini, Par stradis lungjis)
   Sin. fâ strade , imponisi , lâ lontan , rivâ lontan
7. v.intr. jessi suficient par alc o par cdn.:  foncs no 'nd' è tancj, […] no rivin par ducj (Alan Brusini, Amîs come prime)
8. v.intr. vivi fin a un ciert moment, vê une cierte etât:  o jeri rivât ancje a dîs agns e, a chê etât, in chê volte, bisugnave scomençâ «a movi il poleâr, a viodi di ce bande che e ven», a disevin (Pieri Menis, A scuele); Zili Mus, che i mancjavin pôcs mês par rivâ ai cent, si lagnave di sintîsi vecjo (Alan Brusini, Amîs come prime)
   Sin. resisti , tignî dûr , vivi
9. v.tr. tocjâ alc o un ciert puest, movisi fin a jessi a ret di alc o a pâr di cdn.:  il prin scjalin al jere un veri [dut glaçât] e ancje il secont al jere un veri, e Meni ju fasè planchin, tignintsi tal pilastri. Ma dopo no 'nd jere plui scjalins, e al jere dut un veri intor, e Meni il pilastri no lu rivà plui. Al colà tun svol (Riedo Pup, Meni Elar); al torna indavour, al rebalta il jet, al sburinea li govali, al palpa il mûr par rivâ il cuadri da la Madona (Novella Cantarutti, I cjans di not)
   Sin. jonzi
   
   1. vê un risultât, un obietîf e v.i.:  no mi risulte che e sedi stade definide une politiche linguistiche in gjenerâl, chê che e va fate cu lis istituzions di Stât e Regjon, ni tai siei obietîfs, ni tes formis di rivâju (Adrian Cescje, Memoriis di politiche linguistiche); lui, se al faseva i conts da la cjera che a i sarès tocjada dopo dividût cun ducj i fradis, al nal varès rivât il past di una feda (Novella Cantarutti, Torero)
      Sin. otignî
   2. jessi pâr a une cierte misure, a une cierte cuantitât, a un ciert valôr, intune cierte capacitât, ativitât e v.i.:  "Masse alte: no ti rivi, Elena! …" (Dino Virgili, La strade come un destin)

Polirematichis e espressions idiomatichis

• rivâ a bon loc.v.
• rivâ a bon fin loc.v.
• rivâ a bon pro loc.v.
• rivâ adore loc.v.
• rivâ ben loc.v.
• rivâ dongje loc.v.
• rivâ in orele loc.v.
• rivâ insom loc.v.
• rivâ jù loc.v.
• rivâ pardut loc.v.
• rivâ sù loc.v.
• rive e no rive loc.av., loc.adi.inv.

Proverbis:

• a pas a pas si rive a Rome
• altri al è cori, altri al è rivà
• baste che si rivi, ogni strade e je buine
• bisugne lâ adasi planc par rivâ prest
• bisugne lâ planc par rivâ prest
• bramazion di mus no rive in cîl
• ce zovial volê là che no si rive?
• cuant che e rive la fuarce, la justizie si slontane
• cuant che no si rive a dî: "glorie di Diu!" al è finît dut
• cui che al è mâl instradât, mâl al rivarà
• cui che al rive prin tal mulin al masane
• cui che al sta indaûr no i rivin i claps ma i rive l'odôr
• cui che nol ten cont dal centesim nol rive a fâ il solt
• cuntune man sole no si rive nancje a bati lis mans
• Diu al rive pardut
• dulà che il diaul nol po rivâ al met la code
• dulà che nol rive il len nol rive il fros
• il Signôr al à la scorie lungje e al rive pardut
• il Signôr al rive di lontan
• l'arbul si sglove prin di rivâ al cîl
• la mê scjale no rive ai tiei barcons
• la supierbie e partìs in caroce e e rive a pît
• la tô scjale no rive ai miei barcons
• miôr rivâ un cuart di ore daspò e lâ sigûrs
• misdì di vile o che al passe o che nol rive
• nol conte jevâ adore, baste rivâ su la ore
• par rivâ a ciertis altecis o bisugne fâsi cais o ben jessi acuilis
• prin di Nadâl il frêt nol è rivât, daspò Nadâl il frêt al è passât
• se si à salût si rive a scombati
• se si file mai tant che al rivi dal nâs a la bocje, e je une glagn che no torne su la rocje
• si sa dulà che si è ma no dulà che si larà a rivâ
• si sa dulà che si è, ma no dulà che si rive
• un pas daûr chel altri si rive a Rome
• vôs di mus no rive in cîl