Dizionari de Lenghe Furlane

vivi  vi|vi  [FO]

1. v.intr., v.tr. jessi vîf, vê vite:  preàn il Signour che al ni lassi ca jù a vivi, e invecjâsi, e murî in pâs (Pier Paolo Pasolini, I Turcs tal Friûl)
   Sin. esisti , jessi¹ , sei
   
   1. jessi presint intun ciert lûc o jessi adatât a di un ciert ambient:  cuasi dutis lis speciis di primâts a vivin sui arbui (Franc Fari, La evoluzion dal çurviel e de cussience tai vertebrâts)
   2. jessi presint intune cierte ete:  i Protorosaurs a àn vivût dome che tal Triassic (Francesco Gobbo, Gjeologjie e paleontologjie ator di Preon)
   3. restâ vîf par un ciert timp:  us auguri di vivi cent agn (Carlo Sgorlon, Prime di sere); rivade al so timp, si metè tal jet e, dopo penât a lunc, e parturì une robite che e rivà adore di vivi cualchi zornade (Pieri Menis, Sot il puarti)
   4. puartâ indevant la esistence in ciertis cundizions:  Leandri al viveve di sioret e cence pinsîrs (Roberto Ongaro, Cretevierte); il lavôr al bastave par vivi ben (Franca Mainardis, Aiar di cjase); o soi ridusût a vivi di bessôl come il çus (Josef Marchet, Lis predicjis dal muini)
   5. mantignîsi, spec. cuntune definizion che e pant i mieçs par lâ indevant, paiâ lis spesis e v.i.:  i furlans a partirin pal mont dome par cirî di vivi cui lôr braçs (Francesc Placerean, Cuintristorie dal Friûl dal 1866 fint in dì di vuê); e viveve cui bêçs sudâts tune oficine svuizare (Agnul di Spere, Frêt)
2. v.intr. jessi a stâ intun puest:  tal borc al viveve un ciert Leandri, un om grant e grues, che al faseve il boscadôr (Roberto Ongaro, Cretevierte); si cjatìn a jessi su la crosere plui pericolose e plui insanganade di dut il vecjo continent, o vivìn juste dulà che a vignaressin a scuintrâsi i aiars contraris e dulà che e colarès la prime tampieste (Josef Marchet, Siarâ i voi par no viodi)
3. v.intr. (fig.) vê tant che element une vore impuartant te esistence:  disevot agns, che si vîf di amôr, ce sono se il cûr nol contente? (Alan Brusini, Come tai romançs); sô mari, darote e avilide, e viveve di miserie e di sperance (Pieri Menis, Zilugne); int che e vîf di asse, persuadude che ducj a sedin ta chest mont par odeâle (Amedeo Giacomini, Tal ospedâl)
4. v.intr. compuartâsi intune cierte maniere cun se stes e cun chei altris, soredut lant daûr di ce che al è ben, just, cun maturitât, daûr des regulis de vite di relazion, des convenzions e v.i.:  Tinut, come dute la zoventût di in chê volte, al è partît pes Gjermaniis, a lavorâ su la fornâs, e cussì al à dismenteadis tantis robis che a vevin feride la sô anime. […] Puar Tinut! Al veve imparât a vivi… (Pieri Menis, Tinut di Libro); o sin plui risiervâts, ma chest nol vûl dî jessi isolâts: o savìn vivi cun ducj chei altris, ma cun serietât (Christian Romanin, Dino Zoff: «O vin lidrîs buinis, o vin di tignîlis di cont»)
5. v.intr. (fig.) durâ tal timp:  fintremai che e vîf la lenghe e vîf la anime di un popul (Josef Marchet, La fuarce dal nestri lengaç)
6. v.tr. passâ un moment, une dade, ancje lungje, une esperience e v.i.:  no dome parcè che o soi nassût li dentri e o ai vivude la mê infanzie, ma pûr pe sô struture, e jere une cjase che mi plaseve (Roman Michelot, La cjase dai contents); si cjatà a sei forest propit tal lûc dulà che al veve vivude la sô vite (Dino Virgili, Come tornâ fruts); al scugnive a ducj i coscj cjatâsi une vore sigure; almancul chei pôcs agns che i restavin di vivi, viviju cence la pôre dal doman (Carlo Sgorlon, Prime di sere)
   
   1. puartâ indevant un aspiet de esistence:  un omosessuâl che al vîf la sô tindince inte uniche maniere pussibile in chel mont omofobic che lu cercene, ven a stâi platant lis sôs preferencis sessuâls sot de aparence di un cameratisim virîl (Fabian Ros, A esmorga); i nestris vons a àn vivude la religjon cun chê culture che a vevin, cun chel mût di sintî che a vevin, a lôr mût (Francesc Placerean, Il popul furlan al à ancjemò nostalgjie des robis bielis e santis)
7. v.tr. (fig.) sintî a fonts dentri tal spirt:  mi plâs di cjaminâ tra chestis cjasis, vivi la atmosfere de sere, curiosâ e, se o rivi, capî un dret di cheste int (Alan Brusini, Gian Paolo Linda, I forescj); a vivin la gjonde, la serenitât e la letizie de domenie, de zornade di Diu (Riedo Pup, No sin bogns di fâ fieste)
8. s.m. dome sing., esistence, vite:  un vivi disordenât a grops di rabie o a sclops di ligrie maliziose (Maria Forte, La rive di Sant Pieri); un vivi facil come il nassi dal sorc e des patatis sot il soreli e la ploie (Alan Brusini, Par stradis lungjis)
   Sin. stâ , vite
9. s.m. ce che al coste e che al permet di vivi, spec. il mangjâ:  in citât il vivi al è plui cjâr (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• lassâ vivi loc.v.

Proverbis:

• a fâ di so cjâf, si vîf siet agns di plui
• a son trê manieris di vivi: vivatâ, vivi, vivulâ
• a son trê manieris di vivi: vivi par mangjâ, mangjâ par vivi e vivulâ
• al è miôr vivi tal bosc che no cu la femine ledrose
• al vîf tant il jeur a jerbe che il lôf a cjar
• ancje il jeur al vîf a jerbe
• cuant che il bon al mancje, il trist si met a vivi
• cuant che si à imparât a vivi, in chê volte si mûr
• cuant che si vîf, si à di fâ in maniere che a vivin ancje chei altris
• cui che al cognòs il mont e nol è bon al vîf di mincjon
• cui che al menace al vîf cu la pôre
• cui che al sa patî al sa ancje vivi
• cui che al vîf cence onôr al mûr cence vergogne
• cui che al vîf di jentrade le fâs stentade
• cui che al vîf in cort al mûr tal ospedâl
• cui che al vîf sperant al mûr cagant
• cui che al vîf sperant al mûr cjiant
• cui che al vîf sperant al murirà di fam
• cui che al viôt, sint e tâs, al è segn che al vûl vivi in pâs
• cui che al viôt, sint e tâs, al vûl vivi in pâs
• cui che al vûl vivi e che al vûl stâ ben che al cjoli il mont come che al ven
• cui che ben al vîf, ben al mûr; cui che mâl al vîf, mâl al mûr
• cui che nol sa vivi nol sa murî
• cui vîf su la cjar muarte, cui sun chê vive, cui sun chê rabiose
• cul art e cul ingjan si vîf nome mieç an, cul art e la bausie si manten la massarie
• cul art e cul ingjan si vîf nome mieç an, cul ingjan e cul art si vîf chê altre part
• cul mangjâ si vîf, cul preâ si va in paradîs
• daspò muarts no si vîf une ore
• ducj a lavorin par vivi
• dulà che a vivin nûf a vivin ancje dîs
• i fraris a vivin di caritât e no di miserie
• il cjaval restîf nol lasse il vizi fin che al vîf
• il jeur al vîf a jerbe, la bolp a gjalinis, e a son grues compagns
• l'om nol vîf nome cul pan
• lavorâ come che no si ves di murî mai, vivi come che si ves di murî simpri
• lavorâ come che si ves di vivi simpri, preâ come che si ves di murî daurman
• magari picjât a un claut ma vivi
• mâl si vîf, mâl si mûr
• miôr vivi di invidie che no di misericordie
• miôr vivi tal bosc che no cu la femine rabiose
• miôr vivi tal bosc che no cu la femine stiçose
• nissun nol vîf di glorie
• no si cuiste la nobiltât nassint, ma ben vivint
• no si cuiste la nobiltât nassint, ma degnementri vivint
• no si vîf dome cul pan
• o vin ducj dirit di vivi
• par vivi a lunc covente doprâ scarpis vieris
• par vivi in libertât o in vile o in citât
• si à di lavorâ par vivi e no di vivi par lavorâ
• si mangje par vivi e no si vîf par mangjâ
• si vîf simpri cu la muart a la gole
• tâl si vîf, tâl si mûr
• vivi e lassâ vivi
• vivi trop al è patî trop
• vivi, vivulâ e vivaçâ