jessi1
/-é-/
je|ssi
[FO]
-
v.intr.
verp cun significât che al pues cambiâ une vore daûr dal contest, segnant che il subiet si cjate a esisti, a vivi, a vê une cierte forme, carateristiche, composizion, situazion, relazion di proprietât, origjin, parintât e v.i.:
l'ultin [salvan] si dîs che lu vedin copât tai boscs dongje di Lauc, ma altris contis a disin che ator a 'nd è ancjemò (Sandri Carrozzo, Friûl di Magance);
la strade e jere lungje (Maria Forte, L'avôt);
aromai al jere biel che stuf (Fabian Ros, L'om che al pierdeve pinsîrs pe strade);
piron, curtìs e sedon che a jerin di aur (Andreina Nicoloso Ciceri, Maletegne - Racconti popolari friulani I);
dut il paîs al jere in spiete dai nuviçs (Alan Brusini, Amîs come prime);
i cjamps no jerin siei [di Vigji Brusin]: a jerin dal paron, il cont Detalmo di Breçà;
Ce disie chê letare? … di cui ise? (Pieri Menis, A uciei cu lis archetis);
a son di chel sanc istès, a son fradis o cusins drets (Josef Marchet, Lis predicjis dal muini);
i mês che al veve stât vie in vuere, a jerin stâts, par jê, un infier di pôre di ansie (Roberto Ongaro, Il muc)
Var. sei
, essi
, sedi
, seti
, jestri
-
v.aus.
si dopre par formâ i timps componûts di cierts verps intransitîfs:
al jere partît di cjase a scûr, in chê buinore (Riedo Pup, I furlans e la creance);
sâr Zuantoni al jere jevât sù (Dino Virgili, La massarie)
Cfr. vê
-
v.aus.
si dopre par formâ il passîf di verps transitîfs:
al fo clamât a rispuindi a di une citazion a otantecinc agns, par vie di un debit di cuindis francs (Riedo Pup, Beâts i viei);
no pretindeve di sei capide (Maria Forte, La aghe dal Ariul);
si puedial lamentâsi che e sedi stade fate cheste ilegalitât […]? (Josef Marchet, Furlans autonomiscj platonics)
Sin. vignî
-
s.m.
il fat di esisti e la maniere di esisti:
lâ a fonts tes resons dal nestri jessi e dal nestri vivi (Antoni Beline, Sant Jacum, là che al finìs il mont)
Sin. vivi
, vite
-
forme naturâl e proprie che si à tal esisti, cundizion normâl o solite:
cualchidun al veve tentât di jentrâ tal so câs, ma jê si jere innulade e alore le vevin lassade tal so jessi (Maria Forte, La aghe dal Ariul);
brave di tantis robis, che e sa stâ sul so jessi cence mostrâsi ni come une contesse ni come une svuatare (Josef Marchet, Lis predicjis dal muini)
-
struture psicologjiche individuâl profonde:
al è come un amour inradisât fin ta li cumissuri pi fondi dal gno jessi (Novella Cantarutti, Li Clausini);
une persone […] ancje co e lavore sot paron e met in vore alc dal so jessi, dal so pinsîr, dal so temperament (Josef Marchet, Personis e pipins)
Sin. persone
, personalitât
-
s.m.
entitât, robe o persone che e esist:
o speri che di cualchi bande dal Univiers e sedi come une Grande Ment, un Jessi Suprem che al cjape dutis lis animis di chei che a muerin (Checo Tam, Sic transit gloria mundi)
Sin. ent
, entitât
-
s.m.
[TS]
filos.
cundizion di ce che al esist o al pues esisti, o al à vite o realtât
Sin. ent
, entitât
, realtât
, sostance
Polirematichis e espressions idiomatichis
Proverbis:
- "se", "ma" e "po" a jerin fradis
- a jessi masse bogns, si è tratâts di piore
- a jessi sincîrs, si à fuarce
- a Madone des cjandelis, se al è nûl o sin fûr, se al è clâr a mieç Invier
- a paiâ e a murî, al è simpri timp
- a Sant Nicolò il frêt al dîs: o soi ca cumò
- a saran bêçs che nô no sarìn
- al è miôr jessi che no parê bon
- al è stât un sôl galantom in chest mont e ancje chel al è muart picjât
- al è stât un sôl galantom in chest mont e lu àn metût in crôs
- altri al è il jessi, altri il someâ
- bêçs a saran che nô no sarìn
- ce che al è al è
- ce che al è stât al è stât
- ce che al è stât al po tornâ
- ce che al è stât nol po jessi
- che al sedi cjalt che al sedi frêt, cui che al à di bevi al à simpri sêt
- cjalimi e lassimi par chel che o soi
- cuant che no 'nd è di Istât, no 'nd è nancje di Invier
- cuant che no 'nd è sul stali, no si po butâ jù pal golâr
- cuant che no 'nd è te panarie, dibant meti sù la cjalderie
- cuant che no 'nd è une, a 'nd è dôs
- cuant che no 'nd è, la muart no 'nd vûl
- cuant che no 'nd è, nancje la muart no 'nd vûl
- cuant che no 'nd è, no 'nd à
- cuant che no 'nd è, no 'nd jentre
- cuant che no 'nd è, no si 'nt po cjoli
- cuant che no 'nd è, no si po doprânt
- cuant che no 'nd è, qua re conturbas me?
- cuant che si è tal bal, si à di balâ
- cui che al à biele muîr, no je dute sô
- cui che al è stât al po contâlis
- cul lôf si è, cul lôf si urle
- di ce che al è nol mancje nuie
- di chel len al è, di chel savôr al sa
- di just no je nome la muart
- dimi cui che tu pratichis e ti disarai cui che tu sês
- dimi cun cui che tu vâs e ti disarai cui che tu sês
- dulà che a 'nd è, si po cjoli
- dulà che a 'nd è, si spere
- dulà che no 'nd è no si po cjoli
- dulà che no son surîs nol cor il gjat
- dulà che nol è nuie il re al piert i siei dirits
- dulà che tu viodis cinise tu disis che al è stât il fûc
- fin che no 'nd vanze, no 'nd è abastance
- i miedis: preâ il Signôr che a son e po no vênt dibisugne
- joibe stade, setemane passade
- l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan
- l'onôr al è di cui che sal fâs
- la aghe dulà che e je stade e po tornâ
- la aghe dulà che e jere, e torne
- la asenade e je di cui che le fâs e no di cui che le ricêf
- la ore di gustâ pai siôrs e je cuant che a àn fam, pai pitocs cuant che a nd' àn
- la ore di gustâ pai siôrs e je cuant che a àn fam, pai puars cuant che a nd' àn
- la robe si le vent là che no 'nd è e si le compre là che si cjatile
- no si à mai di lamentâsi di vuê parcè che doman al po jessi piês
- no si po dî vuê ce che al sarà doman
- no stâ dî vuac fin che nol è tal sac
- nol baste jessi rics par jessi contents
- nol sarà mai om cui che nol sa comandâsi
- parê e no jessi al è tant che filâ e no tiessi
- Pasche di ulîf si jes fûr dal nît
- prin di nô a jerin altris, po a vignaran ancjemò altris
- Sant Pauli scûr, dal Invier no sin fûr
- se a 'nd è al è parint di magari
- se a 'nd ves e se a 'nt fos a jerin doi fradis e no si vignivin nuie
- se a 'nt fos, se a 'nd ves, se a 'nt sarès a son trê sants che no fasi miracui
- se a 'nt fos, se a 'nd ves, se a 'nt sarès a son trê sants che no judin
- se a 'nt fos, se a 'nt sarès e se a 'nd jere, a son trê sants che no judin
- se a 'nt fossin, se a 'nd vignissin, se a 'nd vessin, a son fradis
- se a 'nt fossin, se a 'nd vignissin, se a 'nd vessin, a son trê sants che a durin dut l'an
- si crôt di jessi a cjaval e no si è nancje a mus
- si sa dulà che si è ma no dulà che si larà a rivâ
- si sa dulà che si è, ma no dulà che si rive
- tâl le ai dite, tâl e je stade
- tâl tu sês, tal tu âs
- tu sâs là che tu sês ma no là che tu larâs
- vuê o sin, doman no sin