Dizionari de Lenghe Furlane

vignî  vi|gnî  [FO]

1. v.intr. lâ dulà che e je la persone che si fevele o dulà che e je la atenzion dal discors:  ma l'avocat no vegnial vuê in ufici? (Pieri Somede dai Marcs, L'avocat e la luianie); Gjovanin al mancje, al è malât e al è cualchi dì che nol ven a scuele (Marisa Moretti, Neveade)
   Sin. capitâ , capitâ dongje , vignî dongje , rivâ
   
   1. ancje cun "a" e un infinît, par segnâ une finalitât:  "Mestri Jacum, parcè no vegnial a cerçâ ancje i miei miluçs?" (Angelo Covazzi, I miluçs); ti lassi, no sai se prin di partî o podarai vignî a saludâti inmò (Pieri Somede dai Marcs, Vilie di Nadâl (teatri))
2. v.intr. jessî, distacâsi:  il stropul al è incjastrât, o tiri ma nol ven
   Sin. distacâsi , jessî , saltâ fûr , vignî fûr
3. v.intr. vê une cierte origjin, intindude tant che lûc:  ducj a ricuardin Agnul, il vecjo poete montagnâr che al vignive de Cjargne, a Nadâl, a cjatâ lis fameis dai amîs (Riedo Pup, I furlans e i muarts); "Isal, par câs, ancje lui di chei che a àn supât lis ideis che a vegnin di France…?" (Alviero Negro, Int di masnade)
   Sin. jessi¹ , divignî , provignî
   
   1. vê une cierte origjin in gjenerâl, ancje temporâl, materiâl, causâl, gjenealogjiche e v.i.:  lis colonis, che si drecin sù tra la jerbe, a somein une anomalie, une magjie che e ven dal passât lontan (Adrian Cescje, Viaç aes origjins dal Logos); cun lui e stave la Miliute […] cun chê graciute che i vignive dal so naturâl (Maria Forte, La tiere di Lansing); altris elements di preocupazion pe realtât regjonâl, a vegnin dal scrutini di cualchi câs plui particolâr (Redazion il Diari, La sgrife de mafie su la economie dal Nord); in France oncle (che dopo al è jentrât ancje tal todesc Onkel e tal inglês unckle), in Romanie unchiu, […] ducj a vegnin dal latin avunculum (Giovanni Frau, Peraulis in libertât: i atlants linguistics)
      Sin. derivâ , divignî
4. v.intr. di moment, timp e v.i., jessi presint, soredut dopo di une cierte spiete o di une altre dade di timp che e je stade prime:  a vegnarà ben il dì che il Friul si inecuarzarà di vei na storia, un passât, na tradission! (Pier Paolo Pasolini, Dialet, lenga e stîl); e ven la sabide e di sere lui si siere dentri [te barcje] e al spiete par viodi cui che le dispeave (Andreina Nicoloso Ciceri, Lis striis - Racconti popolari friulani I)
   Sin. rivâ
5. v.intr. di cualsisei fat o event, sucedi, inverâsi:  la preiere, ogni volte che si domande un plasê a Diu, che al vegni o che nol vegni, al è un mût di crodi che Lui al è bon (Francesc Placerean, La predicje di une domenie cualunche); ogni gnot al vignive un burlaç e un frêt di cricâ (Alan Brusini, I ribei); in chê volta al ven il taramot. Na roba come il farc che al mouf la cjera e al la buta sù (Novella Cantarutti, Fat di voladia)
   Sin. acjadê , avignî² , sucedi , inverâsi , vignî a jessi , rivâ
6. v.intr. di pinsîr, emozion e v.i., tacâ a jessi:  al re i ven un suspiet e i domande: "Cui us à insegnât dut chest?" (Andreina Nicoloso Ciceri, Il re e la fantate furbe - Racconti popolari friulani I); i jere vignude une pôre che si jere bagnâts i bregons (Alan Brusini, Par stradis lungjis); parcè vegnial mo chel alc, dentri, co si sint che doi voi a cjalin seneôs? (Dino Virgili, Aghelusinte)
   Sin. vignî sù , saltâ sù , vignî intal cjâf
   
   1. cun "di" e un infinît, tacâ a jessi volût o sintût tant che istint:  ti vignive di piçâlu, di tant che al jere tombul e ninin (Antoni Beline, Sant Jacum, là che al finìs il mont); la Gjigje a chel pont i ven di rispuindii che al pues lâ lui cja dal diaul (Meni Ucel, Rispiets)
7. v.intr. di sensazion o manifestazion fisiche, malatie o sim., tacâ a jessi sintude, a vê efiet:  mi vignive la fiere e o scugnivi stâ tal jet (Alan Brusini, Il zardin); al vieli i vignivin fin lis lagrimis tai voi (Dino Virgili, La aghe da pît la cleve)
   
   1. ancje cun "di" e un infinît, di bisugne fisiche, sen e v.i., fâsi sintî cun urgjence:  magari cussì no, a i ven di lâ a spandi la aghe di corse (Angelo Covazzi, Baste la mosse)
   2. ancje di reazion psicologjiche:  a siôr Tite i vignive di vaî (Roberto Ongaro, Il muc)
8. v.intr. nassi, cressi, vivi in ciertis cundizions, ancje cun averbis o predicatîfs:  al rivà il cjalt, e cun chel e cu la ploie la campagne e deventà in pôc timp un splendôr. […] I contadins a jerin contents di cemût che e vignive la blave o la ue (Carlo Sgorlon, Prime di sere); "Pan e vin e bigatele che la blave e vegni biele, di lontan e di vicin e pan e vin" (Luciano Rocco, La foghere)
   
   1. cuntun predicatîf, cjapâ sù une cierte forme, une cierte nature e v.i., deventâ:  cuant che la aghe e vignive grande, di Vierte o tor Sant Andree, cui sirocâi di stagjon, si le sintive chê cjampanute a sunâ di vuardâsi che al jere pericul (Dino Virgili, La aghe da pît la cleve)
9. v.intr. cun averbis, predicatîfs o complements, jessi intune cierte forme o vê ciertis carateristichis tant che risultât di une azion o di une sucession di events:  la opare e je vignude mâl (Adrian Cescje, Memoriis di politiche linguistiche); cun chês sôs mans miracolosis, e cusive, e pontave, e pleave, e sorepontave, e ricamave, […]. Salacor i vignivin cussì ben, par vie che ta chel lavôr e meteve ducj i siei siums di fantate (Roberto Ongaro, Il muc)
   Sin. riessi , jessi² , risultâ
10. v.intr. (coloc.) vê un ciert presit:  Trop vegnial un implant solâr termic? Il presit plen di un implant par une cjase di 4 personis al è tra i 3.000 e i 5.000 euros (Aministrazion Publiche, Plan energjetic comunâl)
    Sin. costâ
    
    1. corispuindi a un ciert valôr, a un ciert risultât:  pal servizi si dividin la spese che e ven cinc francs al mês (Ivano Urli, Storie di Min)
11. v.intr. (pop.) rivâ al orgasmi
    Sin. rivâ
    Cfr. sborâ , molzi , semenâ
12. v.aus. cun daûr il participi passât, al cjape il puest dal ausiliâr "jessi" inte coniugazion passive, ma dome intai timps sempliçs:  la aministrazion de justizie e vignive cjolte al Parlament e metude tes mans dal Lutignint o dai Tribunâi di Vignesie (Josef Marchet, Cuintristorie dal Friûl fin sot la Italie); il tesaur cjatât al vignarà consegnât ae comune, al tornarà di ducj (Dino Virgili, La aghe da pît la cleve); une famee, indulà che il lavôr di vincj braçs al po vignî straçât di dôs mans solis, e scuen lâ in malore (Alan Brusini, Trê parabulis)
    Sin. jessi¹

Polirematichis e espressions idiomatichis

• che al ven loc.adi.
• cu ven loc.adi.
• fâ vignî gnot loc.v.
• fâ vignî i cjavei blancs loc.v.
• fâ vignî i cjavei drets loc.v.
• fâ vignî i sgrisui loc.v.
• fâ vignî il lat tai zenoi loc.v.
• fâ vignî il mâl di panze loc.v.
• fâ vignî il pêl dret loc.v.
• fâ vignî la aghe in bocje loc.v.
• fâ vignî la aghe tai zenoi loc.v.
• fâ vignî la aghegole loc.v.
• fâ vignî la barbe loc.v.
• fâ vignî la barbe lungje loc.v.
• fâ vignî ogni pêl un pan loc.v.
• fâ vignî ogni pêl un pan pe vite loc.v.
• fâ vignî sù il futar loc.v.
• fâ vignî sù il madron loc.v.
• fâ vignî sù la ostie loc.v.
• ven a stâi loc.coniun.
• vignî a bon loc.v.
• vignî a cjâf loc.v.
• vignî a cjatâsi loc.v.
• vignî a conts loc.v.
• vignî a jessi loc.v.
• vignî a mancjâ loc.v.
• vignî a pats loc.v.
• vignî a savê loc.v.
• vignî a stâ loc.v.
• vignî ad oremus loc.v.
• vignî adoremus loc.v.
• vignî al mont loc.v.
• vignî al viers loc.v.
• vignî dal mont de lune loc.v.
• vignî daspò loc.v.
• vignî daûr loc.v.
• vignî di ridi loc.v.
• vignî dongje loc.v.
• vignî dopo loc.v.
• vignî fûr loc.v.
• vignî gnot loc., loc.s.m.
• vignî grant loc.v.
• vignî i sudôrs loc.v.
• vignî i sudôrs frêts loc.v.
• vignî il flât loc.
• vignî il mat loc.
• vignî in aiût loc.v.
• vignî in clâr loc.v.
• vignî in contat loc.v.
• vignî in lûs loc.v.
• vignî in ment loc.v.
• vignî in orele loc.v.
• vignî in possès loc.v.
• vignî incà loc.v.
• vignî incuintri loc.v.
• vignî indenant loc.v.
• vignî indevant loc.v.
• vignî infûr loc.v.
• vignî iniment loc.v.
• vignî intal cjâf loc.v.
• vignî jù loc.v.
• vignî jù pai cops loc.v.
• vignî jù pe nape loc.v.
• vignî la aghe in bocje loc.v.
• vignî mâl loc.v.
• vignî ogni pêl un pan loc.v.
• vignî ogni pêl un pan pe vite loc.v.
• vignî pai trois loc.v.
• vignî pai viers loc.v.
• vignî pal viers loc.v.
• vignî par cjase loc.v.
• vignî rabie loc.
• vignî scûr loc.v.
• vignî scûr denant dai voi loc.v.
• vignî scûr denant i voi loc.v.
• vignî scûr devant dai voi loc.v.
• vignî scûr devant i voi loc.v.
• vignî sot loc.v.
• vignî sù loc.v.
• vignî sù chei cinc minûts loc.v.
• vignî sù i cinc minûts loc.v.
• vignî sù il futar loc.v.
• vignî sù il mat loc.
• vignî tal cjâf loc.v.
• vignî tal mont loc.v.
• vignî un colp loc.v.
• vignî un ton loc.v.
• vignî vie loc.v.

Proverbis:

• a ce che al ven di adalt nol è ripâr
• a cui che no si inzegne, i ven la tegne
• a fâ chel che no si devi, al ven chel che no si credi
• a Sant Barnabà la ue e ven e e va
• a spandi sâl a vegnin disgraciis
• a sta dibant e ven la fiere
• a stâ fers e ven la mufe
• a volê contentâ une nuvice e ven la stice
• al ven ben sant paiarìn che nol rispiete nissun
• amôr vieri nol ven di rusin
• ben, ven di ben; mâl, ven di mal
• bisugne cjoli il ben cuant che al ven e il mâl cuant che si scuen
• bisugne fâ la roste denant che e vegni la aghe
• bisugne volêi ben a la tiere parcè che o vignìn di li
• ce che al ven cence fadie, in pôc timp ancje al va vie
• ce che al ven di buf in baf, al va di ruf in raf
• ce che al ven di ruf al va di raf
• ce che si brame nol ven mai
• chê persone che no ten la mortificade, no vignarà mai ni buine ni brave
• cjantâ no si po ben se dal cûr nol ven
• cjoli il ben cuant che al ven e il mâl cuant che si scuen
• cuant che a starnudin i mus al ven bon timp
• cuant che a vegnin i sivilots a finissin i uciei
• cuant che a ven la burascje, il diaul al trabascje
• cuant che al è cjalt a vegnin lis moscjis
• cuant che al ven il mâl si cognòs il ben pierdût
• cuant che dal cûr nol ven, cjantâ no si po ben
• cuant che e cjante la rane, a ven la ploie
• cuant che e je scure la buse di Pinçan, e ven la ploie, co e je clare al ven bon timp
• cuant che la joibe il soreli al va tal sac, no ven domenie che nol peti un vuac
• cuant che la prime nêf e ven al plan, pocje nêf in chel an
• cuant che lis urtiis a àn la rose fin da pît, e ven une vore di nêf ancje al plan
• cui che al è cence bêçs che no si lassi vignî voiis
• cui che al gjolt dal mâl dai altris co a vegnin lis disgraciis al vai di bessôl
• cui che al vûl vivi e che al vûl stâ ben che al cjoli il mont come che al ven
• dal bon vin al ven bon asêt
• dal pôc al ven il trop
• daspò dal burlaç al ven il soreli
• daspò dal dolç al ven l'amâr
• daspò dal ridi al ven il vaî
• daspò dal seren a ven la ploie
• daspò dal trist al ven il bon
• daspò dal trist timp al ven il soreli
• daspò di une grande ligrie e ven une grande malinconie
• daspò: vite dulcedo, a ven: vite suspiremo
• di ben al ven ben, di mâl al ven mâl
• di mâl acuist al ven l'agnel, di mâl acuist e ven la piel
• di ogni dì al ven Nadâl e di martars Carnevâl, di joibe a ven la Sense: a son ducj mats cui che le pense
• ducj i grops a vegnin al pietin
• dute chê blave che si semene tart e ven cincuantìn
• e ven la fin dal mont par cui che al mûr
• i bêçs dai predis a vegnin cjantant e a van vie sivilant
• i bêçs no vegnin pe lade dal tet
• i cjatîfs: cjapâju cuant che a vegnin e lassâju lâ cuant che a van
• i plui grancj fai a vegnin dai plui grancj sapients
• il lat al ven pe bocje
• il lat nol ven dai vues
• il mâl al ven a cjars e al va vie a oncis
• il mâl al ven a funts e al va vie a oncis
• il passût al crôt che no i vegni mai plui fam
• il pitic al ven mangjant
• il prin miâr di florins al è dificil di fâ, chei altris daspò a vegnin bessôi
• il timp al passe e la muart e ven
• il timp al ven par chel che al sa spietâ
• impare la art e metile de bande, il timp al vignarà che la art e valarà
• joibe vignude setemane jessude, ma cui che nol à ce mangjâ al à trê dizuns di contâ
• joibe vignude, setemane jessude; ma cui che nol à ce mangjâ al à trê disons di contâ
• l'amôr al ven dal util
• l'arc di Sant Marc la sere, bon timp si spere, l'arc di Sant Marc la doman, no ven mai sere che nol sedi pantan
• la bielece e va e e ven, e je la bontât che si manten
• la bramazion e ven, e va; po e torne su la schene di cui che le da
• la cise mâl vignude e je piês che no metude
• la cjar e ven buine cuant che e je frole
• la muart e ven cuant che mancul si le spiete
• la muart e ven simpri cun cualchi scuse
• la prudence a ven cui agns
• la robe e ven e a va
• la tegne no i ven mai a di un sôl cjâf
• Nadâl al ven di ogni dì
• Nadâl al ven dome une volte ad an
• ni il tentôr ni il muredôr nol vignarà mai siôr
• no mi cjalâ di Avrîl che o soi intal covîl, cjalimi di Mai e se no ven, vai
• no si po volê ben cuant che dal cûr nol ven
• no tu sâs il ben, se il mâl nol ven
• no ven la fiere in chê dì che si mangje i brugnui
• o murî zovins o vignî viei
• o tart o adore la bausie tant che il vueli e ven parsore
• ogni dì al cjante il gjal e ogni dì al ven dì
• ogni dì e ven gnot
• ogni dì la muart e ven
• ogni grop al ven al pietin
• ogni setemane e ven sabide
• pal dolôr di cjâf no lasse di vignî la fiere
• par che e vegni biele ue e biele blave a vuelin cjantadis lis implorazions de ciale
• par stâ ben: cjoli il mont come che al ven
• passûts che si è, nissun nol ven a viodi ce che si à te panze
• prin di fâ e di dî bisugne pensâ ce che al po vignî
• prin di nô a jerin altris, po a vignaran ancjemò altris
• puar chel che si lasse vignî un pedoli
• Sant Matie se al cjate glace le pare vie, se no 'nt cjate ind fâs vignî
• scove gnove a scove ben, viodarìn chest an cu ven
• se a 'nd ves e se a 'nt fos a jerin doi fradis e no si vignivin nuie
• se a 'nt fossin, se a 'nd vignissin, se a 'nd vessin, a son fradis
• se a 'nt fossin, se a 'nd vignissin, se a 'nd vessin, a son trê sants che a durin dut l'an
• se e ves di vignî la murie dai stupits, si disvuedarès il mont
• se no lis àn, a son daûr a vignî
• se no si capìs che si à di volêsi ben in chest mont, no si capìs ce che si è vignûts a fâ
• si à di fâ la roste prin che a vegni la aghe
• si cognòs il ben co al è finît e plui nol ven
• spietâ e no vignî a son robis di murî
• sul cjâf a ven la tegne
• tant alt al va il scriç, tant alte e ven la nêf
• tic tic tic, il muredôr nol vignarà mai ric
• une volte ad an e ven pasche
• vegnie tarde la Pasche o a buinore, di là a durmî daspò gustât e je simpri ore