Dizionari de Lenghe Furlane

semenâ  se|me|nâ  [FO]

1. v.tr. (ancje ass.) meti la semence di une plante inte tiere par che e dedi fûr:  al cjate une femine tun cjamp che e jere daûr a semenâ sorc (Luigi Gortani, Il matescul di Cjabie); al jere simpri su la campagne a viodi a semenâ, a seâ, a machinâ (Pieri Somede dai Marcs, La braide)
   Sin. plantâ , meti
   Var. samenâ
   
   1. ancje cun obiet costituît dal teren, tignîlu cuntune cierte culture:  «I cjamps - al usave dî - ducj a fasin fature a arâju, a coltâju, a semenâju […]» (Lucio Perès, Vigji il vuardian)
2. v.tr. (fig.) fâ nassi e cressi bestiis, scuasi in arlevament:  i cais no ju semenave, ma al lave a sgarfâju cul sgrif di fier tes çocjis (Maria Forte, Il vivi al è chel rangjâsi)
3. v.tr. (fig.) meti te tiere alc, come se e fos une semence o une plante:  [trê soldâts rus] a jerin lâts par aiar suntune mine, di chês che i alpins a vevin semenadis tai prâts (Agnul di Spere, Cjalant la rive)
4. v.tr. (fig.) fâ che alc al finissi sparniçât in alc altri:  la machine e masanave fros e ramaçs che l'aiar al veve semenât sul asfalt (Fabian Ros, Un piçul particolâr)
   Sin. sgjarnâ , sparpagnâ , stierni
   
   1. fâ che alc al sedi plen di cierts elements:  i cjars a semenavin di fros e rosis la strade come une stiernete di Mai (Dino Virgili, La aghe da pît la cleve); [i protestants] no son come nô catolics postpaians che o semenìn di statuis e di imagjins i nestris zardins [dai cimitieris] (Checo Tam, La maree nere)
5. v.tr. (fig.) butâ o lassâ alc in disordin:  tal curidour scûr di cjase mê i semenavi i vistîts (Stiefin Morat, Kebar krossè)
   Sin. butâ , pierdi , sgjarnâ , sparpagnâ , stierni , stranfâ , molâ
6. v.tr. (fig.) fâ che alc, concret o ancje imateriâl o astrat, al nassi o si difondi:  no podevin nancje cjolisi il lus di fâ un scuatri marculis sui prâts se no volevin jemplâsi di pulçs tant che scus par vie des pioris che ju semenavin (Alan Brusini, Chei de vuere dal '15); al ven di scrupulâ che daûr dal moviment autonomistic dal Friûl cualchi furbat al vebi manovrade la mescule a pueste par semenâ la disconcuardie (Josef Marchet, Esam di cussience); la vuere a veve semenât ancje un pôc di comunisim, intant che la siorie - patriotiche e nazionâl - e restà grampade a lis ideis dal risorziment talian (Francesc Placerean, Cuintristorie dal Friûl dal 1866 fint in dì di vuê)
   Sin. meti
7. v.tr. (coloc.) scjampant di cdn. o intune competizion e spec. intune corse, lassâ chei altris une vore indaûr:  "Cumò a gjestre e daspò a çampe, par chê passade alì, dai Pidins che ju semenìn! Jooooh! Cussì! A manete!!! […]" (Stiefin Morat, Donald dal Tiliment)
   Sin. dâ il fum
8. v.intr. des âfs, lâ fûr dal bôç par cirî un puest par fâ une gnove colonie:  [i canais] a si fermavin come un boç di âfs che al semena e al à cjatât dulà poâsi (Novella Cantarutti, La scuela da li rosi)

Proverbis:

• a Sant Valantin si semene il plantin
• a semenâ pe glerie si strachin i bûs e si piert la semence
• a semenâ un sac di plume, no si racuei mai plui
• al nas ce che si semene e ce che si insede al mene
• bisugne semenâ cul pugn e no cul sac
• bisugne semenâ di miercus
• ce che si semene si cjape sù
• ce che tu âs semenât, al è nassût; ce che tu âs insedât, al à menât
• cuant che al cjante il crot, semene sorc
• cuant che si semene vece, nol po nassi forment
• cui che al fevele al semene, cui che al tâs al racuei
• cui che al semene al racuei
• cui che al semene clauts che nol ledi discolç
• cui che al semene spins che nol ledi discolç
• cui che al vûl racuei che al semeni
• cui che nol semene nol cjape sù
• cui che nol semene nol racuei
• dute chê blave che si semene tart e ven cincuantìn
• i bêçs a son tant che i datui di Spagne: chel che ju semene no ju mangje
• il brâf contadin al semene cu la man e no cul sac
• il semenâ tart se al fâs bon prodot e je une sorte
• l'om sdegnôs al semene difidencis, l'om pazient lis gjave
• Març sut, Avrîl bagnât, Mai temperât, beât chel che al varà semenât
• no stâ fâ di mancul di semenâ par pôre des passaris
• par pôre dai uciei no si lasse di semenâ
• se no si semene no si racuei
• se si semene aiar, si racuei tampieste
• se tu âs ben gjoldût, se tu âs mâl semenât, friditi tal to gras