Dizionari de Lenghe Furlane

plantâ  plan|tâ  [AF]

1. v.tr. meti inte tiere une semence o une plantute o ancje une culture par che e cressi:  a plantarin i ciprès di ca e di là dal stradoncin (Dino Virgili, La aghe da pît la cleve); cuant che Vigji si maridà a plantarin un tei propit in chel stric che al veve in bande de sô cjase (Maria Forte, Il tei)
   Sin. impastanâ , pastanâ , semenâ , implantâ
2. v.tr. fâ jentrâ alc in alc altri, in mût che al jentri ben indentri, che al stedi dret o che al stedi fis:  smontà jù ne la aga, plantà in premura chel pâl nel pantan plui in font che al podè (Federigo Comelli, Il me paîs)
   Sin. cjaçâ , cjalcjâ , ficjâ , impirâ , implantâ , impastanâ , pastanâ
   
   1. (fig.) indreçâ cun decision:  il predi i veve plantâts i voi tai voi, cjapantlu pai braçs (Pieri Menis, Sflameadis)
3. v.tr. (fig.) cui stes significâts di "meti", ma cun valôr plui fuart:  "E dovaressin imbunî ducj i canâi di Vignesie e plantâ parsore grancj stradons e grancj zardins!" (Arturo Feruglio, Viaç a Vignesie)
   Sin. meti , sgnacâ , poiâ , implantâ
   
   1. fissâ une sede, inviâ une ativitât intune cierte sede o ancje in gjenerâl:  il comant al jere intune palacine di siôrs che a vivevin in citât e le dopravin nome vie pal Istât e che i mucs a vevin recuiside par plantâ il lôr cuartîr (Roberto Ongaro, Il muc); il pai al à plantât a Puçui rivendite di pan (Ivano Urli, Storie di Min); a àn metût tal cjâf a pape Benedet XIV che la uniche soluzion e jere chê di disfâ il Patriarcjât e di plantâ lis dôs arcidiocesis di Udin e di Gurize (Francesc Placerean, L'ultin patriarcje: Denêl Dolfin)
4. v.tr. (fam., fig.) lassâ a la improvise cdn. o lâ vie a la improvise di un puest o ancje di une situazion, di une cundizion e v.i.:  sô mari, la setemane stade, che al jere lât a cjatâle di scjampon, i veve dite di pensâ ancje par se, di plantâ dut, di salvâsi, di tornâ a cjase (Agnul di Spere, Frêt)
   Sin. molâ , lassâ , bandonâ , implantâ , pastanâ , impastanâ
   
   1. finî une relazion sentimentâl cun cdn.:  «Jo o ai capît une cjosse sole: che cui cjocs no stoi, ancje se son parons e presidents. Ti planti e o torni là di me mari! Âstu capît, siôr paron?» (Tarcisio Venuti, La cjase di Toni)
5. v.tr. (fig.) in sens une vore larc, fâ alc, in gjenar cun decision, cun risultâts incisîfs e v.i.:  si ombrive e mi plantave un barufon dal numar un (Antoni Beline, Pre Pitin); plantâ bausiis (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• implantâ sac e râfs loc.v.
• plantâ cuistion loc.v.
• plantâ famee loc.v.
• plantâ i cuars loc.v.
• plantâ il music loc.v.
• plantâ sac e râfs loc.v.

Proverbis:

• cuant che la salate e à fat il grop, no si plantile plui
• cui che al fonde sul popul si plante tal savalon
• Sant Josef al plante la cuche, Sant michêl le gjave dute