Dizionari de Lenghe Furlane

impastanâ  im|pas|ta|nâ  [AF]

1. v.tr. [CO, TS] agr. meti une plante, soredut une plante zovine, te tiere in mût che lis lidrîs e cjapin:  al passave lis oris cu la svangje e cul ristiel a raclâ cesarons e impastanâ meneolt e blede (Alan Brusini, Par stradis lungjis); e de un cuc pal barcon, in sfrese su la braide: "O ai di impastanâ il radic" e disè (Domeni Zannier, La crete che no vai); tô mari e impastane rosis par ogni cjanton e se i dîs che cu lis rosis no si mangje, jê mi rispuint che o soi un ordenari (Lucia Scoziero, Letare al fi)
   Sin. plantâ , implantâ , pastanâ
2. v.tr. fâ jentrâ alc in alc altri, in mût che al jentri ben indentri, che al stedi dret o che al stedi fis:  chê striate gji impastane tal cjâf une gusele (Dolfo Zorzut, La malatie dal on); al viôt doi cul travuart e cul fîl / che misurin, che smirin, che notin, / che impastanin ca e là lis palinis (Zaneto, Un cuarantevot)
   Sin. cjaçâ , cjalcjâ , ficjâ , impirâ , implantâ , plantâ
3. v.tr. (fam., fig.) lassâ a la improvise cdn. o lâ vie a la improvise di un puest o ancje di une situazion, di une cundizion e v.i.:  Mandi figâr! Mi tocje di impastanâ dut cuant; / al è finît il timp di stâ dibant! (Enrico Fruch, Memoriis di scuelâr); il pastôr al spessee a cjapâlis sù dutis [lis monedis di aur] e a metilis inte sachete; daspò al scjampe, impastanant dutis lis cjavris (Popolâr - Istitût di Ricercje Achil Telin, Il pastôr e il tesaur - Friûl des Culinis I)
   Sin. molâ , lassâ , bandonâ , implantâ , pastanâ , plantâ , lassâ impastanât
   
   1. lassâ cdn. dopo jessi stâts unîts intune relazion sentimentâl:  Jacun co si avicine / a cualchi fantacine / subit i da peraule di sposâle, / po cun cualchi pretest di là pôcs dîs / l'à cûr di impastanâle (Pieri Çorut, Il morosin)
4. v.tr. creâ, fondâ, fâ nassi alc:  el someave dut il ritrat dal Creatôr come che lu piturin su la Storie dal antîc Testament co l'ere indafarât a impastanâ il mont (Bepo Marion, Il Pari Eterno); l'Imperadôr che al veve impastanadis tantis citâts, che al veve scuasit une fiere e une sbisie di costruzion (Carlo Sgorlon, Il dolfin)
   Sin. pastanâ , plantâ , implantâ
   
   1. (scherç.) gjenerâ, fâ nassi cdn.:  nuie mancul che cutuardis fîs ti 'nd vevin impastanâts dongje (Rinaldo Vidoni, "O sin di chei platâts sot il zigot")
   2. fâ ce che al covente par che al tachi un avigniment, une iniziative, une organizazion:  al impastanave une fieste di bal cun armoniche e liron (Alan Brusini, Come tai romançs); tal 1919 a impastanin a Gurize la Societât filologjiche furlane (Giancarlo Ricci, Zuan Nazzi Matalon, La normalizazion dal furlan)
      Sin. inmaneâ , meti sù
   3. fâ tacâ ancje alc di imateriâl, une cuistion, une dinamiche, un fenomen, une relazion e v.i.:  te grande cuestion religjose che Rufin e S. Jeroni, ducj i doi a fin di ben, e vevin impastanade in chei timps [...] (Bepo Marion, S. Cromazi)