Dizionari de Lenghe Furlane

implantâ  im|plan|tâ  [AF]

1. v.tr. meti inte tiere une semence o une plantute o ancje une culture par che e cressi:  sot dal miluçâr e ator ator o vevi implantadis cuatri o cinc rosis (Pieri Menis, La scuele dai fornasîrs); a era Maria Sabaa uì di là che a implantava patati (Novella Cantarutti, La Santa)
   Sin. impastanâ , pastanâ , semenâ , plantâ
2. v.tr. fâ jentrâ alc in alc altri, in mût che al jentri ben indentri, che al stedi dret o che al stedi fis:  lis ruedis si infondin tal savalon, a lassin daûrsi dôs cjaradoriis lungjis come une ferade. I cjavai a implantin lis talpis fin avuâl dai sghirets (Dino Virgili, La aghe da pît la cleve)
   Sin. cjaçâ , cjalcjâ , ficjâ , impirâ
3. v.tr. (fig.) cui stes significâts di "meti", ma cun valôr plui fuart:  "[…] vûstu capîle di jessi plui trist! O âstu di spietâ che i aversaris ti implantin il comedon tes cuestis par capîlu?" (Stiefin Morat, Donald dal Tiliment)
   Sin. meti , sgnacâ , poiâ , plantâ , ficjâ
   
   1. fissâ une sede, inviâ une ativitât intune cierte sede o ancje in gjenerâl:  i uficis e la mense a jerin stâts implantâts tai locâi dal co. Rote (Pieri Somede dai Marcs, Une conference di padre Gemelli)
4. v.tr. dâ principi, fâ scomençâ une azion, une ativitât, un sisteme, un fenomen e v.i.:  no son i autonomiscj furlans che e pretindin di implantâ une autarchie regjonâl; a son i aversaris che a fasin fente di cjapâle di chê bande par vê cualchi rimpin cuintri di nô (Josef Marchet, Fevelâ par dibant); Toni Fornasarig, il prin che al implantà une industrie de cjadree a Manzan intal 1891 (Laurin Zuan Nardin, Viaç a strichis te storie di Manzan); meteitsi a taulin, / implantait la partide e scomencìn (Pieri Çorut, Pes gnocis Latis-Venture)
   Sin. inviâ
5. v.tr. (fam., fig.) lassâ a la improvise cdn. o lâ vie a la improvise di un puest o ancje di une situazion, di une cundizion e v.i.:  la gortane confusionade a implante la revendiule cuntun "Lait a fâsi frizi!" (Luigi Gortani, Al marcjât di Vile)
   Sin. molâ , lassâ , bandonâ , plantâ
   
   1. finî une relazion sentimentâl cun cdn.:  "O torni a vivi là di mio pari, o ten il mio implei che mi baste par vivi e ti implanti" (Pieri Somede dai Marcs, Barbane)
6. v.tr. (fig.) in sens une vore larc, fâ alc, in gjenar cun decision, cun risultâts incisîfs e v.i.:  [i malâts] se la muinie no jere, a implantavin une balfuerie tra di lôr tirantsi lis cuzinis e ogni folc che ur vignive tes mans (Alan Brusini, Il malât di Cime Undis)

Polirematichis e espressions idiomatichis

• implantâ çus e vergons loc.v.