Dizionari de Lenghe Furlane

bandonâ  ban|do|nâ  [FO]

1. v.tr. lassâ, ancje par simpri:  bandone chê femine che ti à divoltât di noaltris… No je degne di te…! (Alviero Negro, Int di masnade); dute la zone di mont e ven bandonade in mancul di dîs agns e i passons a tornin a deventâ bosc (Rino Gubiani, Studi da la evoluzion dal paisaç mediant i toponims); il destin des feminis al è chel di lâ… di bandonâ la cjase dulà che a son nassudis… (Pieri Menis, Chei di Muraie)
   Sin. impastanâ , implantâ , lassâ , lassâ impastanât , molâ , plantâ
   Var. abandonâ
2. v.tr. lâ vie di un lûc, di un puest o ancje di une sistemazion o ocupazion:  chel di scugnî bandonâ il jet, i pesave une vore (Gianni Gregoricchio, Trê feminis); lis cisilis no vevin ancjemò olsât di tornâ a jemplâ i nîts di pantan che a vevin bandonât in Autun intai sotpuartis dai paisuts dulintor (Franca Mainardis, Un bosc cence colôrs); par proteste, la minorance e bandonà la aule in masse (Dino Virgili, La aghe da pît la cleve); cuant che la int e bandonave la place par lâ cjase, subit misdì, ancje lui al scomençave a cjariâ sul cjar la marcjanzie (Angelo Covazzi, Il dint)
   Sin. lâ vie
   
   1. partî, tacâ di un ciert lûc par lâ indevant di une cierte bande:  cjapâ il troi che, bandonade la stradele, al plee ben jenfri des risultivis viers di Codroip (Franco Marchetta, Madalene)
3. v.tr. no interessâsi di cdn., soredut no judâlu cuant che i covente:  no vês di tradî la bandiere e di bandonâ i amîs… (Maria Forte, Cjase di Dalban); di lâ vie di cjase no si impensave nancje parcè che no varès vût il cûr di bandonâ i siei viei (Pieri Somede dai Marcs, A jerin lagrimis); se ducj nus bandonin, nus judarìn bessôi, Dio che fedi il rest. No vuarìn che nissun disponi di nô, senza di nô (Giuseppe Bugatto, Intervent tal parlament di Viene, 25/10/1918)
   Sin. impastanâ , implantâ , lassâ , lassâ di bande , lassâ di bessôl , lassâ impastanât , lassâ in blanc , trascurâ
4. v.tr. fâ defezion dal grup o de organizazion, soredut politiche, che si jere part:  Jim Sillars e une largje part dai iscrits scozês a bandonin il Partît Laburist e si iscrivin in masse tal SNP (Sergio Cecotti, Il risultât eletorâl dai partîts di identitât teritoriâl - A case study: Scottish National Party)
   Sin. disertâ , molâ , lassâ , gjavâsi
5. v.tr. molâ ce che si à pes mans:  a ducj i doi si son dreçâts i cjavei e, bandonant uciei e archetis, si son metûts a cori, vessino vût flât e gjambis (Pieri Menis, A uciei cu lis archetis)
   Sin. butâ jù , molâ , lassâ , lassâ di bande , lassâ stâ , meti jù , plantâ , implantâ
6. v.tr. no doprâ plui, no tignî plui une pratiche, un ûs, un vizi e v.i.:  in putropis fameis di mieze vigogne si va bandonant il lengaç locâl par doprâ une cjosse che si crôt che e sei la lenghe nazionâl (Josef Marchet, Lenghe e lenghis in Italie); o ai bandonât il fum di une dì a di chê altre (Alan Brusini, Amîs come prime); pai fantats, cheste e je la etât dulà che si bandone la religjon o pûr si à cualchi dubi in merit aes robis de glesie (AAVV, Sul florî)
   Sin. molâ , lassâ , fermâ , dismeti , lassâ di bande , lassâ stâ , lassâ pierdi , plantâ , implantâ , rinunziâ
7. v.tr. (fig.) no impegnâsi plui in alc:  e àn bandonât la scuele elementâr prime di rivà da pît (Riedo Pup, Dîs milions di analfabets)
   Sin. molâ , lassâ , plantâ , implantâ , lassâ di bande , lassâ pierdi , lassâ stâ , dismeti
8. v.tr. no dâ plui atenzion, no meti plui concentrazion:  no ju bandonà cui voi fintant che no jessirin (Gianni Gregoricchio, Trê feminis)
   Sin. molâ , lassâ , pierdi
9. v.tr. lâ vie dal pinsîr:  l'afiet pe lôr tiere nol veve bandonâts i furlans, che a no molin il lôr Friûl par puar, plen di vueris e di taramots che al sei (Francesc Placerean, Cuintristorie dal Friûl dal 1866 fint in dì di vuê)
   
   1. di capacitât, lâ al mancul, molâ di jessi in vore:  il so sens dai afârs no le bandonave mai, nancje intune situazion gnove, intun gnûf paîs (Franca Mainardis, Il sium di Lissandri)
   2. lassâ in pâs:  chei moments, chei fats, no le bandonavin un minût (Roberto Ongaro, Il muc); in bande dai dolôrs che no lu bandonavin mai al jere simpri chel vencul orent che lu tormentave (Checo Tam, Il testemoni); la miserie lu veve brincât di piçul e no lu veve bandonât par in vite (Riedo Pup, Vigji Brusin)

Polirematichis e espressions idiomatichis

• bandonâ çus e vergons loc.v.

Proverbis:

• cuant che un al è disfortunât, al è di ducj bandonât
• mai bandonâ il ciert pal inciert
• mai bandonâ la strade viere par chê gnove