Dizionari de Lenghe Furlane

lassâ stâ    [AF]

1. loc.v. lassâ alc o cdn. te situazion che al è, soredut tal sens di no cjapâ, no tocjâ, no cambiâ e v.i.:  "Po, ce volêso fâlu sunâ ancje vô [il gramofon]? … A lu rompês savêso; lassaitlu stâ, nol è nestri" (Costantino Smaniotto, Co l'amôr al cimie); co Celso si jere tirât dongje de scune, a cjalâ Firmato che al durmive, e veve vût un scat: " Lassilu stâ, che tu mal dismovis!" (Gianni Gregoricchio, Îr e doman)
2. loc.v. no fâ dal mâl:  ancje la none i veve cridât al barbe: - Puaris bestiis, lassilis stâ, sence cûr! - ma po e veve spelât e netât i ucieluts e ju veve metûts a cuei par cene (Jolanda Mazzon, Di là de rêt)
   Sin. lassâ vivi
   
   1. lassâ cuiet:  a dutis chestis domandis nol scuedeve altri che une rugnade e un: "Lassaitmi stâ!" (Catarine Percude, Lis âfs)
      Sin. lassâ in pâs , lassâ vivi
3. loc.v. fâ di mancul di alc, o ancje di cdn., o soredut di lâ indevant cuntune ativitât, cuntune discussion, cuntune cuistion e v.i.:  "Vuei fevelâigji jo, cumò. Dulà ise?" "No, Meni, lassìn stâ; si podarès fâ piês! […]" (Bruno Paolo Pellarini, Ninenane); "[…] che al vegni ca, che al vegni ca, che al bevi une taçute…" "No, no, lassait stâ, grazie, co si cjatarìn a Udin mi paiarês invezit un cafè…" (Pieri Somede dai Marcs, Robis che a sucedin); [par sparagnâ] i tancj libris di vuê o pues lassâ stâ di comprâju, tant plui che, aromai, o 'nd ai tancj che no sai dulà metiju (Meni Ucel, Culumiis)
   Sin. lassâ di bande , lassâ pierdi , molâ , dâ sù , lassâ cori
4. loc.v. ignorâ, fâ fente di nuie o no cjapâ in considerazion:  "[…] e pai bêçs o ai simpri dome sparagnât e tignût cont ancje se par une volte o spint alc par me, mi pâr che no sedi une robe tant malfate!" "Ben, lassìn stâ i bêçs par cumò, […]" (Jolanda Mazzon, Fûr di timp)
   Sin. lassâ di bande , lassâ pierdi , lassâ cori , lassâ in pâs , lassâ lâ

Components:

• lassâ v.tr., v.intr.
• stâ v.intr.

Proverbis:

• scherce cui fants e lasse stâ i sants