Dizionari de Lenghe Furlane

dâ sù    [AF]

1. loc.v. dâ, passâ alc a cdn. che al è adalt:  jo us cali jù e mi dais sù il formadi (Luigi Gortani, La bolp e il lôf)
2. loc.v. fâ lâ une sostance, soredut un licuit, suntun materiâl:  al veve tacât a piturâ i scûrs: a 'nd tirave jù un par volte, lu gratave e lu slissotave cu la cjarte di veri e i dave sù il vueli di lin (Roberto Ongaro, Cretevierte); si cjalin lis ongulis e si disin tra di lôr "Cjale ce biel colôr che o ai dât sù!" (AAVV, Sul florî)
3. loc.v. fâ vignî sù, fâ vignî fûr:  bute vuê, bute doman, i claps a derin sù une grande cumiere e cul lâ dal timp la cumiere e deventà une mont come che si dîs (Josef Cjargnel, La liende di Dimponç)
   Sin. mandâ , dâ fûr , spandi
4. loc.v. vignî sù, lâ sù, vignî fûr e v.i. ancje di alc di imateriâl:  cuant che si crôt di vê poiât par simpri te dismentie cierts fats de nestre vite, al capite alc che ju torne a fâ dâ sù (Roberto Ongaro, Il muc)
   Sin. vignî fûr , dâ fûr
   
   1. lâ sù in altece:  la Grecie e je cirude dal visitadôr contemporani comun pe sô gjeografie, chel impast di lûs inceose, di formis cretosis arsidis dal soreli, cjandidis o colôr auriane, e di montagnis che a dan sù dal mâr (Adrian Cescje, Viaç aes origjins dal Logos)
   2. di plantis, tiere lavorade e v.i., fâ cressi parts gnovis:  al lave ancje tal ort e lu viodeve pe prime volte, a dâ sù (Maria Forte, La tiere di Lansing)
5. loc.v. di nûi o temporâi, vignî cuintri di cui che al fevele o di un ciert pont di riferiment:  il cîl si innule. Al da sù burlaç (Vico Bressan, Cîl e aghe); se al deve sù il maltimp, e brusave l'ulîf su lis boris (Riedo Pup, I furlans e il timp)
6. loc.v. di alcul o altri, vê efiet tal cerviel:  in mieze ore al veve fat fûr mieç veri e i veve dât sù che mai (Antoni Beline, Pre Pitin)
7. loc.v. (ancje ass.) fâ un sun o dî cun fuarce, cun enfasi, cun empit e v.i.:  Ane i dave sù: "Alore ce aio di mangjâ? Lenghis di canarin?" (Maria Forte, "Nossent"); «E cumò» al dave sù Bastian sentât di traviers sul jet [dal ospedâl] «par chê fote culì, un riçûl po, no vuelin molâmi! […]» (Alan Brusini, Il malât di Cime Undis)
   Sin. dî fûr , dâ fûr
   
   1. (ass.) agjî, reagjî o fevela cun agressivitât:  si dismoveve un cjadaldiaul di cjans che a davin sù (Dino Virgili, La aghe da pît la cleve); tu vevis di sintî chel napoletan ce maniere di dâ sù! Come che o fos stât a robâlu (Riedo Pup, La bolete dal forment)
8. loc.v. molâ une azion, une ativitât, un confront, un contrat e v.i.:  Guri al veve dât sù il casel e al jere jentrât a vore in stazion grande (Dino Virgili, La aghe da pît la cleve); chest gambiâ di stagjon in cussì pôc timp, no lu sopuartin ducj e a 'ndi è simpri cualchi gnûf imbarcjât par chescj viaçs, che al scuen dâ sù di viazâ pal Sudameriche (Vico Bressan, Cîl e aghe); "Momi al va vie, ise vere?" "O crôt di sì dal sigûr, cheste matine al à dât sù la cjamare, mi à paiât il contut dal lavâ la robe, al à fat sù e puartât vie la valîs […]" (Pieri Somede dai Marcs, Un pugn di moscjis)

Components:

• dâ v.tr., v.intr.
• sù av., inter., s.m.inv., adi.inv.