Dizionari de Lenghe Furlane

dâ fûr    [AF]

1. loc.v. fâ jessî alc:  la aria […] jera plena de la umiditât che il gran al veva dât fûr (Federigo Comelli, Il me paîs)
   Sin. butâ , mandâ fûr , mandâ
   
   1. (ancje ass.) di plante, gjenerâ parts gnovis:  il poul ogni an al veve dât fûr une magnifiche menade (Luigi Gortani, Il poul malât)
      Sin. menâ , butâ
2. loc.v. fâ vignî fûr une publicazion, un prodot e v.i.:  al è un intervent impuartant parcè che al è il prin messaç indreçât a Pieri Pauli Pasolini, che al veve tacât in chei mês dal 1946 a dâ fûr il Stroligut de sô Academiute (Max Mauro, Felix Marchi e il sium dal furlan-furlan)
   
   1. fâ savê ator:  cualchidun al à azardât che il numar di internâts in dut il Ream di Italie al fos, za tal Istât dal '15, di 70.000 personis, il numar al è forsit esagjerât, ma il Guvier nol à mai dât fûr cifris siguris (Carli Pup, La seconde Irlande)
3. loc.v. fâ un sun o dî cun fuarce, cun enfasi, cun empit e v.i.:  fâ ogni sfuarç par no dâ fûr un sclop da ridi (Giovanni Gortani, Sot consei di vuere); lui al jere deventât blanc e al jere par dâ fûr intune vosade (Gianni Gregoricchio, Trê feminis)
   Sin. dî fûr , dâ sù
4. loc.v. spudâ fûr pe bocje ce che si veve tal stomi:  "Al volarès bevi. Al dîs che al mûr di sêt; al è normâl daspò de duarmie, ma no si po contentâlu: al starès mâl, al darès fûr dut…" (Amedeo Giacomini, Tal ospedâl)
   Sin. gomitâ , rindi , fâ i purcituts , fâ stomi , restituî , rimeti , rindi fûr , butâ fûr
5. loc.v. vendi o dâ alc a plui personis:  il vinut che a dan fûr nol è cussì mâl, crodimi! Vûstu un blancut? (Stiefin Morat, Donald dal Tiliment); intant che il speziâr al deve fûr lis medisinis, al tosseve vonde dispès (Alan Brusini, Amîs come prime); Vigji Brustul […] al à vût dit […] che jo, se o ves un grignel di cussience, o varès di dâ fûr chei carantans che mi son vignûts cui sa dontri, ai puars proletaris dal paîs (Josef Marchet, Lis predicjis dal muini)
6. loc.v. paiâ:  l'è condanât Zanin / a dâ fûr un zechin, / a paiâ dans e spesis sul moment (Pieri Çorut, Bolzan e la sô sagre)
   Sin. paiâ , dâ , spudâ fûr , spiça fûr , tirâ fûr
7. loc.v. saltâ fûr, vignî fûr:  e si alce la lune, / lis stelis dan fûr; / content il mio cûr, / fedêl e costant, / al spiete l'amant (Pieri Çorut, Pes gnocis Latis-Venture); usâts a doprâ il fusîl di cuant che ur veve dât fûr la prime barbe (Carlo Sgorlon, Il dolfin); come torent, / che sglonfât des montanis tun moment, / sormontâts i ripârs, / par ogni bande / al da fûr pe campagne (Pieri Çorut, Il nestri dolôr in muart del Arcivescul Zacarie Bricito)
   Sin. vignî fûr , saltâ fûr , vignî
   Cfr. imparêsi , cucâ , cimiâ
   
   1. nassi, origjinâsi:  e nus da fûr a ducj un tâl boreç, / e al nas un diaoleç, / come sucêt in cualchi cavalchine (Pieri Çorut, Il tratôr galantom)
      Sin. vignî sù , dâ sù , nassi , vignî
8. loc.v. (ancje ass.) rivâ a fâ alc:  al veve i siei doi fîs in vuere e no i dave fûr a lavorâ la tiare dome cu la femine e une frutate che al veve (Alviero Negro, I piavots, Titon e la spagnole)
   Sin. rivâ , rivâ adore , cumbinâ
   
   1. fâ e passâ un esam:  pôcs mês dopo, simpri judât dal Cjapitani, o rivai a dâ fûr i esams di maturitât (Carlo Sgorlon, Il dolfin); al jere deventât une volte tant grant co al jere tes scuelis elementârs che nol podeve mai dâi fûr fin che lu àn parât vie cence licence (Pieri Somede dai Marcs, Un pugn di moscjis)

Components:

• dâ v.tr., v.intr.
• fûr av., prep., inter., adi.inv., s.m.sing.