Dizionari de Lenghe Furlane

vignî sù    [FO]

1. loc.v. vignî intun puest, intune posizion che e je adalt:  il soreli al vignì sù calm dal orizont (Agnul di Spere, Une dì de tiere)
   
   1. vignî tal plan disore di un edifici, par esempli tal cjast o tes cjamaris, che tes cjasis tradizionâls a son tal prin plan:  "Siore parone, oh! Diu siore parone, e je int che ven sù par lis scjalis…" (Pieri Somede dai Marcs, Cjase di fitâ)
   2. vignî intune localitât che e je plui a Nord:  cun cheste idee fisse tal cjâf, al vignive sù pe Tresemane (Luigi Gortani, Sant Martin); il cîl si jere scurît e de Basse e vignive sù une musse grise di nûl (Pieri Menis, Il fi de Rosse)
   3. vê une forme, une disposizion o une direzion di rive sù:  la rive di Sant Pieri, e ven sù des brumacjis bassis dai palûts, e jentre un pôc faturose, fra cjasis antighis di une bande, il puarton de canoniche e il flanc de glesie di chê altre (Maria Forte, La rive di Sant Pieri)
   4. vê une disposizion o une direzion che e va di Sud a Nord:  la strade romane Iulia Augusta, che e vignive sù di Aquilee (Gianni Gregoricchio, Int di borc)
2. loc.v. vê une altece o une dimension o une disposizion verticâl:  la ombrene dal soreli e distire lis lôr figuris sul mûr che al ven sù dal ôr dal liston (Dino Virgili, Ombrenis sul liston)
   
   1. jessi fat sù:  da pît da la arie al jere vignût sù un mûr, che ducj capive [che al jere par platâ robe di cuintribant], ma nissun diseve parcè (Pieri Menis, Il «comandatôr»); al tignive di olme lis cjasis gnovis che a vignivin sù massime a Udin (Lucio Perès, Il mâl dal mûr)
3. loc.v. dal cafè, passâ de part basse a chê alte de cogume:  a pene che al vignì sù il cafè si jevà par metilu fûr (Jolanda Mazzon, Fûr di timp)
4. loc.v. di persone, bestie o plante, disvilupâ l'organisim o ancje la personalitât:  cussì Catinuta a vigniva sù legra, sana, contenta, e gji pareva che no podevin sei in chist mont paîs plui biei dal so e plui buna int di chê da sô bandis (Ugo Pellis, Catinuta); il purcit al vignive sù ben. Une dì, sot Sant Pieri, la Lise e jeve e e va tant che une sclopetade li di Renato e i dîs: «Doman si cope il purcit» (Meni Ucel, Mieç purcit); il poul ogni an al veve dât fûr une magnifiche menade; e cussì in pôc timp al ere vignût sù lunc, lis e sutîl, che al faseve propri la biele voie (Luigi Gortani, Il poul malât); «Vuê, Irme, o vin di freâ lis scjalis e dopo o vin ce fâ tal ort… no tu âs cjalât cetante jerbe che e ven sù …» (Pieri Menis, Si disarès che e je inventade)
   Sin. cressi
5. loc.v. tacâ a esisti o a disvilupâ une cierte funzion o ciertis carateristichis:  vuê, invezit, a son vignûts sù altris parons; une sdrume di parons gnûfs. Cui no isal paron, vuê? Che anzit, se e va indenant cussì, in curt, al sarà plui dificil fâ i parons che no i sotans (Riedo Pup, I furlans e i parons); i comitâts a vegnin sù in mût "spontani", tant che i viers tal formadi (Igor Londero, Cuintristorie dal taramot)
   Sin. dâ sù , lâ sù
   
   1. rivâ a une posizion di domini o di sucès:  l'enesim furlan che al à savût vignî sù in graciis dai valôrs princips de sô tiere: umiltât, rispiet des regulis e tant lavôr (Mattia Bello, Julian Fantino, dal Friûl al Canadà par scrivi la storie)
6. loc.v. sucedi, capitâ:  il marît de la Pasca, un puôr diau sença nuia, vignûts sù i intrics de la fiolança, al si metè a bati la puarta dei doi cugnâts, sgnocolant cualche rimusui dei lôr vodagns (Federigo Comelli, Il me paîs)
   Sin. vignî fûr
7. loc.v. vê une origjin, une cause:  al jere un dî e un no dî, un fevelâ che al vignive sù da un mût di vivi e dal sei Batiston efetîf, e un stratignîsi dal dî dut (Dino Virgili, La aghe da pît la cleve)
   Sin. vignî fûr
8. loc.v. di pinsîr, ricuart e v.i., jessi pensât, contemplât, visât, soredut in maniere improvise o spontanie:  e alore i vignì sù la miôr pensade che al ves vût di vite sô (Alviero Negro, Zuantoni il cjargnel); a si inzenogla a dî una Ave Maria, ma a i ven sù un pinseir che a la fai levâ (Novella Cantarutti, Deventâ stria)
   Sin. passâ pal cjâf , vignî tal cjâf , vignî intal cjâf , vignî in ment , vignî iniment
   
   1. di peraule, jessi cognossude, ricuardade e dominade te costruzion di un discors:  ce vevial dit di precîs? Al veve dite: «Cinque minuti di …». Di ce? Ce peraule vevial doprade? Al ingrispave il cerneli, ma chê peraule no i vignive sù (Meni Ucel, Il discors)
9. loc.v. di sensazion, umôr, impuls e v.i., fâsi sintî imburît e cun fuarce:  lis cjampanis che a lavin indevant a sunâ i fasevin vignî sù une grande maluserie (Jolanda Mazzon, Di là de rêt); in chê volte mi è vignude sù un fregul di fote e i ai rispuindût a fuart che nol stas a vignî fûr cu la sô autoritât (Josef Marchet, Lis predicjis dal muini)
10. loc.v. di cundizion fisiche, malatie e v.i., tacâ a vê efiet, vê une manifestazion:  a Rosane i è vignût sù il fûc di sant Antoni (Cristina Noacco, Faliscjis)
    Sin. vignî fûr
11. loc.v. ancje cun costruzions infinitivis, vignî voie, vignî une intenzion di meti in vore daurman:  a di un pont a Milio i ven sù di fumâ un spagnolet (Meni Ucel, Culumie)
12. loc.v. di robe di mangjâ, jessi pesante di digjerî, ancje tant di tornâ sù dal stomi tal cuel o in bocje:  ma jo vevi trincât fûr di misure, / mi bolive tel cuarp une misture / di snop, di rosolin, / e di trê cuatri cualitâts di vin; / e po il salam e mi vignive sù / e mi sfuarçavi par parâlu jù (Pieri Çorut, Il velion)
    Sin. tornâ sù
    
    1. di savôr di alc che si à mangjât, tornâ a fâsi sintî, soredut se no si à digjerît ben:  al mi ven ancjimò sù il bacalà che o ai mangjât jarsere (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Components:

• sù av., inter., s.m.inv., adi.inv.
• vignî v.intr., v.aus.

Proverbis:

• i dîs il cuviert al paron: se no tu vegnis sù tu, o ven jù jo
• tal troi simpri batût no ven sù jerbe