Dizionari de Lenghe Furlane

tornâ sù    [AF]

1. loc.v. rivâ sù une altre volte intune posizion alte, par esempli insom di un rilêf, tal plan alt di un edifici, a cuote alte tal aiar e v.i. o intun puest che al è a Nord:  al jere tornât sù inte sô cjamare e al veve spalancât i scûrs dal barcon (Franca Mainardis, Il sium di Lissandri); pitôrs po! Zuanfrancesc al tornave sù su la armadure, al cjapave in man il pinel, lu tocjave tal colôr… (Dino Virgili, La aghe da pît la cleve); […] content come une vacje al torne sù in Cjargne (Luigi Gortani, Al marcjât di Vile)
   
   1. tornâ sul pêl da la aghe
2. loc.v. tornâ a cjapâ une posizion di podê:  [fevelant al sindic prin des elezions] "O viôt che o veis sperance di tornâ sù e che us fasin cavalîr…" "Ben! Lassìn lâ; a mi mi interesse il ben dal popul." (Domeni Zannier, La crete che no vai)
3. loc.v. (fig.) tornâ a jessi presint, tornâ a sucedi:  a tornaran sù di sigûr, e za o notìn i segnâi, i mai impisulîts riclams ae centralizazion de vite publiche (Dree Valcic, Citadins talians di nazionalitât furlane)
   
   1. jessi cjatât o osservât plui voltis:  lis contis tradizionâls […] a son patrimoni coletîf di popui intîrs e fintremai a puedin tornâ sù compagnis in dut il mont (Sandri Carrozzo, Il miluç de magne)
4. loc.v. jessi fat sù di gnûf, tornâ a jessi costruît:  tal 451 a son passâts i Uns: a àn brusade e ardude Aquilee! No je mai tornade sù come prin (Francesc Placerean, La nestre storie); [dopo dal taramot] ancje il domo al è tornât sù insieme cu lis nestris cjasis e contradis (Antoni Beline, Une piçule storie inte grande storie)
5. loc.v. tornâ a vê salût, fuarce, funzionalitât e v.i.:  o soi vieli, furlans, soi lambicât / dai pinsîrs di famee, / cu la sorte che simpri mi sbelee, / e nol è di stupî / se o deventi imbecîl plui ogni dì, / se ogni dì plui voi jù / sence sperance mai di tornâ sù (Pieri Çorut, Il Strolic mezan par l'an 1866)
6. loc.v. cressi di gnûf di valôr, cuantitât, intensitât e v.i.:  il presit de benzine al jere lât jù tai timps dal covid e po al è tornât sù
7. loc.v. dal savôr dal mangjâ no ben digjerît, fâsi sintî di gnûf ancje timp dopo che si à mangjât:  o ai sintût a tornâ sù la cevole dut il dopomisdì
8. loc.v. jessi ricuardât o jessi pensât di gnûf:  intant ae Mabile i jere tornât sù, come un rumi, il cantin de division cul cugnât (Maria Forte, Mabile la Lunghine); al siarà i voi e i tornà sù puar Tite e la tragjedie de sô muart tal Flum (Mario De Apollonia, Il timp par ledrôs)
   Sin. vignî sù , tornâ tal cjâf

Components:

• sù av., inter., s.m.inv., adi.inv.
• tornâ v.intr., v.tr., s.m.