Dizionari de Lenghe Furlane

tornâ  tor|nâ  [FO]

1. v.intr. lâ une altre volte tal lûc di dontri che si jere partîts o di li che si vevisi dislontanât:  e partive in biciclete a buinore, e e tornave a cjase la sere (Meni Ucel, Otavari a Madone); "Bisugne propit che o vadi. O torni subit" (Anute Fabris, A passe la scalmane)
   Sin. tornâ incà , tornâ indaûr
2. v.intr. lâ une altre volte intun puest li che si jere za stâts:  «Milie o torni jù in Afriche… lunis o martars ae plui lungje…» (Pieri Menis, Si disarès che e je inventade); une volte al motivà che i sarès plasût tornâ in Tiere Sante e restâ par simpri lenti jù (Carlo Sgorlon, Il dolfin)
3. v.intr. jessi di gnûf intune cierte cundizion, situazion, compagnie, relazion e v.i.:  cussì, la sô famee, la sô grande famee e tornà insiemi e chel al jere dut pal moment (Maria Forte, Cjase di Dalban); Cino al è tornât inte mê vite dopo trentecuatri agns (Gianni Gregoricchio, Trê feminis)
4. v.intr. meti une altre volte atenzion su alc, cjapâ une altre volte in esam:  dopo cene, tal cuiet dal fogolâr, intant che la vecje e gucjave, la Ulive e tornà sul discors di prime (Maria Forte, La tiere di Lansing); no mi plâs di tornâ cu la memorie a chê prime volte (Gianni Gregoricchio, Trê feminis); Tornìn in argoment: / l'an al sarà abondant / di siale e di forment (Pieri Çorut, Pronostic del 1833)
   Sin. lâ
5. v.intr. puartâsi, pensâ, fâ, vivi e v.i. une altre volte intune maniere che si le veve lassade:  il timp da lis decisions si faseve simpri plui dongje: tornâ a la vite di prime, a la sô buteghe, al drandran di ogni dì cence storie e cence glorie [in France], o restâ in Friûl (Franca Mainardis, Il sium di Lissandri)
6. v.intr. sucedi une altre volte:  i lens a butin fûr une altre volte e al torne il timp dai lavôrs tai vignâi (Alan Brusini, Par stradis lungjis)
7. v.intr. jessi une altre volte intune cierte cundizion, vê di gnûf une cierte carateristiche:  i bastave di viodi la muse di Ane, chê muse cence ingredeis di pinsîrs sbaliâts par tornâ legri (Maria Forte, "Nossent"); al començave a visâsi di jessi leât a chê tiere cun dute la fuarce di un istint rabiôs che lu faseve tornâ zovin (Pieri Menis, Sul agâr); dome cuant che la ore di gnot, cu la piçule, e srarì la place, dut al tornà cuiet (Maria Forte, Varc di confin)
   
   1. jessi intune cierte cundizion, vê une cierte carateristiche ancje cence vêle vude prime:  l'orgoiôs e teribil Tiliment / che torgul puarte vie lu mont e il plan / torne cumò, se al sofle Tramontan / di aghe no, ma di fum un grant torent (Ermes di Colorêt, II, 23)
      Sin. deventâ , vignî
8. v.intr., v.tr. cun "a" plui infinît, ripeti une cierte azion:  al veve let che la Kaiserpfalz le vevin slargjade, brusade, comedade, ruvinade, tornade a fâ sù un grum di voltis (Agnul di Spere, Un cidinôr todesc); par dute la zornade, Annibale, al pensà e al tornà a pensâ cemût che al varès vût di svoluçâle e, a la fin, al decidè di contâje a la scletes (Roberto Ongaro, Il muc); ce brut timp! al torne a plovi… (Pieri Somede dai Marcs, Resurezion a Pontinie)
   Cfr. di gnûf , indaûr
   
   1. al pues ancje tignî sù la costruzion dal dopli imperatîf:  si che, tire, prove, torne prove, massaze… clamìn il vitrinari, ma no, al jere masse tart, aromai (Laurin Zuan Nardin, A confessâsi); guai se [gno pari contant] al sbaliave o se al saltave un personagjo de cjadene!!! Mieze inçusside, mi tornavi a sveâ: "No, che no je cussì! Torne tache!" (Laura Nicoloso, Bidin e Bidine di Marie Forte)
9. v.intr. cuntun complement predicatîf, risultâ:  vuê, intune clime culturâl dute diferente, la lôr leture [dai simbui dai mosaics] no torne nuie facile (Giovanni Battauz, Flavio Cossar, Renato Iacumin, I mosaics de basiliche di Aquilee)
   Sin. vignî , jessi¹ , risultâ
10. v.intr. di calcul, resonament, jessi just:  fâ cori la pene sui libris contabii e fâ tornâ i conts (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
    Sin. cuadrâ , bati
11. v.tr. dâ o fâ vê di gnûf al paron o possessôr di prime alc che al jere stât dât o prestât:  "Ah, cavalîr! [riferît al diaul] dut ce che tu âs piardût, dut jo ti torni indaûr, ma tu tornimi la anime!" (Dolfo Zorzut, Blancjuteflôr e el zuiadôr); "Sint, Romeo, o sai che o ai di tornâti inmò chei bêçs che tu mi âs prestât […]" (Roberto Ongaro, Cretevierte)
    
    1. (fig.) dâ di gnûf une cualitât, une carateristiche e v.i. che a jerin stadis pierdudis:  si innulà fin a pierdi padin e e fo une fadie pe brût rivâ a cuietâle e a tornâi la fiducie che il vistît al jere simpri biel (Maria Forte, La cotule di none Betilde)
12. v.tr. butâ fûr ce che si à mangjât o bevût:  no une peraule pai siei strabalçs in ostarie, e no vevin di dâ sù se lu viodevin a tornâ il vin pai cjantons (Maria Forte, La tiere di Lansing)
13. v.tr. (fig.) cuintricambiâ:  cualchidun i butave la botonade e jê le tornave biel sclete (Maria Forte, La fie çuete); Casanova al mangje là che lu invidin, e al torne il plasê contant ai ospits di cuant che al jere scjampât dai Plomps o dal duel in Polonie (Pierluigi Visintin, Friûl e furlans te Histoire de ma vie di Giacomo Casanova); a ti torni lis legnadis, e cul interès (Roberto Ongaro, Il muc)
    Sin. cuintricambiâ , dâ indaûr , restituî , ricambiâ , rindi , ripaiâ , tornâ indaûr
14. v.tr. [BF] fâ jessi di gnûf intune cierte situazion, cundizion e v.i.:  se atrai lu fiar virtût di calamite, / cussì di biele bocje un sôl suspîr / si tornâmi è bastant, di muart a vite (Ermes di Colorêt, I, 20)
15. s.m. viaç fat par jessi di gnûf intun ciert puest:  i capitarin denant cun chel pac di libris che al varès fat un viaç dibant, tant tal lâ che tal tornâ (Maria Forte, La tiere di Lansing); il soreli al jere calât daûr la mont e la int e impià lis falis, prin di scomençâ a incjaminâsi su la vie dal tornâ (Roberto Ongaro, Cretevierte)
    Sin. tornade
    
    1. azion, dinamiche dal jessi di gnûf, sucedi di gnûf e di ducj i significâts dal verp:  [i sovraniscj] a batin par un tornâ ae sovranitât origjinâl dai stâts "nazionâi" di stamp votcentesc (Fabian Ros, La invenzion dal stât)

Polirematichis e espressions idiomatichis

• tornâ a cjapâ il fîl loc.v.
• tornâ adun loc.v.
• tornâ bon loc.v.
• tornâ cont loc.v.
• tornâ daprûf loc.v.
• tornâ dentri loc.v.
• tornâ di ca loc.v.
• tornâ dongje loc.v.
• tornâ fûr loc.v.
• tornâ i conts loc.
• tornâ il plasê loc.v.
• tornâ in cjarezade loc.v.
• tornâ in se loc.v.
• tornâ incà loc.v.
• tornâ indaûr loc.v.
• tornâ intal cjâf loc.v.
• tornâ la farine loc.v.
• tornâ sù loc.v.
• tornâ tal cjâf loc.v.
• tornâ tal so jessi loc.v.
• tornâ un pas indaûr loc.v.
• tornâ un pont indaûr loc.v.
• tornâ vie loc.v.

Proverbis:

• al pâr che la sô crôs a sedi la plui grande ma se si cjale chê di chei altris si torne a cjoli sù la sô
• bisugne cjoli l'abûs e tornâ l'ûs
• ce che al è stât al po tornâ
• cjoli l'abûs al è tornâ l'ûs
• cjolimi di grant e tornimi di piçul
• cuant che lis vacjis a van e a tornin di mont, un montanon al è pront
• cui che al da al torne a cjapâ
• cui che al è di biele forme in avrîl al torne
• cui che al va e torne al fâs bon viaç
• daspò dal bon timp e torne la ploie
• daspò de ploie al torne il bontimp
• daspò tancj agns e tant timp la aghe a torne al so mulin
• dulà che si è stâts si po tornâ
• i viei a tornin fruts
• in cent agns e cent dîs la aghe a torne ai siei paîs
• l'ingjan al torne a cjase dal ingjanadôr
• la aghe dulà che e je stade e po tornâ
• la aghe dulà che e jere, e torne
• la blesteme a va ator siet agns e po e torne a colâ su par cui che le da
• la bramazion e ven, e va; po e torne su la schene di cui che le da
• la caritât e jes pe puarte e e torne pai barcons
• no je mai stade ploie che il bontimp nol sei tornât
• passade la doie, tornade la voie
• passâts i sessante agns si torne fruts
• robe cjatade e no tornade e je tant che robade
• robe cjatade, simpri tornade
• robe dade mai tornade, cul curtìs insanganade
• robe dade, mai plui tornade
• se o lin a puartâ la nestre crôs in place, o tornìn a cjase cu la nestre
• se si file dal nâs a la bocje, no torne su la rocje
• se si file mai tant che al rivi dal nâs a la bocje, e je une glagn che no torne su la rocje
• si sa di lâ ma no di tornâ
• vite e stime scjampadis, no tornin sul vergon