tornâ indaûr
[FO]
-
loc.v.
lâ ta chel stes puest dulà che si jere o inviâsi de bande di dulà che si jere rivâts:
e jere tant lontane di cjase che no jere plui buine di tornâ indaûr (Jolanda Mazzon, Fûr di timp);
al fâs doi pas viers la puarte, po al torne indaûr, ducj i moviments de sô persone a fasin viodi il scombati des ideis te sô anime (Pieri Somede dai Marcs, Gnot di Nadâl)
Sin. lâ indaûr
-
loc.v.
lâ tal timp passât, lâ indaûr tal timp:
nol zove nue iludisi; ce che al è fat l'è fat, e no si torne indaûr plui (Giovanni Gortani, La sbigule - Une gnot tun broili);
"Alore si varès podût dismenteâ la nestre disgrazie; e il nestri Toni, tornât frut, al sarès vignût sù un pôc a la volte, frutat, zovenot, om; al sarès stât come se invezi di murî, al fos tornât indaûr cui agns…" (Bruno Paolo Pellarini, Ninenane)
Sin. lâ indaûr
-
lâ a robis passadis cul pinsîr, cu la memorie, cu la capacitât di deduzion, cu la logjiche e v.i.:
si cjatisi [cu lis amiis] e si tornin a sgjavâ lis oris di fruts e si torne indaûr fin dulà che si pues visâsi (Maria Forte, Cjase di Dalban);
daspès al tornave indaûr cul pinsîr al timp che al jere frut e che dut al jere clâr e sigûr (Gianni Gregoricchio, Îr e doman);
par podê fevelâ, cence cori il riscjo di dî stupidagjinis, su la situazion sanitarie de nestre Regjon al è impuartant tornâ indaûr di cualchi an e capî cemût che e je partide la riforme sanitarie (Moreno Lirutti, Cemût ise di misurâ la "buine sanitât"?)
-
loc.v.
contâ o descrivi robis che inte narazion o inte logjiche a vegnin prime dal pont dulà che si è rivâts:
ma prin di lâ indenant, torni indaûr, / che ai bisugne di fâus une avertence, / fin ca par distrazion lassade fûr (Pieri Çorut, Lis gloriis di Tambûr - Tamburade I)
Sin. lâ indaûr
, lâ un pas indaûr
-
frontâ di gnûf un argoment che si veve za frontât, cjapâ di gnûf in considerazion, tornâ a meti sot de atenzion e v.i.:
o tornìn indaûr sul resonament di Cavallo e dal moviment politic dal sindic di Udin, Sergio Cecotti, che a domandin, struche struche, di cjalâ al interès gjenerâl di dute la Regjon e no dome a chel di Triest (Sandro Lano, Une lûs insom dal "Coredôr 5"…)
-
loc.v.
vê une involuzion:
"[…] sclops di bombis a volaressin e di ogni sorte…" "No, no Bastian, al sarès piês, vuê no si po fevelâ cussì, o saressin cuintri di nô, cuintri la umanitât, si riscjarès di tornâ indaûr" (Pieri Somede dai Marcs, Un pugn di moscjis);
il probleme che o vevi denant al jere chel di dâ une prospetive di continuitât e di espansion progressive e sistematiche a ce che o vevin inviât, che nol ves di lâ indenant a sangloç o tornâ indaûr (Adrian Cescje, Memoriis di politiche linguistiche)
-
loc.v.
soredut di document, domande, pratiche burocratiche e v.i., jessi refudât:
Enea nol podeve mai partî pal Venezuela par vie che lis cjartis i jerin tornadis indaûr uns cuatri voltis (Alan Brusini, Amîs come prime)
-
loc.v.
cambiâ di idee:
si rindeve cont che zaromai Firmato nol sarès tornât indaûr de sô decision (Gianni Gregoricchio, Îr e doman);
[la glesie] e à di vê il coragjo di riscjâ, ancje a cost di sbaliâ, ancje a cost di tornâ indaûr (Francesc Placerean, La Glesie e à di lassâ i popui come che a son e fâur di levan seont la lôr paste)
-
loc.v.
tornâ alc che si à cjapât o che si à vût a cui che lu à dât:
"Jo o vuei che al mi torni indaûr ce che al mi a robât: la pâs, la serenitât, l'onôr, e stant che nol podarà mai fâlu, alore o pretint i siei bêçs" (Luciano Rocco, La foghere);
si contentà di une mê ricevude, là che jo mi impegnavi a tornâi indaûr i bêçs che mi veve dât (Pierluigi Visintin, Friûl e furlans te Histoire de ma vie di Giacomo Casanova)
Sin. dâ indaûr
, tornâ
-
ripaiâ di ce che si à vût:
ju orès ringraziâ cun dut il flât / e tornâur indaûr chel che mi àn dât (Pieri Çorut, Dissipline scolastiche)
Components:
-
indaûr
av., inter., adi.inv.
-
tornâ
v.intr., v.tr., s.m.
Proverbis:
- cui che nol va indenant al torne indaûr
- la vedrane e volarès vêlu, la maridade e volarès tornâlu indaûr
