Dizionari de Lenghe Furlane

indaûr  in|da|ûr  [AF]

1. av. intal viers contrari a chel normâl, te direzion contrarie rispiet a chê che si leve:  i carabinîrs a sburtavin indaûr la int cu lis sclopis (Dino Virgili, La aghe da pît la cleve); [i bersalîrs] a cjaminavin simpri sticâts butant indaûr il cjâf, cul çuf des plumis, come cjavai ombrîts (Maria Forte, Cjase di Dalban)
   Var. indavûr , indavôr
   
   1. inter. tant che comant a slontanâsi lant te direzion contrarie rispiet a chê che si leve:  - Indaûr! Indaûr! … - al urlave pre Jaroni striçât tal mieç (Dino Virgili, La aghe da pît la cleve)
2. av. plui indentri, in posizion lontane rispiet a un pont di riferiment, spec. rispiet a un confin, ae linie dal mâr e v.i.:  pericul di cuâl? Si lavore indaûr, tai puescj ben parâts cuant che lontan a scombatin (Maria Forte, "Nossent")
3. av. in complements di timp, par segnâ un tiermin tal passât:  sot de loze dal vecjo municipi a jerin bielis pituris di cinccent agns indaûr (Pieri Menis, Lis leiendis di Buie); mi visi agns indaûr di une gnot stelade come cheste (Checo Tam, Lady Marmalade); o soi lât a seâi il prât a une femine di setante agns […] che mi veve domandât chest plasê ancjemò une setemane indaûr (AAVV, Sul florî)
   Sin. za fa , fa¹
   
   1. adi.inv. sucedût tal passât, spec. che al è a pene stât, che al è a pene stât dit, scrit, fat e v.i., che al è a pene prime intun ordin:  tu sâs ancje tu, Ulive, che chê tiere mi è vignude des mês etis indaûr (Maria Forte, La tiere di Lansing); vevial ancje une rêt comerciâl? No lu savìn par vie di vicendis di vuere nomenadis intal paragraf indaûr (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât)
      Sin. stât¹ , prin , prime¹ , parsore , disore
4. av. une altre volte:  al disvuedà la tace e al tornà a jemplâle indaûr (Amedeo Giacomini, Tal ospedâl); el Signôr e sant Pieri si metin indaûr a cjaminâ; e cjamine che ti cjamini gji capite indaûr sêt (Dolfo Zorzut, El Signôr al cjastie i avârs e al premie chei di bon cûr)
   Sin. ancjemò , inmò , di gnûf
5. av. di cuantitât di bêçs, par rest, par diference:  Nart Vidisson l'à consegnât al puintâr un dadîs, che jal cambii, juste par fâ alc di monede che al è sence, e intant che al spiete il rest indaûr, al tache farie cuntun altri viandant (Giovanni Gortani, Il viaç di Vidisson)
   Sin. fûr
6. adi.inv., av. che al sucêt in ritart:  chel an a jerin indaûr no dome lis lunis, ma ancje la criùre tacade aes lunis (Maria Forte, La tiere di Lansing)
   
   1. di un orloi, segnant une ore che e je za passade:  viôt che l'orloi al è cinc minûts indaûr
7. adi.inv., av. ancjemò lontan di une fin, di une soluzion, di un risultât e v.i.:  o sin indaûr cui lavôrs (Pieri Somede dai Marcs, Il prossim); lis soluzions tecnologjichis proponudis [par sparagnâ energjie tai traspuarts] a son ancjemò indaûr e parziâls (Matteo Mazzolini, Autonomie energjetiche nol vûl dî autarchie)
   
   1. che nol à ancjemò rispietât une scjadince:  il cont al saveve, di lui, dut: di trop indaûr che al jere cul fit, de miserie, dai tancj fruts (Riedo Pup, Vigji Brusin)
   2. che al è restât di paiâ za di timp:  par paiâ i debits ingrumâts, lis ratis indaûr de prediâl e par comprâ une altre vacje, a vevin scugnût vendi un pâr di cjamps (Gianni Gregoricchio, Trê feminis); a forin puartâts in taule ducj i conts indaûr (Maria Forte, Cjase di Dalban)
8. adi.inv., av. che al è restât a un nivel plui bas di disvilup economic, culturâl, sociâl:  si po viodi cetant indaûr che si è in Italie cui ordenaments aministratîfs (Josef Marchet, No sin contents!)
   Sin. deprès , sotsvilupât , primitîf
9. adi.inv., av. leât a valôrs o prejudizis dal passât, che nol vûl o che nol rive ben a acetâ lis novitâts:  o soi indaûr come la code dal mus. Lu sai! (Checo Tam, L'orloi de muart); chei che a disin che e je ore di cambiâ a son cjampaniliscj, separatiscj, austriacants, indaûr, parcè che a pretindin masse (Francesc Placerean, Cuintristorie dal Friûl dal 1866 fint in dì di vuê)
   Sin. lât in vieri , ranzit , superât , vecjo , vieri¹ , passât , conservadôr , reazionari , codarûl
10. adi.inv., av. che nol capìs ben, che nol è tant svelt di inteligjence o che nol à istruzion:  macacos! sêso cussì indaûr! (Alan Brusini, La cartuline); Dree al veve 14 agns ma al jere une vore indaûr e nancje svilupât (Checo Tam, La haine); o disonorìn il nestri Friûl cul mostrâsi plui indaûr dal ultin vagon dal vapôr (Josef Marchet, Lis predicjis dal muini)
    Sin. stupit , gnogno , ignorant

Polirematichis e espressions idiomatichis

• cjapâ indaûr loc.v.
• cjapâsi indaûr loc.v.
• dâ indaûr loc.v.
• fâ marcje indaûr loc.v.
• fâ un pas indaûr loc.v.
• indaûr come la code dal mus loc.adi.inv., loc.av.
• jessi indaûr cul cjar dal fen loc.v.
• lâ indaûr loc.v.
• mandâ indaûr loc.v.
• parâ indaûr loc.v.
• restâ indaûr loc.v.
• stâ indaûr loc.v.
• tignî indaûr loc.v.
• tirâ il cûl indaûr loc.v.
• tirâsi indaûr loc.v.
• tornâ indaûr loc.v.
• tornâ un pas indaûr loc.v.
• tornâ un pont indaûr loc.v.
• voltâsi indaûr loc.v.

Proverbis:

• cuant che si crôt di là un pas indenant, si va doi indaûr
• cui che al sta indaûr no i rivin i claps ma i rive l'odôr
• feminis a 'nd è trê al carantan, e il carantan indaûr
• feminis a 'nd è trê al solt, e il solt indaûr
• par consolâsi baste cjalâsi indaûr
• se tu mangjis luvins e tu ti voltis indaûr tu viodarâs cualchidun a mangjâ lis scussis