Dizionari de Lenghe Furlane

prime¹  pri|me  [FO]

1. av., adi.inv. intun moment anteriôr rispiet a cuant che si fevele o a cuant che si riferìs il discors:  prime al sgarfâ in sachete, dopo al tornà viers de machine par domandâi a Zac se al ves cualchi pence (Franco Marchetta, Light my Fire); al tornà su la strade savoltade, tal puest dulà che e jere stade, fin doi trê mês prime, la cjase dai siei (Carlo Sgorlon, Prime di sere); propit la dì prime mi veve fermât, Betùs, par domandâmi di une robe che no vevi capît dal dut (Stiefin Morat, Kebar krossè)
   Sin. prin , denant , devant
   
   1. intun timp plui curt:  il zovin si jera ustinât di tignì sù la vela, sperant di finî prima il so viaç (Federigo Comelli, Il me paîs)
   2. ancje in riferiment a spazi, ordin logjic, impuartance e v.i.:  [il tren di saorne] al è une sorte di casselot cjamât […] in mût che cul pês al salti par aiar lui se mai e fos minade la linie e al pari […] il convoi in spiete te stazion prime (Ivano Urli, Storie di Min); [cheste notizie] le vin cjapade sù nome parcè che si preste a cualchi riflession. Prime, par visâ che no si à di crodi dut (Riedo Pup, Dopo 50 agns lavôr ancjemò)
2. s.m.sing. timp o situazion che a jerin, che a son za stâts rispiet a cuant che si fevele o a cuant che si riferìs il discors:  un timp dulà che si viodevisi parsore di un fîl, in tension jenfri un prime e un dopo (Stiefin Morat, Kebar krossè)

Polirematichis e espressions idiomatichis

• cjapâsi prime loc.v.
• o prime o dopo loc.av.
• prime di Crist loc.adi.inv.
• prime o daspò loc.av.
• prime o dopo loc.av.