Dizionari de Lenghe Furlane

denant  /-à-/  de|nant  [FO]

1. av., prep., adi.inv. de bande o te direzion che si cjale o che si va:  siôr Agnul al segnà une crôs, par tiere, cul stombli de scorie, propit denant dai cjavai, cuant che a stavin par partî (Maria Forte, Cjase di Dalban); Tonin e Vigjut denant, la mame e il papà daûr, a levin jù pe strade dal mulinat (Pieri Menis, Nadâl ancje par Gjelmin); al scomence a tirâ vie la tiere cu lis talpis denant e po al tache a baiâ (Gloria Angeli, Mariutine e i omenuts dal timp)
   Sin. devant , indevant , indenant , par devant , par denant , devant di , denant di
   Var. nant , inant , inants , denants
   
   1. de bande principâl, de bande che si jentre e v.i.:  a sunavin undis co o soi dismontade denant de puarte di cjase mê (Gianni Gregoricchio, Trê feminis)
   2. cun alc o cdn. de bande che si cjale, o ancje dome dongje:  Ernest Morassut si sentâ denant di une taule e al domandà a une siore che e jere daûr dal bancon che i puartàs une tace di bire (Agnul di Spere, In Friûl, nossere); passant denant dal mûr de glesie svelte svelte par no fâsi viodi si jere direte di chê bande dal stradon che al mene dret tal cimitieri (Pieri Somede dai Marcs, A jerin lagrimis)
2. av., prep., adi.inv. inte part anteriôr di alc:  il camion di Vera e dal Nino lu vuidin doi neris, cul casselot plen di talians, ma i vuidadôrs si inacuarzin che Vera e spiete, e cussì i fasin di mot che si senti denant cun lôr doi (Ivano Urli, Storie di Vera)
   Sin. devant
   
   1. s.m.sing. part anteriôr di alc:  si vicinà al balcon che al dave sul denant de cjase (Nadia Pauluzzo, Il bintar); cheste monture dal lager di Buchenwald e je […] un cjamesot di tele grese […] cuntun steme denant e la tô matricule segnade ancje chê sul denant (Ivano Urli, Storie di Vera)
      Sin. devant
      Cfr. music¹
3. av., prep., adi.inv. intune posizion precedente:  stant che une vore di varietâts che a cognossin lis vocâls lungjis no 'nd àn denant di -r finâl in putropis peraulis, o vin decidût di stabilî une grafie buine par ducj, segnant lis lungjis ta cheste posizion nome cuant che a son gjenerâls (Xavier Lamuela, La grafie furlane normalizade)
   Sin. devant , par devant , par denant , prime¹ , prin , devant di , denant di , prime di , prin di
4. av., prep., adi.inv. plui dongje e plui in viste rispiet a alc altri:  altris paîs di là de flumere: piçadis di cjasis grimpadis te jerbe o, ancje, distiradis denant di grops di arbui (Enrico Martina, Ricuarts e inlusions)
   Sin. devant , devant di , denant di
5. av., prep., adi.inv. dongje e in mût di cjalâsi un cun chel altri:  e subita la rigjina da aganis a sta denant da Catinuta e la cjala fissa tai voi (Ugo Pellis, Catinuta)
   Sin. di face , di front , in face , cuintri , devant , di face di , di front di , in face di , cuintri di , devant di , denant di
6. av., prep. in presince di, inte situazion di vê di frontâ alc o cdn.:  tropis voltis si isal cjatât a fâ i conts cu la morâl e la etiche denant de muart? (Christian Romanin, Amato De Monte: Il Friûl, patrie des bataiis di civiltât); no si rive a voltâ la muse se si à denant une femine cussì (Michele Calligaris, Te vuate); costret a presentâsi une altre volte denant dal Tribunâl di Udin (Franco Marchetta, Madalene)
   Sin. devant , denant di , devant di
7. av., prep., adi.inv. in posizion plui alte, impuartante e v.i. intune jerarchie, classifiche, scjale di valôrs e v.i.:  il prin in classifiche al è denant dal secont par cuatri ponts
   Sin. prin , prin di , prime¹ , prime di , devant , devant di , denant di
8. av., prep., adi.inv. tun moment precedent, prime inte sucession temporâl:  a era usada a no levâ na fuea e nencja a imbastî na pensada denant domandâi a jê che a era la pi vecja (Novella Cantarutti, Li Anzuliti); li di siore Lise al jere stât un grant dafâ. Cualchi dì denant, dut un navigo par lustrâ la cjase (Maria Forte, Cjase di Dalban); o savevi che lis robis no saressin mai tornadis come denant (Carlo Sgorlon, Il dolfin); in chei dîs, denant Nadâl, nissun començave un gnûf lavôr (Pieri Menis, Il pignarûl)
   Sin. prin , prin di , prime¹ , prime di , devant , devant di , denant di
9. av. in prospetive, tal futûr:  se o vessin timp denant e no fossin in ritart rispiet a chei altris moviments autonomiscj in Italie, o podaressin lassâ timp al timp (Adrian Cescje, Memoriis di politiche linguistiche)
10. av. cun preference, plui vulintîr:  se si à di fâ chês codis in machine par lâ al mâr, denant o resti a cjase
    Sin. pitost , prin , prime¹ , devant

Polirematichis e espressions idiomatichis

• cui pîts par denant loc.av., loc.adi.inv.
• cumò denant loc.av.
• denant che loc.coniun.
• denant da la ore loc.av., loc.adi.inv.
• denant dai voi loc.av.
• denant daûr loc.av.
• denant di loc.prep.
• denant di Crist loc.adi.inv.
• denant trat loc.av.
• dint denant loc.s.m.
• lâ denant daûr loc.v.
• meti denant loc.v.
• meti lis mans denant loc.v.
• par denant loc.av.
• passâ denant loc.v.
• vê pôc ce cjalâ denant di se loc.v.
• vignî scûr denant dai voi loc.v.
• vignî scûr denant i voi loc.v.
• viodi neri denant dai voi loc.v.
• viodi neri denant i voi loc.v.

Proverbis:

• a tignî i dincj denant de lenghe, al è simpri un bon consei
• al vâl plui un lusôr denant che no cent daûr
• cui che al fâs il cont denant l'ostîr lu fâs dôs voltis
• denant da la ore ni che si nas ni che si mûr
• denant da la ore no si po ni nassi ni murî
• denant di maridâsi al pâr che al mancji alc, daspò al mancje dut
• la nêf denant Nadâl e dure tant che l'açâl
• la nêf denant Nadâl e fâs solâr
• miôr i çafs daûr che no i predis denant
• no bisugne meti il cjar denant dai bûs
• scove denant de tô puarte
• se a disin par denant, si sa difindisi; se a disin par daûr, i disin al cûl