Dizionari de Lenghe Furlane

passâ denant    [AF]

1. loc.v. movisi denant o dongje di alc o di cdn.:  e ducj passavin denant da sô cjasa e disevin: «Benedeta tu fra duti li feminis furlanis […]» (Ugo Pellis, Catinuta)
   Sin. passâ devant
   
   1. di strade o sim., jessi dongje, jessi denant:  mi tornin a ments, netis tal sintiment, dôs, trê vosutis di fruts sintudis stant intal jet jentrâ pes fressuris dal barcon di chê cjamare vignint sù de stradute che passave denant, tal cuiet cidinôr di Luvincis (Ivano Urli, Luvincis)
2. loc.v. lâ plui svelt di alc o di cdn., in mût che di daûr che si jere, si finìs denant:  [chês altris feminis] in procession i ziravin ator planchin, le sburtavin indaûr cence fâsi inacuarzi, i passavin denant, si ingrumavin fra di lôr, a fasevin cjadenis di braçs par fâle restâ la ultime de file (Maria Forte, La aghe dal Ariul)
   Sin. passâ devant , passâ , superâ , lâ denant , lâ devant
3. loc.v. fâ alc o vê alc prime di cdn. altri, in câs ancje par no vê rispietât un ordin, une code e v.i.:  "O varès gust" mi diseve, "di sei il prin a cognossi lis sôs conclusions. No intint di passâ denant a di nissun, la Universitât che lu mande o il Prefet. Ma nome pal ben dai mei aministrâts. Lui mi capìs no mo […]" (Alan Brusini, Gian Paolo Linda, I forescj)
   Sin. passâ devant , lâ devant , lâ denant
4. loc.v. jessi miôr, fâ miôr, vê risultâts miôr di altris:  la Juve e passe denant dal Napoli e si cjape la prime posizion in classifiche. L’Udin al reste a mieze classifiche (Marc Stolf, Juventus - Udinese 2-0)
   Sin. lâ parsore , passâ parsore , scjavalgjâ , vanzâ , passâ , superâ , passâ devant

Components:

• denant av., prep., adi.inv., s.m.sing.
• passâ v.intr., v.tr.