Dizionari de Lenghe Furlane

passâ  pa|ssâ  [FO]

1. v.intr. lâ par un puest o traviers di un o plui elements cence fermâsi, o ancje in sens gjeneric o cuntune relazion spaziâl che no je traviers, ma dongje, parsore, in bande e v.i.:  e viôt e e sint a passâ par aiar i aeroplans. E sint a dî che a bombardin di sgrisulâsi (Ivano Urli, Storie di Vera); Pieri al montà su di un bus che al passave par li (Amedeo Giacomini, Tal ospedâl); a passavin autos che a menavin int in place, tai cafês, in glesie pe Messe (Agnul di Spere, Vivi a Codroip)
   
   1. lâ dentri:  cuant che aromai ancje la Catalogne e je pierdude, tal Zenâr dal ‘39, [il president Companys] al passe in France (Carli Pup, Teritoris - Oms di Libertât); cuant che e rivà te cjase di ripôs e e domandà di jê, le faserin passâ intune stanziute inmufide che e servive di sale di spiete (Roberto Ongaro, Il muc)
      Sin. lâ , lâ dentri , jentrâ
   2. (fig.) tocjâ tant che argoment, element di une discussion, di une liste e v.i.:  o pensi ai Madrigâi di Monteverdi, ae grande stagjon de Liederistiche todescje, di Schubert a Wolf, passant par Schumann e Brahms (Erika Adami, "Amôrs" in musiche)
2. v.intr. lâ intun puest par pôc timp prime di tornâ a lâ vie:  Mine, prin di lâ in glesie, e passave in bancje (Franca Mainardis, Il sium di Lissandri); "O ai viodude la femine dal Girlando: je passade in Preture par firmâ il ricognossiment dal so quondam" (Sandri Di Suald, Ah! la provincie)
   Sin. fâ un salt
3. v.intr. (fig., ancje ass.) lâ indenant rispiet a une dificoltât, un ostacul, un esam e v.i.:  l'acuardi al jere che ducj i partîts a varessin presentât un sôl candidât comun, che al sarès automatichementri passât cul 100% dai vôts (Sergio Cecotti, Il risultât eletorâl dai partîts di identitât teritoriâl - A case study: Scottish National Party); Ricut al à dodis agns e nol è ancjemò passât di prime (Josef Marchet, Lis predicjis dal muini)
4. v.intr. [TS] zûcs intai zûcs di cjartis, fâ di mancul di zuiâ la sô man
5. v.intr. (ancje fig.) mudâ posizion, lâ di un puest, une cundizion, une compagnie e v.i. a une altre:  [Di Cjaurià] di sostignidôr de Dc tai agns 80 al jere passât cul Pci (Adrian Cescje, Memoriis di politiche linguistiche); i todescs, passâts di aleâts a nemîs, a copavin ducj chei che a cjatavin o ju depuartavin in Gjermanie (Cristina Noacco, Faliscjis)
   Sin. lâ
6. v.intr. jessi considerât intune cierte maniere:  Milio Vuaraç al jere za anzian cuant che il Fassio, cuntune firme, lu fasè passâ par volontari e lu spedì a Rodi (Riedo Pup, I furlans e il mâr); in cierts moments, il vêr, si pues dîlu dome se al passe par matetât, tant di cjapâlu in ridi (Maria Forte, Cjase di Dalban); o sin rivâts al pont che si passe par stupits o par mats o par bausârs se no si fasisi paiâ su la brucje un plasê, un servizi (Josef Marchet, Lis predicjis dal muini)
7. v.intr. (ancje fig.) mudâ di proprietât dilunc dal timp:  la filande di Çampâr […] agns daspò e passà a Josef Zanon, che al veve vierte une seconde filande, e plui tart al fi so Antoni (Adrian Cescje, Liniis di storie sociâl e economiche dal Friûl 1500 - 1800); «Tenle cont… [une monede antighe]» i veve dit. «Al è un ricuart di famee, al è passât di man in man cuissà di cetantis gjenerazions […]» (Pieri Menis, Chei di Muraie)
8. v.intr. di timp, no jessi plui tal presint:  a jerin passâts doi mês da la ultime volte che Nardon al veve fevelât cun Vigjute (Pieri Somede dai Marcs, Nardon e Vigjute di Nani); passâts altris vincjesiet agn, il Diaul in persone si presente al nestri om, e i dîs che al fasi il plasê di lâ cun lui (Luigi Gortani, Meni Fari)
9. v.intr. cessâ di lâ indevant, di esisti:  mi jere passade la voie di zuiâ (Carlo Sgorlon, Il dolfin); a Tunina a i era vignût un pôc di matetât e che al coventava spetâ che a i fos passada (Novella Cantarutti, Li Anzuliti); lu viodeve come vuarît di un mâl, la muse no plui ingropade, i voi une altre volte lusorôs, insome il piês al someave passât par simpri (Alan Brusini, Par stradis lungjis)
   Sin. cessâ , finî , sparî , lâ vie
   
   1. in espressions enfatichis, tant che rispueste o coment cun sens negatîf, viôt passâ la voie :  «O Nonusse, perdonimi! Ma sint, no sei rabine: / in domenie sarâstu su la fieste, a Pagnà?» / «Ti passe!…»
10. v.intr. murî:  la bisnone è passade in un suspîr (Ercole Carletti, La Ave)
    Sin. lâ , murî , spirâ
11. v.intr. jessi sopuartât, perdonât:  [Nino, l'om di Vera] dopo zuiât si pierdeve vie cui amîs de scuadre tornant dongje a straoris. Passe une volte, passin dôs, la tierce Vera lu clame adoremus (Ivano Urli, Veruska)
    
    1. v.tr. lassâ che alc al sucedi cun tolerance:  cheste te passi, ma che e sedi la ultime volte
       Sin. lassâ passâ , lassâ lâ
12. v.tr. (ancje fig.) traviersâ, superâ, lassâ indaûr e v.i.:  a Chiasso no si viodè doganîrs, ni talians ni svuizars. Passât Chiasso, il tren aromai al coreve a lunc tal scûr (Agnul di Spere, In viaç di domenie); [un forest par lâ di Udin in "Jugoslavie"] al passe la Tor, Remanzâs, la ferade e al rive a Cividât (Riedo Pup, No impaçâsi); il Benevento al vinç e al passe l’Udin in classifiche (Marc Stolf, Udinese - Benevento 0-2)
    Sin. lassâ , lassâ indaûr , superâ , traviersâ
13. v.tr. (ancje fig.) rivâ o jessi là di là, parsore, superiôr e v.i.:  i vâs a vignivin cuets intun ambient ridutôr (vâl a dî cun pôc ossigjen) a temperaduris che no passavin i 700 grâts (Andrea Pessina, Gaetano Vinciguerra, La preistorie in Friûl); un "export" che al passe i sîscent milions di euros ad an (Redazion il Diari, Dal setôr dal len un dramatic chivalì)
    Sin. superâ
14. v.tr. movi o fâ movi a traviers, dentri o intune altre relazion spaziâl:  il presonîr al mangjave une volte in dì di un plat che nus passavin a traviers i gatars de puarte (Ivano Urli, Storie di Min)
    Sin. meti
    
    1. puartâ di une bande a chê altre di une aghe:  o ai scugnût paiâ, jo, sâstu, chel frut di Culugne che mi à passât di là [dal Cormôr] (Riedo Pup, Vigji Strassanît)
       Cfr. puartâ , menâ
    2. movisi a traviers:  dolôrs tant che sablassadis i passavin fûr par fûr la bocje dal stomi e dute la fasse epatiche (Amedeo Giacomini, Tal ospedâl)
       Sin. traviersâ , strapassâ , travanâ
15. v.tr. fâ lâ di une posizion, cundizion, funzion, di un sisteme e v.i. a di une altre o fâ rivâ a une cierte posizion, cundizion e v.i.:  il plevan Vuarint […] al vignì gjavât di Glemone e passât cjaluni a Cividât (Riedo Pup, Gran Dio benedite l'Italia); il furlan al à une scriture convenzionâl […] che le àn passade a leç politics di diviersis crodincis politichis (Zorç Cadorin, Presentazion dal DOF piçul)
    Sin. meti
16. v.tr. fâ vê:  i secjave che il predi nol lavoràs, e i rincresseve di passâi il cuartês (Riedo Pup, I furlans e i predis); Vignesie e rispuindè che […] al plui e varès lassât al patriarcje il guvier temporâl di Sant Vît e di Sant Denêl e i varès passâts, come indenitât, trê mil ducâts ad an (Josef Marchet, Cuintristorie dal Friûl fin sot la Italie); une lenghe duncje no pues jessi considerade dome un imprest par passâ informazions (Sandri Carrozzo, Pseudopragmatisim linguistic)
    Sin. dâ
    Cfr. slungjâ , molâ
    
    1. (ancje fig.) fâ vê in ereditât, fâ vê aes gjenerazions dopo:  chê sensibilitât no je lade pierdude: cul sanc, le à passade a so fi Maurizio, che fin di piçul al à vût voie di disegnâ (Cristina Noacco, Faliscjis); i conts a àn il dirit di passâ il titul al fi (Francesc Placerean, La nestre storie)
       Sin. lassâ
    2. infetâ:  un che mi à pacade milante voltis fin a fâmi sanganâ, e che mi à passât malatiis marçosis e infamis (Antescûr, Se Diu al vûl)
       Sin. tacâ
    3. [TS] sport (ancje ass.) in diviers zûcs di scuadre, dâ o butâ la bale a un compagn di scuadre:  "Tire, passe, gol!" si sintiju businâ (Ivano Urli, I ordenâi)
17. v.tr. fâ fevelâ cun cdn., meti in comunicazion:  la sô assistente mi passe par telefon propit Sandra Pizzolitto Pupatello (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»)
18. v.tr. (fig.) rivâ a frontâ cun sucès une prove, une dificoltât, un ostacul e v.i.:  par rivâi [aes gnovis leçs di tutele dal furlan e dal solven] si à vût di passâ cuntun sfuarç no di pôc ducj i pidiments fats indenant massime di cierts rapresentants politics e sindicâi (Comitât 482, Pai dirits linguistics in Friûl - Vignesie Julie 2008-2013); passâ un esam di abilitazion par jentrâ intune tabele professionâl (Adrian Cescje, Memoriis di politiche linguistiche)
    Sin. superâ
    
    1. judicâ che cdn. al à frontât cun sucès une prove, une dificoltât, un nivel di preparazion e v…:  finît l'an di scuele, [la mestre] mi veve passât ae seconde classe, e cussì l'an dopo mi soi presentât al mestri Bastian (Pieri Menis, A scuele)
       Sin. mandâ , mandâ indenant
19. v.tr. stâ intune cierte maniere par une cierte dade di timp o intune cierte situazion:  al jere zovin, e al veve gust di passâ cualchi ore di libertât la sere (Meni Ucel, Orazions); i siôrs a passavin lis lôr vacancis in culine là che a vevin cjistiei e coloniis cun vignâi e zardins, cun boscs e roiuçs (Riedo Pup, I furlans e lis feriis)
    Sin. fâ , stâ , lâ
20. v.tr. [CO, TS] gastr. fâ lâ par un tamês o tratâ cuntun imprest di cusine par fâ vê une consistence fine e vualive:  bulî lis patatis, passâlis e messedâ cun farine, ûfs e sâl (Giorgio Pascoli, Il Litum: jerbis salvadiis te cusine)
    Cfr. tamesâ , masanâ
21. v.tr. [CO, TS] gastr. someti a un cualchi tratament che al compuarte une azion svelte, cun moviment e contat:  passâ la cjar in padiele; fâ a daduts un pet di poleç e passâju te farine (Margherita Timeus, Cusine etniche, parinte strete de cusine furlane)
22. v.tr. movi mantignint il contat:  cun man lizere, e scomençà a netâlu: i passave il peçotut su lis feridis (Roberto Ongaro, Il muc)
    Sin. freâ , sfreâ , freolâ , sfreolâ
23. v.tr. someti a un cualchi tratament:  passâ un test cul coretôr
    
    1. piturâ o dâ sù tant che piture:  mûrs passâts cu la cjalcine gnove (Celso Macôr, Jentrade a Sacheburache)
       Sin. piturâ , dâ , dâ sù
24. v.tr. someti ae atenzion par cjatâ ce che al interesse:  al passave cul dêt ogni non, par sigurâsi di no dismenteâ nuie (Maria Forte, Il Bide di Miot); o vin provât a passâ cun calme dute la sfilze dai manifescj che a forin publicâts an par an, cun decrets e proviodiments dal guvier (Josef Marchet, Cuintristorie dal Friûl fin sot la Italie)
    Sin. cjalâ , spulzinâ , lei

Polirematichis e espressions idiomatichis

• fâ passâ la voie loc.v.
• fâ passâ par loc.v.
• no passâ pe gose loc.v.
• passâ denant loc.v.
• passâ devant loc.v.
• passâ di grât loc.v.
• passâ in rassegne loc.v.
• passâ in riviste loc.v.
• passâ la man loc.v.
• passâ la misure loc.v.
• passâ la ore loc.v.
• passâ la peraule loc.v.
• passâ la voie loc.v.
• passâ pal cerviel loc.v.
• passâ pal cjâf loc.v.
• passâ par man loc.v.
• passâ parsore loc.v.
• passâ part loc.v.
• passâ peraule loc.v.
• passâ sore loc.v.
• passâ une moscje loc.
• passâle slisse loc.v.
• passânt di pît e di cjaval loc.v.

Proverbis:

• a Sant Benedet la cisile e passe sot il tet, passe no passe, il frêt nus lasse
• a volê trai il ves plui grant de buse o che il ves nol passe o che la buse si sprece
• al è passât il timp che a colave la mane
• al è passât il timp di lâ a moris
• bisugne cjapâ i uciei cuant che a passin
• bisugne cjapâ lis vuitis cuant che a passin
• ce che al passe al ingrasse
• cuant che a passin i codons, i uciei a finissin
• cui che al vûl cjapâ ducj i uciei che a passin no 'nt cjape nissun
• dal dâ al vê e passe une biele diference
• dal dit al fat al passe un grant trat
• Diu mieze zornade le passe a fâlis, e chê altre mieze a dâlis
• dulà che si passe la etât biele ogni piere a fevele
• dut al passe fûr che il mani dal furducjin
• i è passade ancje a Napoleon che al veve i spirons di aur
• i gjenitôrs a àn il dovê di mantignî i fis fin che a àn sessante agns finîts; e po passâur il tabac
• i passarà se i è passade ancje a napoleon che al veve i spirons di aur
• i vedui il prin dì a vain, il secont se passin, il tierç se ridin
• il timp al passe e la muart e ven
• il timp al passe e no si po fermâlu
• joibe stade, setemane passade
• miôr passâ par stupits che par masse svelts
• misdì di vile o che al passe o che nol rive
• ogni an al passe un an
• ogni dì e passe chê zornade
• passade la cincuantine a 'nd è une ogni matine
• passade la cjoche si sint la bote
• passade la doie, tornade la voie
• passade la trentine a van in vuaìne
• passât il glotidôr, passât ogni savôr
• passât il trenteun no lis vûl plui nissun
• passât il volt di Clement, nissun no ti à iniment
• passâts i sessante agns si torne fruts
• passe un, passe cent
• prin di Nadâl il frêt nol è rivât, daspò Nadâl il frêt al è passât
• Sant Gregori pape la cisile a passe la aghe, passâ o no passâ e je ore di arâ
• se no passe, metii un stec a la volte
• un bon avocat al fâs passâ par cjan ancje il gjat
• voltât il cjanton, passade la passion