Dizionari de Lenghe Furlane

mandâ  man|dâ  [FO]

1. v.tr. fâ lâ cdn. in cualchi puest:  par evitâ che i furlans si copin tra di lôr, Gurizans e Valcjanalots a vegnin mandâts sul front Galizian, te becjarie cuintri i Rus (Angelo Floramo, Cuintristorie dal Nûfcent 1910-1920); i siei a vevin miôr di no mandâle ni a scuele, ni a dutrine, parcè che i comodave che e stes a fâ lis voris di cjase (Pieri Somede dai Marcs, Nardon e Vigjute di Nani); il plevan al mande cualchi predi a dî messe a S. Pieri la domenie e cualchi rare volte in dîs di vore (Josef Marchet, Lis predicjis dal muini)
   Sin. inviâ , parâ , spedî
2. v.tr. lassâ lâ, dâ il permès:  al mi mostre une cjarte dal manicomi che e diseve che lu vevin mandât a cjase «perché maniaco tranquillo» (Pieri Somede dai Marcs, Strambariis)
   Sin. molâ , lassâ lâ
   
   1. cuntun predicatîf, fâ vignî fûr di un procès:  se ti brinchin, o ti mandin assolt o ti mandin condonât (Riedo Pup, Par paiâ al vûl mistîr); Carlo Nobili, daspò che il segretari de une amonizion severe, al fo mandât libar (Pierluigi Visintin, Friûl e furlans te Histoire de ma vie di Giacomo Casanova)
3. v.tr. fâ rivâ alc a cdn. o tun puest:  la mari i mandà scrit tune letare, che e jere tant contente [de impromission], che i dave la sô benedizion e che i varès fat rivâ un grum di robe biele (Maria Forte, Cjase di Dalban); cui prins bêçs ur mandarai ancje cualchi regalut, che si visin di me e che mi spietin, che o tornarai siore e contente (Antescûr, Se Diu al vûl); il Soreli, mandant la sô energjie su la Tiere al met in moviment dute la atmosfere (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. indreçâ , inviâ , spedî
4. v.tr. fâ che alc al ledi intune direzion cuntun sburt, cuntune pocade o sim.:  il secont timp si vierç cuntune bombe di Calò che Sarr al tocje e al mande sul pâl (Marc Stolf, Ascoli - Pordenone 0-1)
5. v.tr. (fig.) direzi inviers di cdn. o alc:  Macondo, Buendia, Aureliano, Melquiades… al baste un di chescj nons par mandâ il pinsîr tal mont di Gabriel Garcia Marquez e dal so Cien años de soledad (Raffaele Serafini, Cent agns bessôi di Gabriel Garcia Marquez); une sere come lis altris jê ti va tal jet, disot des panolis jê ti mandave a torzeon i pinsîrs prin di cjapâ sium (Dolfo Zorzut, No je plui vive)
   Sin. butâ
6. v.tr. puartâ cdn. o alc intune cierte cundizion:  no i mancjave nuie altri par mandâ Dolfo fûr dai sintiments (Gianni Gregoricchio, Trê feminis); i fantats a cjaval a mandin in dovis un caratel impirât suntun pâl che al sarès il Turc (Dino Virgili, La aghe da pît la cleve)
   Sin. fâ lâ
7. v.tr. trasmeti par radio o par television:  in sostance lis emitentis televisivis a mandin trasmissions par furlan dome daûr finanziament public (Sandri Carrozzo, La politiche pe lenghe furlane: risultâts de ultime aministrazion regjonâl in Friûl-VJ e propuestis pal avignî)
8. v.tr. produsi un sun, un odôr, un riflès e v.i. in mût che al sedi sintût:  un pistum che al mandave bon odôr di jerbucis (Maria Forte, La tiere di Lansing); lis cromaduris de moto mandin lamps di fiar a la lûs dai lampions (Sandri Di Suald, Ah! la provincie)
   Sin. mandâ fûr , mandâ sù , dâ sù , butâ fûr

Polirematichis e espressions idiomatichis

• che Diu le mande loc.av.
• mandâ a bocons loc.v.
• mandâ a cagâ loc.v.
• mandâ a chel paîs loc.v.
• mandâ a dî loc.v.
• mandâ a fâ in cûl loc.v.
• mandâ a fâsi benedî loc.v.
• mandâ a fâsi foti loc.v.
• mandâ a fâsi fridi loc.v.
• mandâ a fâsi jemplâ il cûl di ai loc.v.
• mandâ a fruçons loc.v.
• mandâ a fûc loc.v.
• mandâ a ment loc.v.
• mandâ a ments loc.v.
• mandâ a mulin loc.v.
• mandâ a passon loc.v.
• mandâ a remengo loc.v.
• mandâ a saludâ loc.v.
• mandâ a tocs loc.v.
• mandâ a trai loc.v.
• mandâ a vueit loc.v.
• mandâ al diaul loc.v.
• mandâ al infier loc.v.
• mandâ cun Diu loc.v.
• mandâ fûr loc.v.
• mandâ in Avrîl loc.v.
• mandâ in bestie loc.v.
• mandâ in chel paîs loc.v.
• mandâ in cûl loc.v.
• mandâ in fruçons loc.v.
• mandâ in malore loc.v.
• mandâ in scufe loc.v.
• mandâ incuintri loc.v.
• mandâ indaûr loc.v.
• mandâ indenant loc.v.
• mandâ indenant la barache loc.v.
• mandâ indevant loc.v.
• mandâ indevant la barache loc.v.
• mandâ jù loc.v.
• mandâ jù la bocjade loc.v.
• mandâ pai trois loc.v.
• mandâ sot loc.v.
• mandâ sot procès loc.v.
• mandâ sù loc.v.
• mandâ su la ostie loc.v.
• mandâ tal ort loc.v.
• mandâ vie loc.v.

Proverbis:

• cui che al vûl che al ledi; cui che nol vûl che al mandi
• cui che al vûl un bricon che lu mandi a scuele o ben a passon
• cui che al vûl vê che al ledi, cui che nol vûl vê che al mandi
• cui che nol vûl che al mandi mes, cui che al vûl che al ledi stes
• Diu al mande il frêt daûr dal tabâr
• il Signôr al mande il frêt daûr de vieste
• robe une gjaline ti mandin a la ghiliotine, robe un milion no tu vâs nancje in preson
• se il Signôr al mande il frut, al mande ancje il pagnut
• se si à voie di vê un bon poltron, bisugne mandâlu a scuele o a passon