Dizionari de Lenghe Furlane

mandâ vie    [AF]

1. loc.v. fâ lâ o fâ stâ lontan, ancje cun decision o cu la fuarce:  ju lampà che a intravin tal zardin, e subit al corè jù a bas a mandâju vie plui che di presse, disint che siôrs e sioris e jerin in grant gale e che lui nol podeve acetâju cussì mâl vistûts (Catarine Percude, Il solt del Signôr); lis leçs talianis in materie di imigrazion a cambiin di un continui e o ai pôre che, di une dì a chê altre, mi mandedin vie (Erika Adami, In Friûl, cuntun sium tal cjâf e la Afriche tal cûr)
   Sin. parâ vie , slontanâ
   Cfr. mandâ fûr , parâ fûr
   
   1. (fig.) fâ stâ lontan ancje alc di imateriâl, tant che un pinsîr, o une eventualitât, un pericul e v.i.:  si passà la man sul cerneli come par mandâ vie un brut pinsîr (Pieri Menis, Sul agâr)
   2. (fig.) fâ passâ une sensazion o une cundizion:  si à prime di dut di rindisi cont de esistence dal dolôr (dukka), capî cemût che il dolôr si forme e cemût mandâlu vie (Franc Fari, Neurosiencis de meditazion)
2. loc.v. mandâ par pueste, cuntun corîr o altri:  o vevi mandât vie a personis e a sociis centenârs di invîts (Adrian Cescje, Memoriis di politiche linguistiche)
3. loc.v. fâ che cdn. al vedi di molâ une posizion, une ativitât, une funzion e v.i.:  i bêçs ancjemò no son rivâts intes scuelis. La direzion regjonâl, dopo che il prof. Bruno Forte al è stât mandât vie, e je ferme dal dut (Pier Carlo Begotti, Il 2003 e lis lenghis dal Friûl)
   Sin. meti de bande , lassâ di bande , lassâ de bande , lassâ in bande , butâ di bande , butâ de bande , butâ in bande , parâ in bande , parâ di bande , parâ de bande

Components:

• mandâ v.tr.
• vie s.f., av., inter., s.m.sing., prep.