Dizionari de Lenghe Furlane

parâ vie    [FO]

1. loc.v. fâ lâ o fâ stâ lontan, ancje cun decision o cu la fuarce:  di confidence in confidence, i ôcs a lavin pardut. Di scugnî tignî lis puartis sieradis o stâ pronts a parâju vie cu la scove (Maria Forte, I ôcs di Miute); "No bisugne precipitâ. Pluitost scrivìn, o pûr mandìn cualchi persone di cûr che puedi fevelâ par te… Bisugne che tu pensis che no tu pûs lâ tu a fâti maltratâ, a fâti parâ vie…" (Vittorio Vittorello, A ogni cost)
   Sin. mandâ vie , slontanâ
   Cfr. mandâ fûr , parâ fûr
   
   1. (fig.) fâ stâ lontan ancje alc di imateriâl, tant che un pinsîr, o une eventualitât, un pericul e v.i.:  al si passà une man sul cerneli come par parâ vie un pinsîr dolorôs (Zuan Lurinçon, La Madalene)
   2. (fig.) fâ passâ une sensazion o une cundizion:  o ai mangjât masse sardelon e scugnût bevi cualchi taçute di plui par parà vie la sêt (Arturo Feruglio, El sardelon); il bicjerin lu vin bevût noaltris par parâ vie la fote che nus jere vignude sù (Pieri Somede dai Marcs, Lis votazions); a scuegnin cjantâ… magari par parâ vie la maluserie che a àn sul stomi (Pieri Menis, Zilugne)
2. loc.v. fâ che cdn. al vedi di molâ une posizion, une ativitât, une funzion e v.i.:  [Mussolini] nol à rivât adore di tignî adun nancje i siei, che cul jutori dal re Vitorio - chel che lu veve metût sù dal '22 - lu àn parât vie e metût in preson (Francesc Placerean, Cuintristorie dal Friûl dal 1866 fint in dì di vuê)
   Sin. meti de bande , lassâ di bande , lassâ de bande , lassâ in bande , butâ di bande , butâ de bande , butâ in bande , parâ in bande , parâ di bande , parâ de bande
3. loc.v. riferît al timp, fâlu passâ:  done Pine e agne Menie, dopo vê murmuiât il rosari intîr par parâ vie il timp, si jerin fermadis a lunc, une par cjanton, cidinis (Pieri Menis, Chei di Muraie); al vignive a Tesis par parâ vie il timp e par sbaldîsi un pôc (Carlo Sgorlon, Il dolfin)
4. loc.v. movisi indenant, seguitâ a lâ:  Minut al parave vie. Sul puint di len, ca jù dal Luri, a jerin i coscrits di Rivuinis a spietâju (Dino Virgili, La aghe da pît la cleve); "[…] Se i voleis parâ via pa la vuestra strada, viodeit di no fâsi capî!" (Stiefin Morat, Donald dal Tiliment)
   Sin. lâ indevant , lâ indenant , lâ dilunc
   
   1. procedi, seguitâ a sucedi:  di là di chest fat, pe int lis robis a pararin vie tant che simpri (Stiefin Morat, Microrivoluzions)
   2. procedi e in câs rivâ insom cun ce che si è daûr a fâ o a dî
   3. continuâ:  "Eh frut, lis robis, par vêlis, bisugne scombati, e co si à scombatût si scuen parâ vie a scombati par no fâses puartâ vie!" (Stiefin Morat, Donald dal Tiliment)

Components:

• parâ v.tr.
• vie s.f., av., inter., s.m.sing., prep.

Proverbis:

• Sant Matie se al cjate glace le pare vie, se no 'nt cjate ind fâs vignî