Dizionari de Lenghe Furlane

lâ indevant    [FO]

1. loc.v. (ancje fig.) procedi, vê un moviment intune cierte direzion, ancje cun sens di continuitât:  siôr Turo al jere daûr di Nita e al le indevant a batii une man su la spadule (Dino Virgili, La aghe da pît la cleve); si cjatà devant di un mûr alt, jê no podeve lâ indevant, no saveve ce che al jere di là (Jolanda Mazzon, Fûr di timp)
   Sin. lâ dilunc , lâ indenant , tirâ dilunc , tirâ indevant , tirâ indenant
   
   1. tacâ un moviment, slontanâsi di un puest o di une compagnie:  "Dai, moveitsi, cjapait sù lis vuestris robis e anìn indevant, dai di corse […]" (Luca Zoratti, Par podê viodi il mâr)
      Sin. lâ , lâ vie , lâ dilunc , lâ indenant
   2. partî prime di cdn. altri:  "Tu va indevant. Si cjatarìn sul puint di Cjavriis." (Gianni Gregoricchio, Îr e doman)
   3. vê une estension o prosecuzion intune cierte direzion:  dopo de crosere, la strade e va indevant par Palme
      Sin. lâ indenant , lâ dilunc
2. loc.v. svicinâsi a une fin, a un obietîf, a un risultât e v.i.:  i bêçs a mancjin e lis robis no van indevant, ma la colpe di cui ise? (Walter Tomada, A Tresesin pal Congrès anuâl de Societât Filologjiche Furlane)
   
   1. vê une evoluzion, une cressite:  il mont nol sta dibant: / si bat la lune in mût particolâr, / e pûr si va indevant. / Machinis a vapôr in tiare e in mâr, / telegrafos di lunc e di traviars, / e in grazie del progrès olìn sperâ / fra pôc timp di svolâ (Pieri Çorut, La fotografie di Pieri Çorut)
3. loc.v. rivâ a vivi, a frontâ problemis, spesis e v.i.:  "Mariane… - al veve scomençât intant so pari, - di bessole no tu puedis lâ indevant. Ti covente cualchidun che ti dedi une man e magari dôs" (Gianni Gregoricchio, Îr e doman)
   Sin. tirâ indenant , tirâ indevant , lâ indenant
4. loc.v. vê une durade intal timp:  l'Istitût Tellini al à ideât un progjet straordenari, che al larà indevant par cualchi an (Domeni Zannier, Mîts e flabis de Patrie)
   Sin. lâ indenant , lâ dilunc , slungjâsi , continuâ , durâ , tirâ dilunc , tirâ indevant , tirâ indenant
   
   1. dal timp, passâ:  e mi dirês che i agns van indevant… (Pieri Çorut, Il Strolic furlan par l'an 1851)
      Sin. passâ , lâ vie , lâ indenant , lâ dilunc
   2. vê une cierte forme di jessi, di sucedi, di fâ e v.i. che e dure intal timp:  la robe e je lade indevant cussì fin che i sienziâts no àn cjatât la vacine e la cuarantene e je finide (Astrid Virili, Lis metamorfosis)
      Sin. lâ indenant , lâ dilunc
5. loc.v. procedi intune azion za tacade, fâ une azion in maniere continuade o ripetude, che e pues jessi ancje sotintindude:  no si po lâ indevant a straçâ (Gotart Mitri, 2003: an da la aghe); al cjape Turo a bracet e al fevele, come che al les indevant cuntun discors za inviât (Dino Virgili, La aghe da pît la cleve); al disè sotvôs "No stâ crodi…" Jê si spietave che al les indevant, invezi al tasè cidin (Jolanda Mazzon, Fûr di timp)
   Sin. lâ indenant , lâ dilunc , parâ indevant , parâ indenant , continuâ , tirâ dilunc , tirâ indevant , tirâ indenant

Components:

• indevant av., adi.inv., s.m.inv.
• lâ v.intr., s.m.sing.