Dizionari de Lenghe Furlane

tirâ indenant    [AF]

1. loc.v. lâ indenant, movisi indenant, soredut cence fermâsi:  rivâts a ret di Fondâs, a slungjin il pas e a tirin indenant biel svelts (Josef Cjargnel, La liende di Fondâs)
   Sin. lâ indenant , lâ indevant , lâ vie dret , lâ dret , lâ dilunc , tirâ dilunc , tirâ vie , tirâ indevant
2. loc.v. lâ indenant a jessi o a compuartâsi intune cierte maniere o a fâ alc:  la Italie, vitime secolâr de retoriche, e tirarà indenant mantignint la camore e la massepassuderie dai plui svelts, e mostrant a dut il mont cetant malmadure che je la sô int par une forme di vite civîl (Josef Marchet, La gnespule malmadure)
   Sin. lâ indenant , lâ indevant , lâ vie dret , lâ dret , lâ dilunc , tirâ dilunc , tirâ indevant
3. loc.v. vê une cierte durade:  la fieste e tirà indenant par une setemane di file, dì e gnot (Stiefin Morat, Microrivoluzions)
   Sin. lâ indenant , lâ indevant , lâ dilunc , tirâ dilunc , lâ a dilunc , tirâ a dilunc , tirâ indevant
4. loc.v. (coloc.) vivi, sostentâsi, lavorâ e v.i., intune cierte maniere che e pues jessi specificade o soredut a la mancul piês:  di aconts, Jacun, no 'nd veve mai avonde. Al veve simpri une grande dibisugne, par vie che cul lavôr nol rivave mai a paiâsi lis spesis par tirâ indenant (Alviero Negro, Il famei dal contin); in chê volte no jeri ancjemò laureade e o tiravi indenant cu lis lezions privadis (Gianni Gregoricchio, Trê feminis); cumò o ai la pension, tant che il gno om, e o rivin a tirâ indenant vonde ben (Alessio Potocco, Doi furlans in Istrie)
   Sin. tirâ indevant , lâ indevant , lâ indenant , tirâ dilunc
5. loc.v. movi indenant:  domenie e cambiarà la ore, si varà di tirâ indenant lis speris dal orloi
   Sin. tirâ indevant
6. loc.v. puartâ indevant une ativitât in mût che no si fermi o ancje fâ lâ indevant, fâ procedi, fâ cressi alc di imateriâl tant che une idee, un valôr, une tradizion e v.i.:  [lavorâ tant in mût che] al vanzi materiâl di meti in tasse par doprâlu in Sierade intal for e di podê tirâ indenant la produzion de fornâs il timp che al glace (Ivano Urli, Storie di Min); par tirâ indenant une idee, un gjornâl, un partît, bisugne jessi libars (Antoni Beline, Felix Marchi e Marie Del Fabro: une vite par une idee)
   Sin. tirâ indevant , parâ indenant , puartâ indevant , mandâ indenant , mandâ indevant , parâ indevant , puartâ indenant
7. loc.v. fâ in mût che a sedin avonde risorsis par lâ indenant:  a Montenârs, une volte a jerin passe 60 rocui che lis fameis a dopravin par cjapâ i ucieluts e tirâ indenant la economie familiâr (Piero Cargnelutti, Rocui, un patrimoni furlan te memorie di Pre Checo)
   Sin. tirâ indevant , mandâ indenant , parâ indenant , tignî sù

Components:

• indenant av., adi.inv., s.m.inv.
• tirâ v.tr., v.intr.