Dizionari de Lenghe Furlane

tirâ dilunc    [CO]

1. loc.v. lâ indenant, movisi indenant, soredut cence fermâsi:  il Signôr, cence badâi [a sant Pieri], al tirà dilunc e al jentrà intune altre cjase plui puare, nere di cjalin (Luigi Gortani, La ospitalitât)
   Sin. lâ indenant , lâ indevant , lâ vie dret , lâ dret , lâ dilunc , tirâ indenant
2. loc.v. lâ indenant a jessi o a compuartâsi intune cierte maniere o a fâ alc:  il patrimoni culturâl di cheste regjon sul confin, spetacolâr te sô pluritât di formis artistichis, di sfumaduris dialetâls, di contaminazions forestis, di popui e di tradizions, al tire dilunc e si transforme (Valentina Urli, La tô place: cjanton di mont)
   Sin. lâ indenant , lâ indevant , lâ vie dret , lâ dret , lâ dilunc , tirâ indenant
3. loc.v. lâ indenant cuntun discors, cuntun argoment:  "No viodial in ce cundizion che al è ridot? Al à il fisic di un di sessante agns!" […] "Ce puedial fâmi un spagnolet?". "Che al fumi, che al fumi, al viodarà ben!" E comentà la muinie tirant dilunc, po: "Che al torni te sô stanzie cumò, che ca di un pôc e rive la cene" (Amedeo Giacomini, Tal ospedâl)
   Sin. lâ indenant , lâ indevant , parâ indenant , parâ indevant
   
   1. lassâ pierdi un argoment e passâ a un altri:  "Chel che si murmuiavin tra di lôr fevelant in todesc, jo no capivi: - gut, gut, ja, ja, schön, schön… — chel che o capivi ben l'jere… di fâ lusôr. Tirìn dilunc, tirìn" (Emilio Nardini, La Signorine Mie)
4. loc.v. vê une cierte durade
   Sin. lâ indenant , lâ indevant , lâ dilunc , lâ a dilunc , tirâ a dilunc , tirâ a lunc
5. loc.v. (coloc.) vivi, sostentâsi, lavorâ e v.i., intune cierte maniere che e pues jessi specificade o soredut a la mancul piês:  cussì, cence vê un fin, al tirave dilunc sbarcjant lunari e cuant che no jerin plui napis di spacâ, nissun i dineave une bocjade di companadi e une fete di polente (Pieri Somede dai Marcs, Spacecjamin); o pensi a mê mari e a gno pari che, par tirâ dilunc, a àn di scanâsi dut il dì (AAVV, Sul florî)
   Sin. tirâ indevant , lâ indevant , lâ indenant , tirâ indenant
6. loc.v. fâ spietâ tant o fâ ritardâ:  par gjavâ di mieç il probleme [di cjatâ la cuviertidure finanziarie pe leç], si tire dilunc ancje la aprovazion dai regolaments (Oscar Puntel, Comedie continue)
   Sin. tirâ in lunc , tirâ a lunc

Components:

• dilunc av., prep.
• tirâ v.tr., v.intr.