Dizionari de Lenghe Furlane

lâ dilunc    [AF]

1. loc.v. (ancje fig.) procedi, vê un moviment che al continue tune cierte direzion:  e je int in sorte. Di ogni etât. Frutins tai braçs des maris. Viei carampans intrigâts a lâ dilunc pe citât (Ivano Urli, Storie di Vera); alore lui al va dilunc di cualchi pas, trop che i covente par olmâ il cjan scrofât sot dal taulin (Franco Marchetta, Madalene)
   Sin. lâ indevant , lâ indenant , tirâ dilunc , tirâ indevant , tirâ indenant
   
   1. tacâ un moviment, slontanâsi di un puest o di une compagnie:  il vieli al jere seneôs di partî. «Anìn dilunc» al diseve, «che Tunine nus spiete» (Alan Brusini, Come tai romançs)
      Sin. lâ , lâ vie , lâ indevant , lâ indenant
   2. vê une estension o une prosecuzion intune cierte direzion:  la strade basse no finìs, e va dilunc inte stradele di cjamp, fin che e rive su chê strade blancje daûr Cjasielis (Laurin Zuan Nardin, Vie Vignesie)
      Sin. lâ indevant , lâ indenant
2. loc.v. vê une durade intal timp:  al va dilunc il braç di fier tra Londre e Brussel (Marc Stolf, Ream Unît, Johnson al vûl il "No deal" e in Scozie e in Gales e cres la voie di indipendence)
   Sin. lâ indevant , lâ indenant , slungjâsi , continuâ , durâ , tirâ dilunc , tirâ indevant , tirâ indenant
   
   1. dal timp, passâ:  "[…] tu viodarâs che nol larà dilunc tant timp che tu tornarâs tal to paîs…" (Pieri Somede dai Marcs, Cjase di fitâ)
      Sin. passâ , lâ vie
   2. vê une cierte forme di jessi, di sucedi, di fâ e v.i. che e dure intal timp:  "Chê frute no po lâ dilunc cussì…" (Pieri Somede dai Marcs, Vilie di Nadâl (teatri))
      Sin. lâ indevant , lâ indenant
3. loc.v. procedi intune azion za tacade, fâ une azion in maniere continuade o ripetude, che e pues jessi ancje sotintindude:  Mariane e jere lade dilunc a mangjâ. E tignive i voi sul plat (Gianni Gregoricchio, Îr e doman); il contestoriis al va dilunc cul so discors (Alviero Negro, Int di masnade); "Intant - al va dilunc Nicolùs - il cont Jacum di Voleson, fradi di Ulvin, al ven fûr dal bosc di chê altre bande cui siei trente balestrîrs sielts e infalibii." (Diego Navarria, La bataie di Bant di Morsan)
   Sin. lâ indevant , lâ indenant , parâ indevant , parâ indenant , continuâ , tirâ dilunc , tirâ indevant , tirâ indenant

Components:

• dilunc av., prep.
• lâ v.intr., s.m.sing.